Tung dế kơdrum plâi tô mat to nhâ ngiât laga xuân ối plâi kơpâu hên, nâ Nguyễn Thị Loan, ối a cheăm Dak Ha, tơring Dak Glong, kŏng dế rĕng rah krí mâu plâi ki tum. Nâ phiu ro, sap ing tơrŭm pêt kơchâi plâi pôm hưh cơ rơtế tơrŭm cheăng, rơpŏng nâ hiăng pêi lo liăn tơniăn:

“Hdrối nah, tíu tê pá puât xua djâ a kơchơ tê mê kơchâi drêh cho rơpâ liăn. Nôkố hiăng ai khu tơrŭm cheăng tê ăm pin, pin bu kal pêt mơjiâng tơmeăm ki lĕm má môi mê pin kô ai liăn rơkê ƀă môi tiah mê pêt mơjiâng’’.

Pôa Đặng Ngọc Hương, Kăn pơkuâ khu tơrŭm cheăng pêi chiâk deăng Dak Ha, tơring Dak Glong, tối ăm ‘nâi, tíu cheăng dế tơrŭmƀă vâ chê 100 ngế kuăn pơlê pêi chiâk deăng pêt tung kơpong lối 300 ha. Tơmeăm kơchâi drêh plâi pôm hưh cơ pêt mơjiâng to lâi pơrá châ pú hmâ ki rôe tơmeăm ing Pơlê kong kân Hồ Chí Minh rôe tâi tâng.

Châ tơƀrê tiah mê ahdrối cho ing tơdroăng tơrŭm krá tơniăn ƀă kuăn pơlê pêi chiâk deăng vâ pêt mơjiâng mâu tơmeăm ki dâi lĕm:

“Ki kal má môi cho thế tơrŭm ƀă dêi pó, ing pơtâng tối mơhnhôk vâ mơjiâng châ tơdroăng tơrŭm, mơjiâng châ khu pú hên rŭm môi tuăn mê nếo chiâng mơnhông rơdêi’’.

Xuân tiô troăng tơdjêp krá tơniăn pêt mơjiâng tơmeăm khoăng pêi lo ing chiâk deăng tiô troăng tơmeăm khoăng, tơrŭm cheăng Thịnh Phát, a cheăm Quảng Sơn, tơring Dak Glong, hiăng ai mâu tơmeăm tơniăn ăm mâu tơmeăm kơchâi drêh, plâi pôm, ki rơhêng vâ tối hơpê thảo.

Jâ Nguyễn Thị Toản, Kăn pơkuâ Khu tơrŭm cheăng, tối ăm ‘nâi:

‘’Nôkố ngin dế tơrŭm ƀă môi kŏng ti tơmeăm kâ dêi Việt Nam, cho pêt mơjiâng kơchâi hơpê thảo vâ pro kim-chi Hàn Quốc a hngêi kơmăi a Long An ƀă a Đức Trọng (Lâm Đồng). Nếo achê kố ngin xuân kĭ tơkêa tơ’nôm môi kŏng ti a Nam Nung nếo. Mê rêm hâi cho kuăn pơlê xuân pơcháu kơchâi hơpê thảo má môi cho ‘na Long An, má péa cho ‘na Đức Trọng ƀă má pái cho rôe tơdrêng amê’’.

Nôkố lâp kong pơlê Dak Nông hiăng ai 65 tíu tơdjêp pêt mơjiâng, tê tơmeăm pêi lo ing chiâk deăng ƀă dâng 10.000 rơpŏng kuăn pơlê veăng. Kố cho kơxô̆ kŭn tâng pơchông ƀă tơdroăng ki ai khât nôkố kơvâ pêi chiâk deăng kong pơlê kố. Pôa Phạm Tuấn Anh, Kăn pơkuâ Khu pơkuâ ‘na pêi chiâk deăng mơnhông mơdêk thôn pơlê Dak Nông tối, kong pơlê ai 4 kơvâ ki xiâm ‘na loăng plâi ton hâi, tung mê, kơphế ƀă tiu ai ƀăng deăng, pêi lo châ hên má môi a kơpong Tây Nguyên.

Pakĭng mê cho mâu tơmeăm ki ai ivá mơnhông ƀă tơ’lêi hlâu ‘na plâi kâ tŭm túa (dâng 15.000 ha mê cho phâi sầu riêng, ƀơr, krui kơxái, plâi nong, mắc ca...), mâu kơchâi drêh, plâi pôm... (ai lối 15.000 ha).

Ti tăng kơchơ tê ăm tơmeăm pêi lo ing chiâk deăng, mâu khu cheăng, kơvâ cheăng, kong pơlê a Dak Nông hiăng hên xôh séa ngăn troăng rôe tê a mâu kơchơ ki xiâm, mâu kơchơ kân siêu thĭ kân a Pơlê kong kân Hồ Chí Minh; tơkŭm po hneăng hôp tơpui tơno vâ mâu khu tê mơdró rơtế kuăn pơlê pêi chiâk deăng, tơrŭm cheăng tối ăm dêi pó tơdroăng, ti tăng rơkong tơpui tơdjuôm; krếo khu tê mơdró mot mơ’no liăn cheăng ing tíu uâ mơdiê.

Pôa Phạm Tuấn Anh, tối ăm ‘nâi, kong pơlê dế thăm pêi pro rơdêi mơnhông cheăng kâ khu pú hên vâ tơdjêp kuăn pơlê pêi chiâk deăng mơjiâng mâu kơpong pêt hên, mơdêk ki dâi lĕm tơmeăm, chôa ‘lâng mơjiâng tơdroăng pêt mơjiâng tơmeăm pêi lo ing chiâk deăng.

“Kơvâ pêi chiâk deăng ngin kô potối mơjiâng mâu kơpong pêt tơmeăm, tung hơnăm kố cho tơkŭm mơhno ăm kơphế xua kố cho loăng plâi pêi lo liăn ki xiâm, kơ’nâi mê kô pêi pêt mojiâng mâu kơvâ tơmeăm ki ê. Ƀă rêm kơpong pêt kô mơjiâng mâu khu tơrŭm cheăng vâ mơjiâng xiâm kối tơdjêp ƀă mâu khu tê mơdró pa kong. Ƀă vâi cho khu ki tŏng kum kuăn pơlê pêi chiâk deăng tung mâu tơdroăng tơkŭm po pêt mơjiâng, tơdjêp tê, tá tơdroăng mung liăn’’.

Kong pơlê Dak Nông nôkố ai 3 khu tơrŭm cheăng, 193 khu tơrŭm pêi chiâk deăng ƀă hrĭng tôh tơrŭm cheăng, kơdrum pêt tung kơvâ kố. Rơtế ƀă tơdroăng chôa ‘lâng tơxâng mâu tơdroăng pơkâ vâ tơdjêp pêt mơjiâng tiô troăng pêi, Dak Nông xuân dế tơmiât troh mơnhông pêi chiâk deăng hên ki kơnâ, ƀă troăng pêi kơphế, plâi kâ tơdjêp ôm hyô, troh lăm ngăn ƀă hía hé.

Kố cho mâu troăng prôk ki tro vâ mơnhông pêi chiâk deăng cho môi tung 3 ki xiâm cheăng kâ dêi kong pơlê Dak Nông tiô Pơkâ hneăng hôp Đảng ƀô̆ kong pơlê hiăng pơkâ mơ’no ăm hneăng la ngiâ.