Tơdroăng tơkêa bro ECO – HOUSE châ 3 ngế sinh viên ối tung 3 chuyên nganh phá tơ-ê dêi rơpó cho Hồ Thanh Huy, pơkuâ khu, sinh viên hơnăm má 4 khoa Kŏng nghê̆ điê̆n tưh, Lê Hoàng Minh Châu – hơnăm má 4 khoa Quản trị kinh doanh ƀă Trần Thị Trâm (hơnăm má 3 khoa Thương mại – Du Lịch) ing hnê mơhno dêi thak sih - thái Duy Tùng (giảng viên khoa Tài chính ngân hàng) pêi pro.

Tơngah xêh môi tiah 3 kơvâ hriâm ôh tá tơdjâk dêi pó, laga 3 ngế sinh viên hiăng vêh tơkŭm vâ mơjiâng môi tơdroăng tơkêa bro pơxiâm tăng cheăng pêi tung kơvâ pêi chiâk deăng, loăng, ká xi xŏng.

Tơmeăm dêi khu cho kơmăi kŭn krâ ‘măn a kơdrum hlối xúa phân mêm tiê ing hơngế tung phôn râng kŏng, tung mê ai pơkuâ mâu tơdroăng têk chu ki kal môi tiah ki hyôh tô, hngiâm kơchoh, kơxô̆ têa, trếo piê kơhiâm tung tơnêi, trếo N-P-K, đô̆ pH, ƀă hiá hé. Ing mê vâ ‘nâi tơdroăng ôh tá tá tơniăn ƀă hbrâ troăng vâ pêi teăm tơdrêng, kơdroh tro lŭp ăm kuăn pơlê pêi chiâk deăng, hbrâ ví kong prâi hơ’lêh, mơdêk pêi lo ƀă kơdĭng on tơhrik, têa, ƀă hía hé.

Sinh viên Hồ Thanh Huy tối ăm ‘nâi, mâu ngế pêi kơdrum, kuăn pơlê pêi chiâk deăng nôkố dế châ tơbleăng mâu tơmeăm ai xiâm kối ing Sinuâ, ôh tá ki vâ rơnêu ƀă lĕm ƀă mơngế pêi chiâk deăng. Xua mê, khu vâi o hiăng mơjiâng pro tơmeăm tiê tơ’lêi hlâu, achê kơbố xuân chiâng xúa. Mâu pú hmâ xuân hlê plĕng tơná kal ‘nâi tơdroăng châ hriâm vâ xúa kŏng ngê̆ tung pêi chiâk deăng, kum vâi krâ kuăn pơlê mơdêk ki kơnâ tung pêi chiâk eăng, ví tơdroăng châ hên tơmeăm, yă chu rơpâ, hjip yă dêi mơngế rôe tơmeăm. Thanh Huy hơ’muăn:

‘’Ngin o cho mơngế ing ngế pêi chiâk deăng, kot mâ ƀă xông kân a peăng mâ hâi luô, ngin ôh tá pêi chiâk deăng laga ngin o hlê plĕng tơdroăng mê, ƀă hlê troăng pêi chiâk deăng ti lâi. Pakĭng mê, á ối ai mâu pú hmâ hriâm pêi chiâk deăng. Xua mê ngin o prôk troăng ti tăng roh tơ’lêi a pơlê dêi tơná’’.

Tiô tung tơdroăng pêt tơmeăm khoăng, ECO –HOUSE kô pơkâ mơ’no troăng pêi ‘’tơmeăm pêi lo ing chiâk deăng kruá lĕm ôh tá xâu ôh tá tơdrăng’’ tiô kŏng nghê̆ nếo IoAT (internet rơpâu tơmeăm khoăng) ƀă ai hên rah xo. Ki nhên tơdroăng tơkêa bro bă pơkâ pêi ‘’Má môi cho têa, má péa cho phon, má pái cho kơhnâ’’ tơdâng cho pêi pro tơdroăng ‘na têa tôh, tôh kơdĭng têa, séa ngăn trếo piê kơhiâm tung tơnêi lơ tâi tâng ăm loăng plâi pêt mơjiâng ai rêm kơlo yă tơtro ƀă liăn ngân ƀă tơdroăng kal vâ dêi mơngế pêi kơdrum.

Sinh viên Lê Hoàng Minh Châu ối tung khu tối, mơngế vâ xúa tơmeăm kố cho vâi krâ kuăn pơlê pêi chiâk deăng ƀă mâu khu tơrŭm cheăng, a ngiâ cho mơnúa ƀă mâu loăng plâi môi tiah plâi sầu riêng, plâi tơneăng, krui ƀŏng a Tiền Giang, Bến Tre ƀă kơdrum reăng rĭng a Vũng Tàu. Tung tơdroăng pêi pro, vâi xuân trâm hên pá puât môi tiah tá hâi plĕng hên ‘na tơdroăng kal vâ tung kơchơ mơdró, tá hâi hlê plĕng trâu rêm loăng plâi, xua mê vâi xuân ti tăng plĕng ‘na tơdroăng pêt mơjiâng vâ pơkâ mơ’no troăng pêi lĕm má môi:

‘’Nôkố vâi krâ kuăn pơlê dế ôh tá khên vâ xúa, mơhé tơmiât vâ xúa hiăng ai, laga tơdroăng pơhlêh tâi tâng ing kế ki ton troh kế ki nếo mê vâi krâ kuăn pơlê xâu. Ing mê ngin o pơkâ mơ’no mâu troăng pêi tiô mâu tơdroăng ki ton vâ mơjiâng tơ’nôm ôh tá xut tah lôi tâi tâng mâu kế tơmeăm ki ton’’.

