Tơdah ngin tung môi toăng hngêi ki kân rơdâ, krá lĕm, tung tơdroăng ki ai tŭm têk kế tơmeăm, pôa Kră Jăn Ha Sung, ối a thôn R’Chai, cheăm Phú Hội tơring Đức Trọng (Lâm Đồng) hơniâp ro tối ăm ‘nâi, kơnôm hyôh kong prâi tơ’lêi tơtro, yă tê tơmeăm ƀă tơdroăng lăm tê dêi tơmeăm xuân tơniăn mê rơnó krí plâi krui kơxái pơla hdrối kố nah hiăng kum ăm rơpŏng pôa châ dêi lối hrĭng rơtuh liăn.

Tơdrêng amê, kơnôm pêi châ ing 2 ha kơphế, 4 sao kơchâi, prá alâi tŭm hdrê, mê rơpŏng ti xê to châ rĕng tơkâ luâ mâu tơdroăng pá puât xua tơdjâk ing pơreăng COVID-19, mê ối châ kơdĭng dêi hên liăn ki ê vâ po rơdâ túa pêi cheăng kâ.

Tiô pôa Kră Jăn Ha Sung tối ăm ‘nâi, khoh châ chiâng ai mâu tơdroăng mê cho kơnôm ing tơrŭm pêi chiâk pêi deăng ƀă châ tê dêi kế tơmeăm xua khu mơdró kâ hiăng tơkêa, Khu pêi cheăng tơrŭm ki pêi cheăng kâ a tơring ki kố. Pêi lo kế tơmeăm châ tơniăn, liăn ngân xuân pêi châ hên mê Têt hơnăm kố, rơpŏng hngêi tơkŭm ôu kâ rơnó Hơngui, koh tơdah hơnăm nếo ai hên kế tơmeăm, phâi tơtô rơtế ƀă pơlê pơla.

‘’ ‘Na pêi cheăng kâ tâng riân ngăn klêi kơ’nâi tro tâ pơreăng COVID-19 troh nôkố, rơpŏng á pêt tơvât plâi ƀă hăng mê tê châ xo liăn tơniăn, tơdroăng rêh kâ ối xuân hơ’lêh hên tâ. Thăm nếo tung hơnăm 2021 maluâ ai pơreăng tâ tú hên ó, la ing pêi pêt kế tơmeăm kố xuân pêi lo liăn tơniăn. Hdrối nah, vâi krâ hdroâng kuăn ngo pin ôh tá hâi ‘nâi plĕng hên ‘na khoa hok kih thuât, xua mê, tơdroăng pêi cheăng kâ ôh tá lo liăn hên.

Mâu hơnăm achê pơla kố, hriâm tâp ing mâu túa pêi chiâk pêi deăng ing mơngế Xuăn, pakĭng pêi kơphế mê kuăn pơlê ối pêt tơ’nôm kơchâi, prá, alâi tiô túa chiâk deăng ki xúa kơmăi kơmok mê tơdroăng pêi cheăng kâ dêi rơpŏng hngêi hiăng châ mơdêk’’.

Túa pêi pêt kơchâi, reăng, plâi, pôm tiô kơ tơdroăng ki pói vâ rôe, veăng tung mâu túa cheăng ki tơrŭm ki dế châ po rơdâ, djâ cheăng pêi tung pơlê pơla hdroâng kuăn ngo K’Ho a Phú Hội. Dế nôkố, cheăm hiăng ai vâ chê 900 rơpŏng kĭ tơkêa tơrŭm cheăng ƀă mơ’no tê dêi kế tơmeăm ăm khu mơdró, khu pêi cheăng tơrŭm, tung mê, ai vâ chê 300 rơpŏng hdroâng kuăn ngo.

