Tơ’noăng kơ-óu kơphế Việt Nam hơnăm 2025, xo hồ sơ chêh inâi ta troh tâi hâi lơ 10/2/2025. Hneăng tơ’noăng kô po hâi lơ 10/3/2025, tơbleăng điêm ƀă diâp pri a hâi lơ 13/3/2025, klăng rôh Leh mơdĭng kơphế Buôn Ma Thuột rôh má 9. Mâu ngế veăng tơ’noăng cho mơngế Việt Nam sap 18 hơnăm tơngi klêng, dế rêh ối ƀă pêi cheăng tung tơnêi têa Việt Nam.

Mâu ki veăng tơ’noăng thế tơkâ luâ mâu tơdroăng tơ’noăng, mê cho: tơdah xo kloăng kơphế ki vâ kơ-óu; hmâ pêi ngăn kơmăi kơ-óu, nâp hlá mơ-éa chêh pơkâ kơ-óu ƀă bảng ki chêh tối dêi ki xú hŏm lĕm dêi kơphế; kơ-óu vâi hlá ngăn... Pôa Trịnh Đức Minh - Kăn hnê ngăn Khu kơphế Buôn Ma Thuột ăm ‘nâi kong pơlê Dak Lak dế mơ-eăm mơnhông Buôn Ma Thuột chiâng kơphố kơphế dêi lâp plâi tơnêi, pa kĭng tơdroăng mơhno ki rơdêi tơnêi ki kân, tơmeăm mê ki tơbrê, ki xúa hŏm dêi kơphế klêi kơ-óu uâ pơliê kal thế tơmâng khât.