Tơkŭm 5 tơdroăng tơkêa ‘No liăn bro hngêi trăng, troăng klông kum khu pêi cheăng tơrŭm mơnhông kơpong pêt kơphế dâi lĕm a kơpong Tây Nguyên mê cho: Mơjiâng bro troăng prôk tung thôn pơlê tơdjêp troh kơpong pêt kơphế a Gia Lai, Dak Lak; Mơjiâng bro nếo 3 to hnôu ‘măn kơphế ăm 3 khu pêi cheăng tơrŭm  a kong pơlê Dak Lak, tâi tâng ƀăng tơnêi bro lối 1000 met kakarê.

Bro nếo 2 to hnôu tơkŭm hngêi mơđah tơbleăng kế tơmeăm kơphế ăm khu pêi cheăng tơrŭm a kong pơlê Gia Lai – Dak Lak ƀă ƀăng tơnêi 158 met kakarê tung môi toăng hngêi. Tâi tâng kơlo liăn ‘no bro 5 to tơdroăng kố dâng 80 rơtal. Ki xiâm ‘no liăn kố cho vâ mơjiâng kơpong pêt kơphế túa kế tơmeăm tơkŭm, tiô chal nếo, vâ mơdêk rĕng, tơƀrê ƀă krá ton tung pơla vêh pơkâ pêi kơvâ pêi chiâk deăng, mơjiâng thôn pơlê nếo dêi kong pơlê Gia Lai, Dak Lak; mơnhông ƀă mơdêk hnoăng cheăng, tơƀrê tơdroăng cheăng dêi khu pêi cheăng tơrŭm pêi chiâk deăng tung tơdroăng ki kơnía kơphế kum ăm tơdroăng uâ pơliê ƀă tê ngi kong têa ê, mơdêk pêi lo liăn veăng kum hơ’lêh tơdroăng rêh ối dêi kuăn pơlê a kong pơlê.