Tơdroăng kố pro pơxúa tơƀrê khât ăm tơdroăng mơdâ pêt báu, pôm ló, thăm pro tơmeăm dâi lĕm khât; tơdrêng amê, hnối châ kơdĭng têa tôh, phon rơvât, mơjiâng tơmeăm sinh hok; ki málối kơdroh mơngế cheăng, chôu phut, hâi khế ƀă hnối rak vế ivá ăm kuăn mơngế.

Môi hâi tơdế khế 6, a kơdrum deăng pêt pôm ló rơdâ 10ha a cheăm Ƀuôn Triă, tơring Lăk, pôa Phạm Đăng Xuân dế tiê dêi kơmăi kơneăng, ôh tá ai mơngế kơto, nâl Ănglê tối cho Drone kơmăi ki mê kơneăng tôh têa ăm ‘noăng pôm ló dế xiâm pôm dế vâ ai pôm. Ngoh tối ăm ngin ‘nâi, rêm hâi, tơmeăm ki mê chiâng pêi cheăng ing 8 chôu toh 10 chôu, tôh châ sap ing 25 troh 30ha hdrê loăng pêt. Tơdroăng ki xúa kơmăi kơneăng tôh têa kố ga tơ’lêi tê, bú kal ‘mot têa pêng têa tung kơthung ki kân, rơvât phon, phon hlá nhâ, klêi mê, xúa kơxái ki kơneăng prôk dêi kơmăi, kơmăi ki mê kô kơneăng hnối tôh têa ing ‘ngêi:

“Ngin tối tơƀai ki ôh tá ai mơngế kơto, ngin xúa kơmăi ki kố tơ’lêi hlâu ‘nâng, ôh tá eâ tăng mơngế tôh, chôu phut hâi khế xuân rĕng, tơ’lêi. Tung 1 ha ngin ăm kơmăi ki kố kơneăng ngin tôh dâng 10 phut ga hiăng klêi, hdrối nah, 2 ngế lăm tôh athê tâi môi pôe hâi mê nếo klêi. Kŏng ngê̆ chal nếo nôkố cho rơkê păng ‘nâng. Ngin hmâ xúa phon hlá nhâ vâ ăm kơmăi kơneăng tôh ăm ‘noăng pôm ló, ngăn ga tơtro ƀă tơniăn ‘nâng”.

Khoh tơ’lêi ăm tơdroăng xúa kơmăi ki kơneăng kố tung pêi chiâk pêi deăng dêi kuăn pơlê a tơring Lăk cho tơdroăng ki ôh tá xê ai pơkâ hdrối. Ngoh Cao Xuân Phương, Kăn ngăn ‘na Khu pêi cheăng tơrŭm chiâk deăng Thành Tín, cheăm Dak Nuê, tơring Lăk tối, mâu hơnăm hdrối nah, klêi kơ’nâi lăm ngăn túa ki xôh pơkeăng, phon rak vế hdrê pêt ƀă kơmăi kố a tơring Đức Trọng, kong pơlê Lâm Đồng, ngoh hiăng lăm rôe 2 toăng ing Cần Thơ vâ mơnúa xúa ngăn. Apoăng nah, Khu pêi cheăng tơrŭm hiăng rah xo 2 ngế ki rĕng má môi, tung mê ai tơná ngoh lăm troh a tíu ki tê kơmăi ki mê vâ hriâm kih thuât tiê ăm kơmăi kơneăng. Klêi kơ’nâi xúa kơmăi ki kơneăng kố, hlo hiăng châ xúa khât păng ‘nâng:

“Klêi kơnâi xúa tung 2 hơnăm vêh ngi kố, ngin hlo tơ’ló khât, xua ga châ kơdroh 30% kơxô̆ liăn ki rôe phon, pơkeăng xôh; hnoăng pêi cheăng xuân kơdroh châ tơdế ăm kuăn pơlê. Xua kơmăi ki kơneăng kố cho kŏng ngê̆ ki mơdá rơkê má môi, pro phon, pơkeăng tơvât ƀă têa tơmot, ga xôh môi tiah kong mêi hbrí hbríu, kơto têa ki mê ga mot tung hlá, xua mê ôh tá mơ’nhê phon hên, têa hên, xuân ôh tá ‘mêi troh ivá châ chăn kuăn mơngế”.

Khu pêi cheăng tơrŭm Chiâk deăng Thành Tín, cheăm Dak Nuê, tơring Lăk ai vâ chê 100 rơpŏng, pêt lối 130 ha plôm ló, vâ chê 700 ha klâng báu. Xúa Kŏng ngê̆ ki rơkê kố tung mê ai tơmeăm ki kơneăng tôh ăm mâu hdrê loăng ki pêt, pro tơmeăm mơjiâng thăm rế dâi lĕm, kơmăi ki kố xuân krá. Pôm ló dêi Khu pêi cheăng tơrŭm hiăng châ hbru ăm mah kơxô̆ kơpong pêt, mơ’no tê mơdró tơngi kong têa ê tro tiô troăng klông ki pơkâ, maluâ châ tê troh a kong têa Sinuâ. Ing ki tơƀrê mê châ ‘nâi nhên, nếo achê pơla kố, khu pê cheăng tơrŭm hiăng rôe tơ’nôm 2 toăng kơmăi ki kơneăng mê vâ pơtối tôh, xôh phon, pơkeăng, rêm toăng kơmăi mê kơnâ châ 250 rơtuh liăn.