Hâi lơ 5/1,  Khu xiâm ngăn ‘na chiâk deăng ƀă mơnhông thôn pơlê tơkŭm po hôp tơpui ‘na tơdroăng “Tơngah mơnhông kơpong pêi lo kế kâ chĕm mơnăn păn, mê cho alâi, pôm loăng a kơpong Tây Nguyên’’ . Vâ mơdêk ki pơxúa dêi alâi ƀă pôm loăng, tung pơla hdrối kô nah Grup De Heus (Hà Lan) hiăng tí tăng ngăn kơpong pêi lo kế tơmeăm a 3 to kong pơlê a kơpong Tây Nguyên, mê cho: Dak Lak, Gia Lai, Kon Tum.

Klêi tí tăng ngăn ăm hlo, alâi ƀă pôm loăng ai hên rôh vâ mơdêk ki pơxúa drêng veăng pêi pro tơmeăm kế kâ ki chĕm mơnăn, kơdroh tơdroăng ki pá rôe to tơmeăm chĕm ing kong têa ê. Pôa Nguyên Như Cường, Ngế xiâm ngăn ‘na hdrê loăng plâi tối tiah kố: Tây Nguyên cho kơpong tơ’lêi hlâu vâ mơnhông mơdêk mâu hdrê loăng pêt  vâ pro kế kâ ngiât lĕm vâ chĕm mơnăn, môi tiah: alâi, pôm loăng.

Vâ tơbriât ƀă mâu hdrê pêt ki ê a kơpong kố thế pro ti lâi vâ mơdêk tơƀrê ‘na cheăng kâ.  Vâ mơjiâng kơpong pêi lo kế tơmeăm hên ai tiô púi vâ châ xúa pro ƀă kơmău kơmok thế mơjiâng tơdroăng tơrŭm pơla kuăn pơlê, khu pêi cheăng tơrŭm, ing mê thăm tơrŭm ƀă khu mơdró uâ pơliê pro ƀă tê tơmeăm pêi lo.