Ƀă nâ Phạm Thị Thu Hằng ối a bêng Tân Lập, kong pơlê Dak Lak, mâu tơmeăm khoăng ki vâi ô eăng dêi kong pơlê, mê cho:  Kơphế, krui kơxái, plâi ƀơr, ôh ti xê to tơmeăm pêi lo ing chiâk deăng - tơmeăm kâ. Ngế hriăn plĕng inâi phom kơlôn Pơ Lang hiăng diâp mâu tơmeăm pê lo ing chiâk deăng, tơmeăm ki mê ai inâi nếo-cho pro lĕm ngiâ méa châ chăn. Kơ’nâi 5 hơnăm sap pơxiâm pêi cheăng nâ hiăng tăng ‘nâi plĕng-Hriĕn pro 11 túa phom kơlôn ing mâu tơmeăm pêi lo dêi pơlê, châ hên tơmối vâ rôe. Nâ Phạm Thị Thu Hằng tối, ngăn a tơmeăm khoăng pêi lo dêi kong pơlê kô cho ki hlâu dêi kuăn pơlê vâ pơxiâm pêi cheăng:

“Mơnhông mâu tơmeăm hriăn pro trâu tâ nếo ing mâu tơmeăm pê lo ing chiâk deăng tơmeăm pêi drêh krúa lĕm, tơmeăm pêt mơjiâng pêi lo lĕm, xúa lĕm há. Tung pơla pơxiâm pêi cheăng dêi ngin mâ ngin tối kô cho môi troăng pêi ki tơxâng ƀă ing mâu tơdroăng tơkêa bro kơjo kum khu mơdró kâ pro ki tơdjâk pơlê pơla xuân môi tiah mâu khu mơdró pêi cheăng lĕm krúa, pêi lo liăn lĕm, liăn ki pêi lo krá tơniăn ton”.

Ƀă vâi kơdrâi Raglai, K’Ho ƀă Chăm ối a cheăm Phan Sơn, kong pơlê Lâm Đồng kơchâi kâ Kataya cho kơchâi kâ ki hmâ. La ƀă Khu vâi nâ Tạ Huyền Thuật tối, kô cho tíu ki tơngah kơnía khât ăm tơdroăng pơxiâm pêi cheăng. Xuân xúa tơmeăm pêi pro ing ká, po ing têa kơxĭ dêi pơlê, khu dêi vâi nâ Thuật tơrŭm râm mâu tơmeăm ki pêi ăm kơhiâm, ing nhâ pơkeăng dêi pơlê; nếo râm ăm tơtro ƀă krôk kâ, pế pro ti lâi ăm kơhiâm hlối lĕm mơnâ mâ ngăn, vâ chiâng kế kâ ki hên ngế vâ rôe. Nâ Tạ Huyền Thuật ăm ‘nâi, Kataya tiô hmâ pêi ing ton rôh nah nôkố hiăng chiâng kế kâ ki ai inâi pơ eăng châ tê hên ngế vâ rôe pro pơxúa tung cheăng kâ.

“Tơmeăm kế kâ dêi ngin pêi pro xúa kơhiâm lĕm ing kong, xua ngin xo mâu hlá nhâ pơkeăng tung kong pro kế kâ mê. Ngin tối mê cho “Ki xú lĕm dêi kong ngo - hiâm mơno dêi kuăn pơlê a pơlê”, ƀă tơdroăng ngin pêi vâ ai “Ki xúa lĕm kơhiâm dêi pơlê vâ chĕm mơ’drêh rêh kâ ối tung la ngiâ”.  Xua ing tơmeăm pêi pro mê, hên vâi nâ o kơdrâi, malối mâu vâi nôu dế păn roăng kuăn ối tơxĭn hdrối nah ôh tá ai cheăng pêi nôkố hiăng ai cheăng pêi tơniăn, nôkố hiăng ai tơdroăng cheăng pêi krá, thăm khên tơnôu ƀă ai rôh vâ châ mơnhông tơdroăng cheăng tơniăn ton ta ah”.

Xuân môi tiah tung kơvâ troăng prôk, mâu troăng kŭn troăng kong dế châ pơkâ hdro mơjiâng pro troăng kân, tơmeăm khoăng kuăn pơlê a Dak Lak xuân chôa châ kuăn pơlê pơxiâm pêi tiô pơkâ, mơnhông chiâng inâi.

Ngoh Lê Anh Thông, môi startup ƀă môi túa pro hơ’nêh ro - í pơ’lêh pro a cheăm Sơn Hòa tối tiah kố, hơ’nêh ro pro têng trĭng dêi kong pơlê, í kong hdrê ton nah xuân pơtối rak vế ki kơnía krê xêh dêi mâm í drêng châ mơnhông păn tung tơdroăng păn chĕm ăm tơtro. La vâ châ po rơdâ khât mâu troăng vâ mơjiâng pro inâi ki nếo, kal thế pêi pro tơxâng  ƀă liăn ‘no păn ƀă mơngế ki veăng păn:

“Xơpá kân má môi nôkố cho ôh tá ai liăn ‘no pêi cheăng, ôh tá châ luât tŏng gum ‘na pêi chiâk deăng mê ối trâm hên xơpá; má péa nếo, ôh tá ai mơngế veăng pêi cheăng. Á púi vâ châ Tơnêi têa tơmâng veăng kum ăm liăn, tơbleăng tơmeăm pê lo a mâu ƀâng mơ’no rơ’jiu um tơvi kong pơlê, hlối pro hlâu vâ mâu khu pêi păn châ pêi cheăng tơdjuôm, ai tơ’nôm hên mâu rơpŏng kuăn pơlê veăng pêi cheăng, mơnhông cheăng kâ krá tiăn ton ăm kơpong”.

Kơpong Tơdế tơnêi têa-Tây Nguyên, kơpong tơnêi hên Túa lĕm tro, hên tơmeăm khoăng tung kong - tung têa kơxĭ dế châ mơhnhôk mơnhông pê lo ƀă tơdroăng hriĕn plĕng ki nếo, púi vâ pro kro mơdrŏng, rak túa lĕm tro ton nah ƀă rak vế hyôh kong prâi. Mâu tơmeăm pê lo môi tiah phom kơlơn ai têa rơmâ bơr, mâm, ká pế ƀă kŏng ai inâi Kataya lơ túa pêi cheăng pro hơ’nêh ro trĭng ki pơ’lêh pro ƀă hên ki ê... ăm hlo tâng ‘nâi tơrŭm ƀă tuăn tơmiêt rơkê ƀă tuá vêa vong lĕm tro dêi kong pơlê, mâu tơmeăm ki pơxúa ton nah mê kô chiâng tơmeăm châ pơxá inâi tơbleăng tê nôkố, ai tíu châ tê a mâu kơchơ kân.