Tơdrêng amê, vâi krâ-nhŏng o kơhnâ khât tung tơdroăng xúa khoa hok kih thuât ‘mot tung pêi chiâk pêi deăng vâ thăm mơnhông tơdroăng pêi cheăng kâ. Tối ‘na tơdroăng ki hơ’lêh dêi pơlê pơla tơná, nâ K’Hoan, mơngế K’Ho a pơlê Chi Rông, cheăm Phú Hội, hơ’muăn tối:

‘’Hdrối nah, vâi krâ-nhŏng o K’Ho hmâ pêi pêt ki hên cho báu klâng môi rơnó ƀă mâu deăng kơphế ki ôh tá dâi, plâi bu iâ, tá hâi ‘nâi xúa khoa hok kih thuât tung pêi chiâk pêi deăng, mê tơdroăng rêh ối dêi vâi krâ-nhŏng o trâm hên xahpá ó ‘nâng. To lâi hơnăm achê pơla kố, kơnôm châ tơnêi têa tŏng kum, po mâu lâm hriâm, hnê ‘na kih thuât mơdâ pêt kế tơmeăm, pơklêp tơkâng kơphế, pêi pêt mâu kơchâi, pôm, prá, alâi, mê tơdroăng rêh ối dêi vâi krâ-nhŏng o thăm rế châ mơnhông tơniăn tâ hdrối nah’’.

Tiô pôa Nguyễn Thành Trung, Kăn phŏ hnê ngăn Vi ƀan cheăm Phú Hội tối, kơnôm khên hơ’lêh túa pêi pêt kế tơmeăm, ki rơkê tung pêi chiâk pêi deăng mê tâng vâ riân rêm hơnăm 1 ngế tung cheăm pêi lo châ lối 270 rơtuh liăn tung 1 ha. Tâi tâng cheăm nôkố, kơxô̆ rơpŏng kơtiê hiăng chu kơdroh bu ối tá hâi châ 1%. Vâ pơtối mơdêk mâu tơdroăng cheăng ki hiăng châ chiâng pêi pro, tung hơnăm 2023, khu pơkuâ hnê ngăn Đảng ƀă khu kăn pơkuâ ngăn kuăn pơlê kô pơtối hnê tơdjâ hơ’lêh túa pêi cheăng kâ, thăm pêi lo hên kế tơmeăm, kế tơmeăm thăm rế kơnâ liăn.

Ki xiâm dêi tơdroăng kố cho hơ’lêh nếo ‘na túa tơmiât cheăng, túa pêi chiâk pêi deăng, hnối ai tơdjâk troh tơdroăng ki tơniăn tơtro ing mơdâ pêt, rak ngăn, krí xo, ‘măn rak, tê mơ’no, kơnôm ing tơdroăng mơnhông pêi cheăng kâ tơdjuôm, malối tung pơlê cheăm kơpong hdroâng kuăn ngo ki iâ mơngế.

Pôa Nguyễn Thành Trung hơ’muăn tối:

‘’Tung la ngiâ ah, ngin kô tơ-uân tăng mâu kơxô̆ liăn vâ mơ’no tŏng kum ăm mâu pơlê cheăm dêi hdroâng kuăn ngo, kơjo kum, xing xoăng tơnêi pêi chiâk deăng, tŏng kum vâi vâ mơnhông pêi cheăng kâ mơnhông rơpŏng hngêi. Ngin cho tíu ki xiâm ối pơla dế vâ kuăn pơlê châ achê, trâm mâ ƀă mâu khu mơdró kâ, tôh pêi cheăng kâ tơkŭm, tơrŭm vâ vâi tí tăng hlê plĕng, hriâm ƀối ing mâu túa cheăng, hriâm tâp túa pêi chiâk pêi deăng hnối tơdjêp troh tơdroăng mơnhông pêi chiâk pêi deăng tiô túa kŏng ngê̆ chal nếo.

Ing mê, ai troăng hơlâ ki hơ’lêh pêi pêt hdrê loăng, thăm mơdêk ki kơnâ dêi kế tơmeăm tung ƀăng tơnêi ki mê, thăm mơdêk pêi lo liăn ngân kum vâi krâ-nhŏng o thăm rế pêi lo hên kế tơmeăm’’.

Phú Hội dế kố ai 6 rơpâu 700 ha tơnêi pêi chiâk pêi deăng, tung mê, ai 3 rơpâu 680 ha tơnêi pêi chiâk deăng tiô túa kŏng ngê̆ chal nếo. Kố cho tơdroăng ki kal vâ cheăm pơtối po rơdâ tơ’nôm túa cheăng ki tơrŭm pêi chiâk pêi deăng pơla kuăn pơlê ƀă khu mơdró kâ, rak krá tơniăn tơmeăm pêi lo ing chiâk deăng, thăm mơdêk pêi lo hên kế tơmeăm, liăn ngân, ƀă mơnhông tuăn mơno dêi kuăn pơlê châ po rơdâ, hlê plĕng rế rơdâ.