Kơxo má a ƀuôn Tuôr, ôh tá ối tâng xếo ki pơ’lok dêi keng rơxế drô troăng kân tơnêi têa 14, troăng kơxu djâ mot a pơlê kơ’vêng kơ’vong hluâ mâu toăng hngêi, mâu kơdrum loăng ngiât kơphế, sầu riêng, mơngiơk reăng trĭng, reăng ‘nhŭng tung kơnâng péa pâ troăng kân. ‘’Toăng hngêi dêi Kathy’’ chiâng lĕm mơnâ mâ ngăn ƀă mơngiơk loăng, kông ki hmâ rơtế plông to reăng ‘nhŭng. Ki xú hŏm ing toăng hngêi hơpiâp thăm pro hâk vâ.

Bro kêi đeăng a hơnăm 2023, 2 hơnăm hiăng hluâ, tơdâng rêm hơnăm ‘’Toăng hngêi dêi Kathy’’ tơdah dâng 200 roh tơmối, 80% kơxô̆ mê cho tơmối lâp plâi tơnêi, hên má môi cho Pơhlăng, Mih, Ăng-glê, Thụy Điển…Tơmối troh lăm pôu ƀă ối a homestay ‘’Toăng hngêi dêi Kathy’’ kô châ tâ châ hlo tơdroăng rêh ối dêi kuăn pơlê Rơđế a kố, rơtế pế kâ, lăm chiâk deăng, rơtế vê prế, châ ôu drôu xiâm achê hơniâp on…

 ‘’Tơmối phiu ro drêng châ ‘nân rơxế tu tuh châ to lăm tung pơlê, châ hlo, ngăn prôa vâi krâ  nah môi tiah chêng koăng, chêng kơlá, ếo pơtâk hdroâng kuăn ngo ƀă ngăn kơhnhon xuăng. Ngin pêi mơdró ƀă tơmối ăm liăn, djâ pêi lo liăn vâ kuăn pơlê ai liăn rôe tơmeăm khoăng tung tơdroăng rêh ối. A hâk tơngăm xua ôh tá xê to pêi lo liăn mê ối rak ƀă troh lâp lu khôi túa lĕm tro dêi hdroâng kuăn ngo’’.

Môi ngế tơmối ôm hyô lo ing Indonesia lăm pôu ƀuôn Tuôr ƀă  homestay dêi nâ Belly tối hâk vâ:

“Ê, kố cho roh apoăng a troh lăm pôu Việt Nam. Tơdroăng ki hâk vâ ôh tá xê to kong prâi, mê ối cho tơdroăng mơngế kuăn pơlê a kố rêh lĕm ro ‘nâng. Tơdroăng rêh ối chôa ‘lâng ƀă  niân ro tâ. Mâu kơchâi kâ phá krê, tơbleăng ‘na mơngế Rơđế, troh môi roh mơđah tơbleăng rêi prôa, tôu chêng koăng tiô túa vâi krâ nah, cho ro rih păng ‘nâng’’.

Tơmối xuân djâ troh hên tơdroăng ki nếo ăm nâ Belly ƀă kuăn pơlê. Mê cho tơdroăng pơtâp vâi hdrêng ôh tá xah ngăn phôn râng kŏng dêi ngế nôu mơngế Pơhlăng; cho troăng tơpui tơno rêm hâi dêi tơmối kong têa Ăng-glê… Hiăng chiâng tơpui Pơhlăng, nâ Belly ôh tá kơxiâp hriâm tơ’nôm nâl, nâl Ăng-glê, Ăng-glê Mih, nâl Thụy Điển vâ kô chiâng pêi pro tuor tiô tơdroăng kal vâ dêi tơmối, tơpui ƀă tơmối hên tâ ‘na khôi túa lĕm tro dêi hdroâng kuăn ngo. Ƀă pơlê pơla dêi tơná, nâ H’Belly pơtroh tơdroăng ki hâk vâ ăm kuăn pơlê thăm rak ƀă mâu khôi túa lĕm tro vâi krâ nah:

‘’A mơhnhôk kuăn pơlê teăn ếo pơtâk, pế drôu xiâm, tôu chêng koăng. Á kô cho ngế ki rôe tâi tâng mâu tơmeăm ki mê vâ tê ăm tơmối. Drêng ai hên tơmối troh, á kô rơtế vâi krâ kuăn pơlê tơdah. Tơdroăng hlo tơmối ing Pơhlăng, Mih lăm pôu hiăng mơhnhôk kuăn pơlê tung pơlê hên ‘nâng. Drêng hlo tơmối ing kong têa Pơhlăng, mâu kong têa châu Âu troh, rôe ếo pơtâk hdroâng kuăn ngo, kơchâi plâi pôm, tơmeăm ki tơvâ, kuăn pơlê hiăng loi tơngah mâu tơdroăng ki a tối cho khât. Ing mê, kuăn pơlê hlê  plĕng cho tơná xuân cho mâu ngế ki djâ mơhno khôi túa lĕm’’.

Mâu khu tơmối tăng troh rế hía rế hên, djâ tiô tơdroăng pói vâ ti tăng plĕng ƀă nhuô̆m khôi túa lĕm tro vâi krâ nah lĕm tro phá tơ-ê, pro tơdroăng hâk tơngăm dêi vâi krâ kuăn pơlê Rơđế ƀuôn Tuôr. Tơ’nôm mâu toăng hngêi xŏn châ vêh bro, rơnêu djâ pêi ôm hyô; rêm kơmăng hên tâ mâu roh xah mơhno khôi túa lĕm tro pơlê pơla chuât idrâp chêng koăng, rơtế tung tơdroăng tó ro, tơdroăng phiu ro dêi tơmối ƀă kuăn pơlê. Jâ H’Drian Niê, 80 hơnăm, phiu ro ƀă mâu tơdroăng pơhlêh dêi pơlê tối:

‘’Á phiu ro ‘nâng drêng hlo rế hía rế hên tơmối ôm hyô, tá tung tơnêi têa ƀă kong têa ê, tăng troh Buôn Tuôr. Vâi ôh tá xê to hâk vâ ƀă kong kế tơniăn lĕm mê ối phá krê hâk vâ mâu kơchâi kâ kuăn pơlê ƀă kơchâi krúa lĕm châ kri ing kơdrum hngêi, chiâk deăng. Vâ Buôn Tuôr rế hía rế mơnhông mơdêk ƀă mơhnhôk tơ’nôm hên tơmối, tơdroăng tơpui ƀă nâl Ăng-glê, Pơhlăng cho kal khât. Á pói vâ mâu vâi rơxông nếo kô thăm hriâm nâl kong têa ê dêi tơná. Xua  tơdroăng kố kô kum pin tơdjêp lĕm tro tâ ƀă tơmối lâp plâi tơnêi, djâ Buôn Tuôr chiâng môi tíu troh kro mơdrŏng lĕm ƀă rơkê tâ’’.