Hâi lơ 9/6, a Dak Lak hiăng po Roh hôp mơjiâng pro, hbru ƀă pơkuâ mah kơxô̆ kơpong pêt, tâ ‘măn tơmeăm ing chiâk deăng vâ mơ’no tê ngi kong ê. Mâu ngế ki châ hnê tối ‘na túa pêi, mơjiâng bro, ăm mah kơxô̆ kơpong pêt, tâ tơmeăm chiâk deăng; hnê tối mâu tơdroăng pơkâ tiô túa ki seá mơnhên ngăn tơmeăm pêt i nhên, maluâ ƀă plâi sầu riêng, pôm ló, priât ki mơ’no tê ing Việt Nam troh a kong têa Sinuâ.

Tơdrêng amê, mâu ngế ki hriâm châ hriâm tâp ‘na kih thuât xúa, choi phon ki tơƀrê, tơniăn ăm loăng plâi sầu riêng; hnê mơhno túa pơkuâ ngăn vâ mơdât oâ hdrong ki kâ ‘nhê hdrê loăng, maluâ tơdroăng ki xúa pơkeăng xôh kơdê oâ hdrong athế tơniăn. Dak Lak ai hên tơmeăm pêi lo ing chiâk deăng ki châ mơ’no tê kơnâ liăn.

Ki rơhêng vâ tối klêi kơ’nâi Khu xiâm ngăn ‘na chiâk deăng ƀă mơnhông thôn pơlê hiăng xing xoăng hnoăng cheăng pơkuâ ƀă mơjiâng mah kơxô̆ kơpong pêt, tơnêi tíu ki pêt plâi sầu riêng châ mơnhên tối tro tiô tơdroăng pơkâ vâ mơ’no tê ƀă chêh bro hồ sơ chêh inâi mah kơxô̆ kơpong pêt ki  po rơdâ rĕng tơnêi tíu pêt.