VOV4.Sêdang - Drêng pơreăng COVID-19 xông tâ tú ó, vâ hbrâ châ hlo F0 tung pơlê pơla, Vi ƀan pơlê kong kơdrâm Ƀuôn Ma Thuột, kong pơlê Dak Lak hiăng tơbleăng pơkâ tôe xo têa môh vâ ngăn pơreăng SARS-CoV-2 tung pơlê kong kơdrâm roh má 2. Pơtối mê, pơlê kong kơdrâm kô test rĕng ngăn hôm tro tâ pơreăng a 16 cheăm, bêng ai pơreăng xông tâ tú ó tung pơla kố nah mê cho: bêng Ea Tam, Tân Tiến, Tự An, Tân Lợi, Tân Lập, Tân An, Thắng Lợi, Tân Hòa, Thành Nhất, Thành Công, Tân Thành, Thống Nhất, cheăm Čư Êbur, cheăm Hòa Thuận, Hòa Thắng ƀă cheăm Ea Tu.

Pơlê kong kơdrâm Ƀuôn Ma Thuột kô test rĕng ăm kuăn pơlê

Tung pơla pêi pro sap hâi lơ 6/11 ƀă mơgêi hdrối hâi lơ 9/11/2021. Vâ rak tơniăn tro hâi khế, pơlê kong kơdrâm kô mơjiâng 204 tôh khăm ngăn, rêm tôh tôe xo têa môh test dâng 500 ngế/hâi. Tơdroăng tôe xo têa môh kô pêi pro tiô troăng ‘’pêi troh a lâi kêi đeăng troh dâng mê’’  rêm rơpŏng kô châ tôe xo têa môh tiô troăng gô̆m ôh tá chiâng hluâ 3 ngế/môi tíu.

A Sa Ly tơplôu ƀă tơbleăng