Tiô Tíu xiâm mơhnhôk pêi chiâk deăng tơnêi têa, tơdroăng tơkêa bro mơnúa ‘’Mơdêk ki châ tơƀrê tơdroăng mơhnhôk pêi chiâk deăng tiô tơdroăng pro tŭm tâi tâng troăng tôh mơhnhôk pêi chiâk deăng pơlê pơla’’ châ tíu xiâm pêi pro hơnăm 2021, a 13 kong pơlê ối tung 5 kơpong pêt kơphế hên. Châ tơƀrê, hiăng mơjiâng châ 26 tôh mơhnhôk pêi chiâk deăng pơlê pơla, tung mê ai 8 tôh a Tây Nguyên. Klêi kơ’nâi vâ chê 1 hơnăm pêi cheăng, mâu tôh mơhnhôk pêi chiâk deăng pơlê pơla hiăng mơnhông mơdêk hnoăng dêi tơná tung mơjiâng kơpong pêt kơphế krá tơniăn, hnê khoa hok kih thuât, kŏng ngê̆ troh kuăn pơlê pêi chiâk deăng, veăng vêh tơkŭm po pêt mơjiâng tơmeăm, tơ’nôm tơdroăng ki rơkê cheăng kâ kơchơ tê mơdró teăng tơdroăng la ngiâ tơmiât pêt mơjiâng tơmeăm.

Mâu kăn teăng mâ hiăng pơkâ thế mâu troăng vâ mơdêk châ tơƀrê tơdroăng pêi cheăng dêi tôh, môi tiah thăm pêi pro tung mơhnhôk pêi chiâk deăng, Tíu xiâm mơhnhôk pêi chiâk deăng tơnêi têa pơtối châ tơkŭm po mâu lâm hnê mơhno mơdêk ivá ăm mâu khu tơrŭm cheăng dêi tôh mơhnhôk pêi chiâk deăng pơlê pơla, ki má lối cho ‘na tơdroăng xiâm tơdjâk troh cheăng kâ khu pú hên, mơnhông mơdêk khu tơrŭm cheăng, tơdjêp ki kơnâ ƀă pơ’lêh pêi cheăng xúa kơmăi kơmok.