Hlo tơdroăng kuăn pơlê hmôu pơ po rơdâ deăng pêt loăng plâi sầu riêng, kơvâ ngăn ‘na chiâk deăng Lâm Đồng hiăng tối hdrối ăm kuăn pơlê kô ai tơdroăng ôh tá mơhúa. Tung mâu hơnăm achê pơla kố, hên kuăn pơlê pêi chiâk a Lâm Đồng hiăng ko dêi ‘nâ mâu loăng plâi ki ê vâ pêt loăng plâi sâu riêng. Ing mê, tơnêi pêt loăng plâi sâu riêng dêi kong pơlê kố hiăng lối 17 rơpâu 160 ha, tâk lối 3.500 ha tâng vâ pơchông ƀă hơnăm hdrối.

Hlo ti mê, kơvâ ngăn ‘na chiâk deăng Lâm Đồng hiăng thâ tối tơbleăng hdrối ăm kuăn pơlê pôi tá po rơdâ deăng pêt loăng plâi sầu riêng. Tơdroăng kuăn pơlê ko tah dêi loăng plâi vâ pơ’lêh pêt loăng plâi sầu riêng hlối tơdjâk hên tơdroăng, tung mê tô tuăn hên má môi loăng plâi hên luâ pơkâ, chiâng ôh tá tơniăn ‘na tê mơdró plâi a kơchơ tung la ngiâ.