Hơnăm 1975, klêi kơ’nâi hâi peăng hdroh tơnêi têa châ tơleăng lĕm tâi tâng, tơnêi têa tơmot chiâng môi, rơpŏng pôa Đặng Kháng xuân môi tiah kuăn pơlê Chăm a cheăm Bắc Bình rêh kơnôm to pêi chiâk deăng, kơnôm têa mêi tê. Xua mê, pêi lo mâu plâi kâ, mơnăn păn ôh tá hên, mâu rơpŏng ki hên pêt mơjiâng tơmeăm vâ ai kế kâ, tá hâi tối troh tơdroăng pêi lo tơmeăm vâ tê.

Nah cho mơngế lêng Pôa Hồ, klêi kơ’nâi vêh ƀă tơdroăng rêh ối tiah hmâ rêm hâi, mơhé tơdroăng rêh ối trâm hên pá puât, laga vâi cho mâu ngế đi đo djâ troăng ahdrối tung mơnhông cheăng kâ, mơ-eăm pêi kâ pêt mơjiâng tơmeăm, vâ mơ-eăm tơniăn tơdroăng rêh ối.

Châ hôp tung khu Mô đô̆i hneăng hdrối nah, ing hôp khu ƀă mâu khu đoân theh, pôa Đặng Kháng châ tơmâng tối ‘na mâu troăng hơlâ ki xiâm dêi Đảng, Tơnêi têa ‘na tơdroăng mơnhông cheăng kâ – rêh ối pơlê pơla, ki rơhêng vâ tối châ lăm pôu ngăn hên troăng pêi kâ khu tơrŭm Khu mô đô̆i hneăng hdrối nah mơnhông cheăng kâ rơpŏng, kum dêi pó xăm kơklêa kơdroh kơtiê, mơ-eăm pro kro mơdrŏng tơxâng.

Pôa Kháng pơkâ rah xo troăng pêi păn pu pái, ro ƀă hlối pêt lối 1 rơpâu xiâm plâi rơgá vâ mơnhông cheăng kâ rơpŏng. Apoăng xua tá hâi ai kơxô̆ liăn xua mê rơpŏng pôa bu rôe to lâi pu pái kăn ƀă pu pái đâi vâ păn pro hdrê. Klêi môi pơla, kơnôm kơhnâ rak ngăn xua mê khu pu pái ing to lâi to apoăng mê hiăng tâk to lâi chât to, rêm hơnăm rơpŏng pôa Kháng pêi lo liăn vâ chê 100 rơtuh liăn ing tơdroăng tê pu pái, ro. Pôa Đặng Kháng tối ăm ‘nâi, tơdroăng rêh ối rơpŏng pôa hiăng hluâ mâu hâi pá puât, ôh tá tô tuăn tăng kế kâ rêm hâi môi tiah mâu hơnăm hdrối nah.

“Klêi kơ’nâi tơleăng lĕm, á veăng cheăng mô đô̆i châ 2 hơnăm, troh hơnăm 1976 á vêh, khu râ kăn pơkuâ rah xo á pro Kăn pơkuâ Khu mô đô̆i hneăng hdrối nah sap hơnăm 2004, drêng kố, rơpŏng á xuân trâm hên pá puât, laga kơnôm veăng tung khu mô đô̆i hneăng hdrối nah, châ tŏng gum ăm mung liăn, á djâ vêh mơ’no liăn mơnhông cheăng kâ pêt plâi rơgá, rôe to lâi to ro, pu pái păn tơ’nôm. Sap hâi mơnhông pêt mơjiâng tơmeăm, păn mơnăn, cheăng kâ rơpŏng á xuân tơniăn tâ’’.

Pôa Đặng Kháng mơnhên, pôa ƀă rơpŏng châ môi tiah hâi kố cho tơdroăng mơ-eăm dêi rơpŏng, laga xuân thế tối troh troăng hơlâ dêi Đảng ƀă Tơnêi têa ƀă ki rơhêng vâ tối cho tơdroăng tŏng gum, hnê mơhno dêi khu mô đô̆i hneăng hdrối nah.

Pôa Nguyễn Bảo Quốc, Kăn hnê ngăn Khu mô đô̆i hneăng hdrối nah cheăm Bắc Bình, kong pơlê Lâm Đồng tối ăm ‘nâi, klêi kơ’nâi tơmot chiâng môi, Khu mô đô̆i hneăng hdrối nah cheăm Bắc Bình, kong pơlê Lâm Đồng ki hên cho kuăn pơlê mâu hdroâng kuăn ngo rêh ối tơvât ƀă dêi pó. Pakĭng tơdroăng tơmâng dêi Khu mô đô̆i hneăng hdrối nah kong pơlê, rơtế ƀă mâu troăng hơlâ dêi Đảng, Tơnêi têa, ing mâu tơdroăng pêi cheăng kâ khu mô đô̆i hneăng hdrối nah tơdjâk, mâu ngế ki tơrŭm cheăm Bắc Bình tơkâ hluâ pá puât vâ mơnhông cheăng kâ rơpŏng ai tơdroăng rêh ối phâi hơtô.

‘’Pôa Đặng Kháng ing môi rơpŏng pá puât, klêi kơ’nâi veăng khu mô đô̆i hneăng hdrối nah, mơnhông châ ki lĕm mô đô̆i Pôa Hồ, kơnôm tơdroăng tơmâng dêi Đảng, Tơnêi têa châ achê mâu kơxô̆ liăn mung ing Hngêi arak liăn kum Rêh ối pơlê pơla ƀă Hngêi arak liăn Pêi chiâk deăng ƀă mơnhông thôn pơlê, hbrâ ‘nâi mâu kơxô̆ liăn mê ki pôa Kháng hiăng mơnhông cheăng kâ rơpŏng, pêt lối 1.000 xiâm plâi rơgá, păn ro, pu pái vâ mơ-eăm chiâng rơpŏng ki hôm a pơlê’’.

Ôh tá xê to mơ-eăm pro kro mơdrŏng ăm krê tơná, mê mô đô̆i hneăng hdrối nah Đặng Khánh ối mơ-eăm mơhnhôk, hnê mơhno kuăn pơlê tơná rơtế pơchoh tơnêi pêi kâ, vâ ví tơdroăng kơnôm to a tơdroăng tŏng gum dêi Tơnêi têa. Mơ-eăm tơkâ hluâ pá puât xông mơ-eăm dêi mô đô̆i hneăng hdrối nah Đặng Kháng hiăng mơnhên tơdroăng rêh ối ăm hiâm mơno, mơ-eăm xêh, rơdêi xêh ƀă ai hiâm mơno mơ-eăm rơdêi dêi mơngế lêng Pôa Hồ.