Tiô Thak sih Thái Duy Tùng, giảng viên hnê mơhno đề tài, ki phá tơ-ê dêi tơdroăng tơkêa bro kố tâng pơchông ƀă hên đề tài ki ê mê cho tơdroăng mâu pú hmâ sinh viên hiăng châ ‘nâi ƀă tơdroăng ki ai khâu kố vâ mơnúa a rêm tơnêi, ti tăng plĕng tơdroăng kal vâ, khôi túa pêt mơjiâng tơmeăm dêi kuăn pơlê.

Mơhé mâu ngế tung khu ôh tá ‘nâi hên ‘na pêi chiâk deăng laga ƀă ki tơ’lêi hlâu ing mơngế peăng mâ hâi Luô, hlối hriâm hên tơdroăng ‘na pêi chiâk deăng ƀă tá tơdroăng tŏng kum dêi mâu sinh viên dế hriâm kơvâ pêi chiâk deăng a Đăi hok Tiền Giang, mâu pú hmâ hiăng châ tơƀrê hên môi tiah hâi kố:

‘’Tơdroăng nôkố drêng ti tăng mơngế ki vâ rôe dế trâm pá iâ xua tá hâi ai inâ, laga mâu pú hmâ xuân ai hên tơrŭm ƀă mâu kơdrum pêt mơjiâng tơmeăm, pói tơngah tung la ngiâ mâu pú hmâ kô chôa ‘lâng châ achê ƀă kơchơ mơdró tâ’’.

Ƀă tơdroăng tơkêa bro kố, khu pói vâ mơjiâng hên ƀă tăng châ liăn ing hên tíu ôh tá xê to ing tơmeăm mê cho hơngế tâ nếo ối hnê mơhno mơjiâng pro ƀă tối ăm troăng pêi, ing pêi chiâk deăng ki pêi lo ƀă mâu phon pro sinh hok.

Pói vâ dêi khu cho mơdêk ki kơnâ tơmeăm pêi lo ing chiâk deăng Việt, tối tơbleăng mâu kơxô̆ kơlo têk chu dêi tơdroăng pêt dêi mơngế ki rôe tơmeăm pêt alâi, tơnêi tơníu môi tiah lâi, hôm ối ai trếo pơkeăng tung tơnêi lơ ôh. Sinh viên Hồ Thanh Huy tối ăm ‘nâi:

‘’Ngin o tơpui tối phiu ro ƀă dêi rơpó cho tơná cho mơngế tê kơchâi drêh, ngin o tê tơmeăm pêi lo ing chiâk deăng ƀă kŏng ngê̆ vâ tŏng kum tơdroăng tê tơmeăm pêi lo ing chiâk deăng kố, pói tơngah kô châ tơƀrê ƀă kơchơ mơdró kô tơdah xo’’.

Tiê̆n sih Nguyễn Quốc Cường, Kăn phŏ kơvâ Thương mại – Du Lịch hngêi trung Đăi hok Kŏng nghiêp Pơlê kong kân Hồ Chí Minh mơnhên, kô cho đề tài lĕm tro kum kuăn pơlê pêt mơjiâng tơmeăm lĕm tro tâ tung kơpong dêi tơná ƀă rak vế kong prâi, kơdroh tơdroăng xúa phon rơvât, pơkeăng kơdê ôa hdrong:

‘’ ‘Na peăng khoa, kơvâ kô hnê mơhno ‘na pêi cheăng kô pêi tâi ivá tơná vâ mâu pú pơtối pêi pro tơdroăng tơkêa bro kố chiâng khu mơdró spin-off djâ ki kơnâ păng ‘nâng ăm pơlê pơla, ki rơhêng vâ tối cho pơlê pơla mơnhông mơdêk pêi chiâk deăng tiô hnê mơhno kih thuât rơxông nếo’’.

Mâu tơdroăng tơkêa bro pơxiâm tăng cheăng dêi hok tro, sinh viên ‘’rêh’’ ƀă mơnhông mơdêk tâ mê nếo, mâu pú xuân kal tơdroăng ki tơdah, môi tuăn ƀă tŏng kum dêi ôh tá xê to hngêi trung mê cho tâi tâng pơlê pơla. Ing mê kô chiâng pro hên tâ mê nếo mâu đề tài pơxiâm tăng cheăng pêi kum ăm tơdroăng mơnhông mơdêk dêi tơnêi têa.