Dế krí 1,5 ha pía kái ki rơpŏng mung tơnêi vâ pêt a pơlê kân Phú Túc, tơring Krông Pa, pôa Nguyễn Văn Kính (troh ing kong pơlê Phú Yên) khéa kho xua pía kái hơnăm kố pêi lo châ iâ. Pôa tối, xuân a tơnêi kố, rơnó hdrối, kong prâi tơ’lêi hlâu, rêm pŭm pía kái kô hngăm troh 8 kilô laga hơnăm kố pía kái kŭn hiâ hên tâ:

‘’Á pêi pêt pía kái môi chât to lâi hơnăm kố, ai hơnăm ki châ ai hơnăm ki hía, krê hơnăm kố tro lŭp. Vâi krâ kuăn pơlê pêt pía kái a kố ki hên mơ’no liăn mung ing hngêi arak liăn, vâi krâ kuăn pơlê xuân mơ-eăm troh hơnăm la ngiâ kô vêh pêi nếo, tâng châ hên yă kơnâ mê chêl tâi chĕn’’.

Ing pơlê kong krâm An Nhơn, kong pơlê Bình Định lăm mung 3 ha tơnêi a cheăm Ia Mlăh, tơring Krông Pa, kong pơlê Gia Lai vâ pêt pía kái, ngoh Nguyễn Nhật Tân khéa kho tối, mơ’no liăn pêt 1 ha pía kái sap ing apoăng troh drêng krí xo dâng 150 rơtuh liăn. Rơnó kố kong mêi hên, pía kái xông kân ôh tá tơdâng tơ’mô xua mê pêi lo bu châ sap ing 30 – 34 tâ̆n/ha, yă rôe sap ing 3 troh 3,5 rơpâu liăn/môi kilô. Tiô riên, rơnó kố ngoh Tân lŭp dâng 60 rơtuh liăn.

‘’Hơnăm kố kong prâi ôh tá tro xua mê pêi lo ôh tá châ môi tiah mâu hơnăm hdrối, hdrối nah 1 ha rôe châ dâng 40 tâ̆n pía kái, hơnăm kố kong tô iâ xua mê pía kái ôh tá lĕm tro lŭp, 1 ha lŭp dâng môi chât to lâi troh péa chât rơtuh’’.

Nôkố, lâp tơring Krông Pa ai lối 1.000 ha pía kái ƀă pêi lo vâ châ 40.000 tâ̆n. Pôa Võ Ngọc Châu – Kăn pơkuâ Ƀơrô pêi chiâk deăng ƀă mơnhông mơdêk thôn pơlê tơring Krông Pa tối ăm ‘nâi, mê cho tâi tâng ƀăng deăng pía kái cho kuăn pơlê a tíu ê troh mung tơnêi pêt, ôh tá ối tung pơkâ pêi dêi tơring. Pakĭng mê, mơngế rôe troh rôe pía kái tiô troăng hmâng vâ, ôh tá ai kĭ tơkêa xua mê khu râ kăn pơkuâ ƀă kơvâ cheăng ôh tá chiâng vâ hnê mơhno troăng prôk, tŏng kum ăm kuăn pơlê pêi chiâk deăng.

‘’Hdrối mê, kong mêi đi đo xua mê pía kái tơkrŭn hlá xua mê pêi lo ôh tá châ tơ-ƀrê mê kuăn pơlê pêi lo ôh tá châ hên. Ki hên kuăn pơlê a Bình Định ƀă Phú Yên to mung tơnêi tung tơring Kông Pa, ôh tá xê to kuăn pơlê tung pơlê pêt mơjiâng xua mê pá tung tơdroăng mơhnhôk mâu rơpŏng xua vâi bu to lăm mung tơnêi pêt xua mê pơkuâ pá puât’’.