Hdrối nah, tơmeăm Nem Chu Mán Bến En a tơring Như Thanh, kong pơlê Thanh Hóa ki hên xua mâu tíu tê tung tơring tê ăm mơngế rôe ôu kâ. Sap ing châ mơnhên ai inâi, tơdroăng dâi lĕm Nem chu mán Bến En châ kơchơ tê mơdró loi tơngah rôe kâ, kok rôe hên tâ. Vâ pro chiâng tơmeăm kâ Nem kố, vâi krâ kuăn pơlê a kố rah hơ’nêh chu mơngế Mán (chu prăng, chu ki ôh tá kân), cho hdrê chu hơ’neh xú kơhiâm dêi kơpong kong ngo.

Mơjiâng tíu mơhno kô kum mơjiâng ki kơnâ nếo ăm kơphế Việt

Hơ’neh pro Nem châ rah xo cho hơ’neh pôa. a kơxah, kơtêi chiê rơtăng. Tơdroăng kố xuân kum mâu vâi krâ hdroâng kuăn ngo păn chu Mán păn hên tâ ƀă rế hía rế mơnhông mơdêk. Ƀă khu chu Mán dâng 100 to, rơpŏng jâ Nguyễn Thị Quy, cheăm Phượng Nghi ing môi rơpŏng kơtiê hiăng pêi lo liăn tơniăn vâ chê 200 rơtuh liăn/hơnăm.

Jâ Nguyễn Thị Quy tối ăm ‘nâi:

“Rêm hơnăm xuân ai tíu tê mê á tê châ hên tâ xua mê xuân păn hên’’.

Drêng ai hên hĭn tơmeăm ki má môi châ mơnhên hơlŏng OCOP tung kơchơ tê mơdró, mơngế ki păn, mơngế pêt mơjiâng tơmeăm, păn mơnăn, mâu khu tê mơdró ôh tá ai troăng ki lâi xếo thế mơ-eăm pơ’lêh, mơdêk ki dâi lĕm tơmeăm khoăng. Ai tiah mê tíu ối dêi mâu tơmeăm ki má môi kơpong vâi krâ hdroâng kuăn ngo nếo châ rak, mơdêk châ tơƀrê ivá tơbriât tung kơchơ tê mơdró. Tơdroăng tơkĭm pơ’lêh pro lĕm, dâi lĕm tơmeăm hiăng kum mâu khu tê mơdró mơjiâng pro mâu tơmeăm ki má môi a kong ngo rế hía rế po rơdâ tíu ki rôe, mơdêk pêi lo liăn rêm hơnăm.

Jâ Phạm Hồng Hà, Ngế tơrŭm pêt mơjiâng tơmeăm pêi lo ing chiâk deăng Nậm Lửu, tơring Trạm Tấu, kong pơlê Yên Bái tối ăm ‘nâi:

“Nah ngin pêt rêm hơnăm cho iâ tê, tơprâ tơprŭng laga nôkố ngin ai hên tơmeăm OCOP châ pêi lo liăn 200%. Khu tê mơdró ki lăm rôe dêi á nôkố dế tê ăm mâu kŏng ti lơ mâu tíu mơdró tơmeăm krúa lĕm a Hà Nội, vâi hâk tơmeăm kơpong kong ngo a ngin kố. Xua tơmeăm ngin cho tơmeăm hưh cơ, ôh tá xúa pơkeăng kơdê ôa hdrong’’.

A kong pơlê Lâm Đồng, vâi krâ hdroâng kuăn ngo xuân dế mơjiâng pro hên tơmeăm ki má môi, ai ivá tơdjâk hluâ râ kong pơlê. Đơn Dương cho môi tung 2 tơring ai ƀăng pêt kơchâi drêh tê mơdró kân má môi kong pơlê Lâm Đồng. Kơnôm xúa kŏng ngê̆ rơxông nếo, hên tơmeăm pêi lo ing chiâk deăng dêi tơring hiăng châ tơmeăm pêi lo ing chiâk deăng krúa lĕm, tiô pơkâ VietGAP xuân môi tiah châ ai inâi ‘’Đà Lạt chiâng ing tơnêi ki lĕm’’.

Mơhé thế tiô mâu pơkâ kơtăng ƀă pro pá dêi mơngế ki rôe, laga, kố cho hlá mơ-éa mơnhên ăm ki loi tơngah ƀă ki dâi lĕm dêi tơmeăm pêi lo ing chiâk deăng. Kố xuân cho troăng prôk vâ mơngế pêt pơtối mơjiâng tơmeăm kân ƀă  ton xŏn tâ.

Pôa Nguyễn Đình Tịnh, Kăn phŏ hnê ngăn Vi-ƀan tơring Đơn Dương, kong pơlê Lâm Đồng tối ăm ‘nâi:

“Sap hơnăm 2019 troh nôkố, tâi tâng kơxô̆ liăn tơnêi têa mơ’no liăn cheăng dâng 17 rơtal liăn, kuăn pơlê mung lối 20 rơtal liăn, pêi pro hên troăng pêi tiô túa ‘na rơkê môi tiah: tôh rơkê, rak ngăn ƀă rơvât phon rơkê ƀă xúa mâu kŏng ngê̆ 4.0. A Đơn Dương, nôkố châ xúa tơdjuôm inâi dêi kong pơlê Lâm Đồng mơjiâng cho Đà Lạt chiâng ing tơnêi lĕm xua mê xuân tơ’lêi hlâu tung tơdroăng mơđah tơbleăng inâi xuân môi tiah tơmeăm dêi Đơn Dương lo mâu kong pơlê achê’’.

Đi đo pro lĕm tâ nếo tơmeăm, xúa khoa hok kih thuât tung pêt mơjiâng tơmeăm, uâ mơdiê, mâu tơmeăm ki má môi kơpong vâi krâ hdroâng kuăn ngo đi đo châ ối tung khu ki má môi tung lâp tơnêi têa. Tiô mâu ngế rơkê, vâ to a ‘ngêi tâ mê mâu tơmeăm dêi vâi krâ hdroâng kuăn ngo xuân thế tơxâng troăng xúa lĕm, tơniăn, dâi khât, tơxâng tiô troăng xúa nếo. Kố cho ki pro pá ƀă pơkâ dêi kơchơ mơdró.

Xua mê, mơjiâng inâi thế pơxiâm ƀă tơdroăng khôi túa rơkê, ôh tá xê to khôi túa mê pơxiâm ing mơngế gâk kring, ing vâi krâ hdroâng kuăn ngo vâi veăng tung pêt mơjiâng tơmeăm khoăng, ing mâu khu râ kăn pơkuâ ƀă hía hé thế mơhno tơdroăng mơnhông mơdêk krá tơniăn tâi tâng. Tơdrêng amê, vâ djâ tơmeăm kong ngo troh ƀă mơngế rôe xúa kal xua ó rơdêi kŏng ngê̆ kơmăi kơmok, tê mơdró điê̆n tưh lâp tơkăng kong.