A kĭng troăng prôk cheăm Đơn Dương, kong pơlê Lâm Đồng, drêh ngiât dêi mâu klâng báu, xâp rơngiâp lĕm dêi mâu kơdrum reăng dế mot tung rơnó poê xo ƀă mâu rơkong tơpui tó rơ’eăng dêi mâu ngế ki pêt. Ƀă lối 8.400ha hdrê pêt tŭm túa, tung mê ai lối 3.000ha kơchâi, reăng pêt tiô chal nôkố rơtế ƀă ro xo têa tôu vâ chê 19 rơpâu to hiăng pro pơxúa ăm tơdroăng rêh ối phai hơtôu ăm kuăn pơlê kơpong tơnêi kố. Pôa Nguyễn Tiến Khánh, thôn 1, cheăm Đơn Dương ăm ‘nâi, tơdroăng ki cheăm mơjiâng pro châ mâu túa ki pêt mơjiâng kơnía-tê roê pơkí ƀă mâu kế tơmeăm xiâm, môi tiah têa tôu ro ối drêh, kơchâi plâi hiăng mơnhông pêi chiâk deăng krá ton ƀă pêi lo liăn ăm kuăn pơlê.

“Cheăm Đơn Dương pơtó tâi tâng tơdjuôm dêi tơring Đơn Dương hdrối nah, malối cho tơring Đơn Dương cho tơring apoăng dêi mâu kong pơlê Tây Nguyên pêi châ tiô pơkâ ‘na thôn pơlê nếo, ngiâ méa dêi thôn pơlê mơnhông tâ nah. Tơdroăng rêh kâ ối dêi Kuăn pơlê châ mơnhông, hngêi râ, rơxế kân môi tiah cheăm á kố ôh ti ai xếo rơpŏng kơtiê mê lối 7% cho rơpŏng chía niân ƀă kro”.

Sap ing hâi lơ 1/7 pơla hdrối kố nah kong pơlê Lâm Đồng mot tung hneăng mơnhông nếo ƀă ki ai hlâu, pơxúa ƀă tơnêi tơníu kân rơdâ sap ing kong troh têa kơxĭ. Kong pơlê ai ƀăng tơnêi lối 24.000km2 kân má môi lâp tơnêi têa ƀă túa cheăng kâ ối má 8. Tơdroăng ‘mot tơkŭm 3 to kong pơlê xuân hiăng pro tơ’nôm ăm tơdroăng cheăng kâ ối má môi lâp tơnêi têa, môi tiah kong nghiê̆p boxit-alumin-nhôm ƀă kơxô̆ boxit riân châ lối 5,4 rơtal tâ̆n; kế tơmeăm ôm hyô hên ƀă inâi ôm hyô tơnêi têa Đà Lạt, Công viên tơnêi tơníu Dak Nông ai kiêp hmốu ngo on kân má môi Đông Nam Á, long Tà Đùng môi tiah “Kung king Hạ Long a Tây Nguyên”, ôm hyô têa kơxĭ bă Phan Thiết – Mũi Né, kơpong pêi cheăng Phú Quý; pêt mơjiâng tơmeăm tung chiâk deăng ai reăng, ai kchâi, luô̆ tơ tằm, ká têa hngíu xuân ối má môi lâp tơnêi têa. Pôa Nguyễn Hoài Bão, kăn pơkuâ ngăn Đảng, ngế xiâm pơkuâ Khu kăn Kuô̆k hô̆i hneăng X kong pơlê Lâm Đồng hneăng hdrối, loi:

“Nôkố Lâm Đồng ai kăng kong, ai têa kơxĭ, ƀăng tơnêi nôkố cho ối má môi lâp tơnêi têa mê ki ai hlâu gá hên. Lâm Đồng nếo hlê plĕng nếo, troăng ngăn nếo ƀă kal tâ cho tâi tâng tơdjuôm ivá. Kuăn pơlê loi a Đảng ƀă tuăn mơno dêi kuăn mơngế Việt Nam vâ pêi pro tro tơdroăng cheăng ƀă rơhêng vâ Việt Nam châ tơxâng ƀă mâu kong têa tung lâp plâi tơnêi môi tiah Pôa Hồ hiăng hnê”.

Kong pơlê Lâm Đồng dế pro tơ’lêi mâu tơdroăng ki xơpá ƀă hên hĭn mâu tơdroăng tơkêa pro ki kal ‘na troăng prôk, chiâ xo tơmeăm khoăng, on tơhrik, vêh pro tíu ối nếo ƀă tâi tâng kơxô̆ liăn ‘no lối châ rơpâu rơtal vâ mơdêk ‘no liăn pêi cheăng pro ivá ăm tơdroăng cheăng kâ, mơdêk ivá mơnhông.

Pôa Y Thanh Hà Niê Kdăm, Ngế cheăng tung tíu xiâm Đảng, Kăn pơkuâ ngăn Lâm Đồng, tối nhên:

“Mơdêk mơnhông cheăng kâ rak vế tŭm mâu tơdroăng mơnhông têi hơnăm 2025 dêi kong pơlê Lâm Đồng châ lối 8%. Pơkâ thế tơdroăng cheăng ki ai khât nôkố rế athế rak vế rơkê tung tơdroăng cheăng dêi râ tơná, tơdrêng amê hlối tŏng gum teăm tơdrêng ăm râ pá xôp. Rế tơniăn tung kơ koan pêi cheăng rế rak rơniăn tro tơdroăng pơkuâ tiô túa pêi cheăng nếo, rế mơnhông pro tơ’lêi hlâu vâ tí tăng ki rơdêi dêi kong pơlê la rế rak vế mâu kơxô̆ liăn vâ ăm hneăng mơnhông kơ’nâi.

Đảng ƀô̆, kăn pơkuâ ƀă Kuăn pơlê kong pơlê Lâm Đồng dế mơdêk khât hiâm mơno tơrŭm, tơmiât pêi rơkê, khŏm mơeăm mơjiâng pơlê cheăm rế hía rế kro lĕm, rơkê, tơxâng ƀă tơdroăng loi ƀă tơngah dêi Đảng, Pôa Hồ.