Ngoh Nguyễn Lê Duy, cheăm Ea Tar, tơring Čư̆ Mgar, kong pơlê Dak Lak ai lối 10 ha sầu riêng hdrê Dona. Ngoh ăm ‘nâi, rơnó hdrối rơpŏng krí xo châ vâ chê 200 tâ̆n plâi ối drêh, yă tê a kơdrum ai 42 rơpâu kg, châ 8,4 rơtal liăn. Mot tung rơnó krí hơnăm kố, tiô tối hdrối liăn châ xo kô tâk péa hdroh tâng vâ pơchông ƀă hơnăm nah kơnôm yă tê kơnâ.

Ngoh Nguyễn Lê Duy phiu ro tối:

“Môi tiah hơnăm nah mê yă tê dâng 40 rơpâu liăn tung môi kg, ƀă nôkố yă vâi roê troh 60 – 70 rơpâu liăn tung môi kg, ƀă vâi hiăng lăm tơdah roê. Châ yă tê môi tiah kố mê kuăn pơlê pêi chiâk ngin kố phiu ro khât, vâi krâ nhŏng o  mơ-eăm ‘no liăn rak ngăn ăm plâi sầu riêng gá kô kơtóu plâi hên, plâi dâi lĕm”.

Xuân phiu ro xua sầu riêng tê châ yă kơnâ, la pôa Ngô Công Lương, a cheăm Ea Yông, tơring Krông Pač, mê tá hâi kĭ tơkêa tê roê ƀă kơdrum plâi sầu riêng ai 180 xiâm plâi Dona pêt tơvât tung deăng kơphế. Pôa ăm ‘nâi rêm hâi ai hên mâu ngế ki roê troh ngăn kơdrum plâi kố vâ kok roê tâi tâng plâi sầu riêng:

“Tối tơdjuôm dế nôkố tâng vâi tối yă vâi roê châ 72 rơpâu liăn tung môi kg, ƀă ai hên rơpŏng hiăng xo liăn ki vâi kok, rêm ha vâi xo sap ing 400 – 500 rơtuh. Hngêi á kố tá hâi tơpréa ôh, xua yă gá tá hâi ‘nâi nhên, gá hâi khên. Tơkéa vâ tối drêng lâi ah achê rôh vâ poê dâng 1 măng tĭng mê rơpŏng á nếo pơkâ tê, drêng mê ah ai kơbố lăm roê mê kô tê”.

Krông Pač cho tíu ki pêt sầu riêng kân má môi a kong pơlê Dak Lak ƀă lối 7.100 ha, tung mê lối 3 rơpâu ha dế hiăng châ krí. Sầu riêng akố ki hên cho hdrê Dona ƀă Ri6. Ki lĕm châ sap ing 18 – 20 tâ̆n plâi ối drêh tung môi ha. Pôa Nguyễn Huy Hoàng, ngế xiâm pơkuâ Ƀơrô pêi chiâk deăng ƀă Mơnhông thôn pơlê tơring Krông Pač ăm ‘nâi, hơnăm kố kong prâi ôh tá tơniăn, tung pơla apoăng rơnó ai mâu kơdrum plâi sầu riêng tro tơruih reăng ƀă plâi kơbâng. Laga, kơnôm ing tơdroăng ki rak ngăn krâu mê plâi gá ối krêa a loăng ối hên, plâ kân, kơtóu xuân ối châ hên.

“Tơring Krông Pač mê tiô tối hdrối kô cho môi rôh châ plâi hên tê châ yă kơnâ. Nôkố vâi krâ nhŏng o dế pơtối pêt, ƀă dâng 45 hâi nếo kô châ krí rơnó ki xiâm. Apoăng rơnó krí troh, Vi ƀan hnê ngăn tơring kô ai túa pơkâ cho lăm troh ngăn ƀă hnê tối troh vâi krâ nhŏng o vâ rak vế tơniăn gâk kring a tơring xuân môi tiah rak tơniăn kế tơmeăm dêi tơná”.

Lâp kong pơlê Dak Lak nôkố ai 22.500 ha deăng pêt sầu riêng, tung mê dâng 10 rơpâu ha dế hiăng châ krí. Plâi sầu riêng hơnăm nah (2022) châ 170 rơpâu tâ̆n plâi ối drêh, kơxô̆ liăn châ xo lối 9.500 rơtal. Rơnó krí hơnăm kố, tiô tối hdrối sầu riêng Dak Lak mơni kô châ 185 rơpâu tâ̆n plâi. Nôkố, séa ngăn a mâu rơpŏng ki pêt a Krông Pač, Krông Năng, Ƀuôn Hồ, Čư̆ Mgar ƀă hên tíu ki ê yă pơkâ roê sầu riêng a kơdrum dế châ sap ing 65 – 75 rơpâu liăn tung môi kg plâi ối drêh, laga hdrê Dona lơ Ri6 ki lĕm dêi plâi.

Ƀă tá tơdroăng ki yă tê ƀă ki lĕm pơrá tâk, sầu riêng Dak Lak rơnó 2023 kố mơni kô kum ăm kuăn pơlê ki pêi chiâk ai kơlo liăn châ xo hên tâ túa pơkâ.