Vâ mơnhông pêt krá tơniăn, Khu xiâm ngăn chiâk deăng ƀă Mơnhông thôn pơlê hiăng kĭ tơdroăng tơkêa Mơnhông pêt loăng plâi kâ ki xiâm troh hơnăm 2025 ƀă 2030. Tung mê, mơ-eăm troh hơnăm 2025 lâp tơnêi têa ai 1,2 rơtuh ha tơnêi pêt loăng plâi kâ, plâi gá châ 14 rơtuh tâ̆n. 30% ƀăng tơnêi athế xúa tơdroăng pêi pro pêt ki tro, ki kơnía ‘na tơdroăng ki vâ tê ngi kong têa ê châ 5 rơtal USD.

Rôh hôp hiăng tơpui tối leăng, mơ’no tối mâu troăng hơlâ, troăng tơmiât ƀă tơdroăng ki pêt plâi sầu riêng ƀă krui kơxái tung la ngiâ tơtro ƀă kơchơ mơdró tung tơnêi têa, tung kơpong ƀă a kong têa ê. Ƀă mâu khu mơdró kâ ki vâ tê ngi kong têa ê, Viê̆n hriăn ngăn, ƀă mâu kong pơlê tung kơpong peăng Hdroh athế pêi pro tơrŭm pơkí vâ mơnhông pêt krá ton loăng plâi kâ.

Séa ngăn tơtro ‘na hdrê, ví ‘na tơdroăng ki bro ăm kuăn pơlê pêi chiâk, ngế ki pêt tro lŭp. Ki xiâm ngăn pêt kế tơmeăm xuân hnê mơhnhôk tơdroăng “mơdêk rĕng” ‘na ƀăng tơnêi, krui kơxái ƀă malối cho ƀă hdrê loăng plâi sầu riêng, mơni tro tơdjâk troh túa pơkâ pêt, tơdroăng pơkâ hdrê loăng pêt tiô pơkâ pêi chiâk deăng dêi kong pơlê. Thăm nếo, ai tơdroăng ki kuăn pơlê ko tah loăng pêt ki ton hơnăm ki ê môi tiah kơphế, tiu ƀă hên ki ê hơ’lêh pêt sầu riêng, krui kơxái.