Sap ing hơnăm 2017 nah troh nôkố, Viê̆n Wasi ƀă Kŏng ti tơlo liăn phon rơvât Bình Điền hiăng pêi pro châ 23 tơdroăng ki hriăn ngăn, séa mơnúa ngăn ƀă 28 túa pơkâ mơđah tơbleăng pêi hnoăng cheăng krá tơniăn, ki lĕm dêi phon rơvât, ƀă 5 túa hdrê loăng pêt ki xiâm dêi Tây Nguyên, mê cho: kơphế, tiu, sầu riêng, ƀơr, kơchâi ƀă alâi. Ing mâu túa pơkâ mơđah kố, kuăn pơkê ki pêi chiâk deăng hiăng ‘nâi nhên túa pơkâ, túa ki pêt kế tơmeăm tung chiâk deăng kơdĭng ƀă hơ’lêh kong prâi tơnêi tíu.

Ing mê, veăng kum mơdêk ki tơƀrê ‘na cheăng kâ, pro hơ’lêh hên mâu tơdroăng ki hriăn ngăn ƀă hnê tối ‘na klêi kơ’nâi hriăn ngăn dêi viê̆n Wasi troh kuăn pơlê ki pêi chiâk ƀă hên ki ê. A rôh hôp, Viê̆n Wasi, Kŏng ti tơlo liăn phon rơvât Bình Điền, Tíu xiâm hnê mơhnhôk pêi chiâk deăng tơnêi têa hiăng kĭ tơkêa tơrŭm mơnhông tơdroăng “Pêt kơphế rơkê hmâ ƀă kong prâi a kơpong Tây Nguyên” troh hơnăm 2025.

Ki xiâm cho hnê châ iâ hlái ai 1 rơpâu ngế kuăn pơlê ki pêi chiâk tung rêm to kong pơlê Tây Nguyên ‘na ki rơkê tung pêt kơphế krá tơniăn; Mơjiâng châ tơdroăng ki pêt kơphế túa ki rơkê xúa ăm rêm kong pơlê; Hriăn ngăn tơdroăng ki mơnhông ‘na rơvât phon tơtro ƀă tơnêi, kum pêt kơphế krá ton, mơdêk ki kơnía, mơdêk pêi lo liăn ăm kuăn pơlê ƀă khu mơdró kâ ‘na kơphế.