Pơlê chal krâ hdroâng kuăn ngo K’Ho (a thôn Klong Trao 1 cheăm Di Linh, kong pơlê Lâm Đồng ngăn lĕm xua ai 5 toăng hngêi trá a môi plông kân rơdâ. Kố ôh ti xê cho tíu ki rêh ối tơdjuôm pơlê pơla, tơkŭm po mâu mơdĭng mê ối cho tíu ki mơđah tơbleăng mâu kế tơmeăm túa lĕm tro tung tơdroăng rêh ối xuân môi tiah khôi túa tơlá sap in ton nah dêi mơngế K’Ho. Kố cho tíu ki xah hêi hơniâp ro gum ăm tơdroăng ôm hyô pơlê pơla.

Akố, vâi krâ kuăn pơlê hiăng tơkŭm mơdĭng Ñô lir bong (rơkâu kâ báu nếo) dêi hdroâng K’Ho Sre. Pôa K Breo, krâ pơlê a cheăm Di Linh ăm ‘nâi mơdĭng Ñô lir bong ôh ti xê to vâ gum vâi krâ kuăn pơlê rak vế khôi túa lĕm tro mê ối tơ’mot tơmối achê hngế ‘nâi troh.

“Pơlê chal krâ dêi mơngế K’Ho cho tíu ki rak vế ‘mâi mơnhông, trâm mâ tơkŭm po mâu rôh mơdĭng chal krâ dêi mơngế K’Ho nah môi tiah túa lĕm tro chêng koăng, rơkâu xối ivá, rơkâu xối rak ngăn báu, rơkâu xối pâ châ hên kế tơmeăm khoăng, malối cho mơdĭng kâ báu nếo, môi tung mâu mơdĭng ki kân, ki hơniâp má môi dêi mơngế K’Ho ƀă mâu kế tơmeăm pleăng cho kơpôu ƀă rơhêng vâ kong mê tro tôu ‘ló, kế tơmeăm châ xo hên, pơlê cheăm ai ivá mo sêi, kuăn pơlê tơrŭm. Kố cho mâu túa lĕm tro chal krâ dêi mơngế K’Ho rơhêng vâ châ rak vế, hnê tối ăm kuăn cháu kal kơ’nâi, gá kô ối đi đo”.

A Pơlê chal krâ hdroâng kuăn ngo K’Ho đi đo ai mâu khu ngê̆ nhân, krâ pơlê, ngế ki rơkê ‘na túa lĕm tro chal krâ, gum tơmối troh tăng ‘nâi, hriăn ngăn. Malối, a kố ai Kâu lăk ƀô̆ Chêng koăng cheăm Di Linh ƀă 14 ngế tŏn, ki hên cho droh rơtăm. Nâ Tam Bộ Thơ (kot mâ 1990), ngế ki pơkuâ Kâu lak ƀô̆ ăm ‘nâi, rơtế ƀă tơdroăng cheăng a Pơlê mơhno túa lĕm tro, kâu lak ƀô̆ ối hmâ mơđah tơbleăng a mâu tíu ôm hyô a kong pơlê môi tiah xí Bồbla, xí Li Liang, tíu ôm hyô long têa Kala vâ mơđah tơbleăng túa lĕm tro chal krâ, ki lĕm ro dêi mơngế K’Ho.

“Mâu ngế ki veăng tơrŭm tung Kâu lak ƀô̆ pakĭng tơdroăng ki rak vế túa lĕm tro khôi hmâ hdroâng kuăn ngo, mê ối tơbleăng tối mâu tơdroăng ki lĕm tro túa lĕm tro chêng koăng-kơxuăng chal krâ dêi hdroâng kuăn ngo K’Ho ăm tơmối vâ tăng tơ’nôm liăn ngân, pơhlêh tơdroăng rêh ối tung rôh ki ối xo xo. Pakĭng mâu kơpong ôm hyô, mâu tíu xiâm tơkŭm po tơdroăng a cheăm bêng ‘nâi troh, nôkố Kâu lak ƀô̆ châ ngin tơbleăng tối mơ’no tung mâu măng pơlê pơla, Facebook, Tiktok ƀă hên ki ê Túa pêi ki kố gum Kâu lak ƀô̆ châ tơmối ‘nâi troh rĕng tâ”.

Cheăm Di Linh, tíu ki ai Troăng kân 28 ƀă troăng kân 20 prôk tơkâ, cho tíu ki tơdjêp troăng prôk pơla Gia Nghĩa troh Phan Thiết, Đà Lạt troh Pơlê kong kân Hồ Chí Minh. Tíu ki ai tơnêi tơníu kong kế môi tiah kong loăng hngó, long têa, xí Li Liang ƀă túa lĕm tro hdroâng kuăn ngo K’Ho, cho ivá rơdêi mơnhông ôm hyô kong kế nhâ loăng túa lĕm tro. Pôa K’Brơt, Phŏ ngế pơkuâ pơlê khôi hmâ K’Ho, ăm ‘nâi:

“Sap ing hâi ki hiăng pro klêi pơlê lĕm tro hiăng ai hên tơdroăng châ tơkŭm po môi tiah hôp tơpui tơno ‘na tơdroăng cheăng ki kal dêi thôn, tơdah hên khu tơmối troh hyô ngăn, tăng ‘nâi túa lĕm tro sap ing miền Tây, sap ing kơpong Di Linh. Hiăng ai 6 to lâm tá thái cô ƀă khu ki hriâm nâl K’Ho troh hyô ngăn, tăng ‘nâi ‘na kế tơmeăm xúa ton nah, hngêi trăng, cheăng tĕn, túa pế drôu xiâm, túa pêi báu ƀă hên ki ê dêi mơngế K’Ho.

Mâu ngê̆ nhân hnê tá hiâm mơno, gum mâu ngế ki hriâm ‘nâi tơ’nôm ‘na túa lĕm tro khôi hmâ hdroâng kuăn ngo, cheăng ‘na chêh ƀai mơ’nui hneăng hriâm. Tung la ngiâ ah, cho a khế 10, pơlê túa lĕm tro kô tơkŭm po mơdĭng rơkâu xối rak ngăn báu (ñô wèr) cho môi túa rơkâu xối pêi chiâk ki kal dêi mơngế K’Ho Sre, vâ tơbleăng tối troh lâp lu ăm tơmối hyô ngăn tung lâp tơnêi têa ‘nâi troh pơlê, tăng ‘nâi ‘na mơdĭng kố”.

Pơlê túa lĕm tro khôi hmâ a thôn Klong Trao 1, cheăm Di Linh, kong pơlê Lâm Đồng, cho tíu ki rak vế ƀă mơnhông mâu tơdroăng kơnía dêi hdroâng kuăn ngo K’Ho Sre tung túa rêh ối nôkố. Sap ing tơdroăng rêh ối pơlê pơla, mơdĭng khôi hmâ troh Khu ki tŏn chêng koăng hơnăm ối nếo, tâi tâng dế veăng gum tơdjêp xŏn troăng kơnía túa lĕm tro, tơdjâk tơdroăng hâk tơngăm hdroâng kuăn ngo, tơdrêng amê hlối po troăng prôk krá tơniăn ton tung mơnhông ôm hyô tro ƀă rak vế túa lĕm tro.