Dak Lak ai troăng tơkăng kong xŏn 73 km tơkăng kong pơlê Mondulkiri (kong têa Kul) tung 4 cheăm: Ea Bung, Ia Rvê, Ia Lốp ƀă Buôn Đôn. Kố cho kơpong ki phá krê, kuăn pơlê hdroâng kuăn ngo châ lối 50%. Troăng klông pá puât, hngêi trung lâm hiăng tơ’nhê pro tơdroăng hriâm tâp dêi hok tro trâm hên pá puât. Rêm rơnó pơxiâm po hơnăm hriâm nếo, hên thái cô thế lăm rêm pơlê, rêm hngêi mơhnhôk hok tro troh lâm hriâm;hên vâi o thế prôk troăng 15 – 20 km vâ hriâm chư. Tơdroăng châ kong pơlê mơ’no liăn mơjiâng hngêi trung ai tíu kâ koi ối pơtê tung hngêi trung tơdjêp râ a mâu cheăm tơkăng kong chiâng tơdroăng loi tơngah ƀă pói vâ pơhlêh nếo ƀă kuăn pơlê tíu kô. Nâ H’Đa Nê Byă, ối a cheăm Buôn Đôn tối:

‘’Krê á xuân môi tiah kuăn pơlê phiu ro. Drêng hngêi trung châ mơjiâng, mâu vâi o kô ai hngêi trung hriâm tâp lĕm tro tâ, châ tŏng gum tơ’nôm ‘na kơxôp mơ-éa chêh, kế tơmeăm ƀă kơmăi kơmok tiô rơxông nếo. Kố cho tơdroăng ki phiu ro, ngin pói vâ tơmeăm rĕng châ pêi pro vâ kuăn ‘nĕng kơpong tơkăng kong châ tŏng gum’’.

Tiô kơchuâ bro, rêm hngêi trung bê 1.000 – 1.200 hok tro, ƀăng deăng 5 – 10 ha, ai kơbong hriâm, hngêi ối, hngêi chô ‘măn kơxôp mơ-éa, hngêi kâ, kơpong tơ’noăng ivá, kơbong kơmăi tĭnh, têa krúa ƀă mâu tơmeăm ki tơ’nôm. Tâi tâng kơxô̆ liăn tiô tối hdrối dâng 420 rơtal liăn ăm 4 tơmeăm. Ƀă mâu thái cô, kố cho troăng prôk ki kal tah lôi hên pá puât tung hnê hriâm. Pôa Nguyễn Văn Sơn – Thái pơkuâ Hngêi trung THCS Lê Quý Đôn, cheăm Ea Bung tối:

‘’Châ mơ’no liăn mơjiâng pro kế tơmeăm khoăng tơdâng tơ’mô kô pro tơ’lêi hlâu ăm mâu muăn kơdroh tơdroăng lôi pơtê hriâm. Mâu muăn châ ối a hngêi trung kâ kơhâi dế lơ châ ối tung hngêi trung mê kố cho môi tung mâu tơdroăng ki tơ’lêi má môi ăm tá hok tro ƀă nôu pâ hok tro tá thái cô’’.

‘Na peăng khu râ kăn pơkuâ, mâu cheăm hiăng hbrâ tăng tơnêi vâ pro tơmeăm tơdjêp râ. Tơdroăng tơkêa bro a cheăm Buôn Đôn hiăng châ pơkâ pêi tung ƀăng lối 5 ha, tiô tối hdrối pơxiâm mơjiâng pro a khế 10/2025. Pôa Lê Thanh Sơn – Phŏ Kăn hnê ngăn Viƀan cheăm Buôn Đôn tối ăm ‘nâi:

‘’Ngin hiăng ‘măn lối 3,6 ha ƀă dế po rơdâ tâk 5 ha vâ mơjiâng hngêi trung. Tơmeăm kô djâ ăm tơdroăng hriâm tâp lĕm tro má môi ăm thái cô, hok tro, tơdrêng amê cho troăng hơlâ gum rêh ối pơlê pơla kal khât, kum kuăn pơlê hmiên tuăn rêh ối, mơnhông tăng cheăng pêi tíu tơkăng kong’’.

Lâp kong pơlê Dak Lak nôkố ai lối 4.300 hok tro a 4 cheăm tơkăng kong. Tơdroăng ki mơjiâng dêi mâu hngêi trung ai tíu kâ koi ối pơtê tung hngêi trung tơdjêp râ ôh tá xê to tơleăng tíu hriâm, tíu ối ăm hok tro, mê ối djâ ki kơnâ troăng pêi cheăng ton xŏn. Pôa Nguyễn Đình Trung – Kăn pơkuâ hnê ngăn cheăng Đảng kong pơlê Dak Lak mơnhên: Kố cho pơkâ ki kân, djâ ki kơnâ rơkê trâu, po roh tơ’lêi vâ kuăn ‘nĕng hdroâng kuăn ngo kơpong tơkăng kong châ hriâm tâp tung tíu lĕm tro tâ, kum hnê mơjiâng mơngế pêi cheăng ki rơkê ăm kong pơlê. Tơdrêng amê tơmeăm xuân pro krá tơdroăng tâi tâng kuăn pơlê gâk kring tơnêi têa, gâk kring kuăn pơlê a tơkăng kong. Kăn pơkuâ hnê ngăn cheăng Đảng kong pơlê Dak Lak tối rơdêi:

‘’Pơkâ thế kơvâ hnê hriâm rơtế khu râ kăn pơkuâ hnê ngăn Đảng, khu râ kăn pơkuâ pơlê tiô kơvâ cheăng, hnoăng cheăng châ pơcháu thâ pêi pro mâu pơkâ, pro mơ-éa tơdjâk vâ rĕng pơxiâm mơjiâng pro kế tơmeăm khoăng. Tĭnh ŭy kô pơtối rơtế, hnê mơhno tơtro, vâ tơniăn mâu tơdroăng tơkêa bro châ djâ xúa tro tơdroăng, mơjiâng troăng pêi ki rơkê ăm tơdroăng châ tơƀrê hluâ pơkâ ăm tơdroăng hnê hriâm – hnê mơjiâng tuăn ngôa rơkê dêi kong pơlê, ki má lối cho a kơpong tơkăng kong’’.

Mâu hngêi trung kân lĕm rơdâ hiăng vâ ai a tíu tơkăng kong ôh tá xê to tíu ‘’hnê chư’’ mê ối cho tíu mơdâ tơdroăng ki hâk vâ, po lôu péa tuăn ngôa rơkê ăm rơpâu ngế hok tro. Ƀă tơdroăng tơdjuôm ivá dêi Tơnêi têa, kong pơlê ƀă kuăn pơlê, tơdroăng pói vâ chư tíu tơkăng kong dế chôa ‘lâng chiâng pêi pro.