Klêi tơ’mot ƀă Ninh Thuận, Khánh Hòa chiâng kơpong tơnêi tơkŭm hên ki pơxúa  ai hlâu: kĭng têa kơxĭ xŏn má môi Việt Nam,  mâu nhâ loăng a têa kơxĭ  hên chuăn, hên kung king ƀă ‘núa prêi ki vâi ô eăng môi tiah Nha Trang, Vân Phong, Cam Ranh, Ninh Chữ, Vĩnh Hy, rơté ƀă mâu kong ngo, ‘núa prêi ƀă hnốu tơmeăm khoăng túa lĕm tro - ton nah ki tơviah. Kô cho xiâm vâ kong pơlê mơnhông mâu kơvâ ôm hyô ngiêt lĕm, on tơhrik krúa, troăng prôk lĕm krúa ƀă tơdroăng rêh ối lĕm ăm mâu kuăn pơlê.

Laga, Khánh Hòa xuân ối kơnôm a mâu kơchô mơdró xiam ƀă tơ’lêi tơdjâk troh xua tơdjâk tung lâp plâi tơnêi.

A hneăng hôp, hên mâu ngế rơkê pơkâ thế Khánh Hoà rĕng  pơkâ khu pêi pro tiô pơkâ ôm hyô ngiêt, pơkâ troh hơnăm 2030 ai 80% tíu pơtê ối châ tối lĕm krúa têp tĕm ngiêt. Túa pêi cheăng ing mâu kơpong ôm hyô ki vâi ô eăng a kong pơlê ăm hlo, mơnhông ngiêt hnối mơdêk ki tơ’mot ôm hyô hlối veăng pro tơniăn cheăng kâ tung kuăn pơlê. Tiô pôa Phạm Minh Nhựt, Kăn hnê ngăn khu ôm hyô Nha Trang- Khánh Hòa, kố cho troăng ki kal vâ mơnhông ivá  tơbriêt cheăng, pro ki pơxúa krá tơniăn  cheăng kâ ton hơnăm:

“Ôm hyô ngiêt, ôm hyô ton hơnăm ôh tá xê cho tơdroăng mơhnhôk, ôh tá xê to tơdroăng hên ngế pêi pro mê cho xiâm dêi mâu khu mơdró ôm hyô. Malối cho khu mơdró pơtê  ối, khu mơdró pro tíu pơtê ối, khu mơdró  troh thế tơrŭm ƀă hlối rak vế hyôh kong prâi ƀă tơdroăng ôm hyô dêi vâi. Pro ti lâi rak hyôh kong prâi nhâ loăng kô châ tơniăn  krá, pơtih  la ngiâ  cho xúa tơmeăm ki hmâ ƀă hyôh kong prâi. Lơ mâu tơdroăng tơm xo, tơkŭm mâu xok.

Pôa Nguyễn Long Biên, Phŏ kăn hnê ngăn Vi ƀan kuăn pơlê kong pơlê Khánh Hòa tối, kong pơlê kô pơ’lêh mâu tơdroăng veăng hnê tối  nâp veăng a luât pơkâ, mơhnhôk tăng xiâm ing pơlê pơla, mơhnhôk khu mơdró ‘no liăn cheăng; pakĭng mê tơkŭm mâu troăng hơlâ dêi Tíu xiâm vâ rĕng pêi châ tiô pơkâ  chiâng tíu troh tung tŭm tơdroăng:

“Khánh Hòa púi vâ pơtối xo tơdroăng tơmâng khât, rơtế ƀă tíu xiâm, khu mơdró, mâu ngế rơkê ƀă kuăn pơlê vâ  pêi tro tiô puí vâ chiâng tíu xiâm ôm hyô a têa kơxĭ lâp plâi tơnêi, kơphô̆ ngiêt lĕm- rơkê plĕng, troăng prôk ngiêt- krá ton, veăng ‘no hnoăng a pơkâ tâk cheăng kâ péa kơxô̆ pơla hơnăm 2025- 2030”.