Tung khế tŏng kum vâi hdrêng hơnăm kố, mâu khu xiâm, kơvâ cheăng, kong pơlê hiăng mơhnhôk tơlo châ lối 100 rơtal liăn kum 1 rơtuh ngế vâi hdrêng tung lâp tơnêi têa. Krê Khu râng liăn tŏng kum vâi hdrêng Việt Nam hiăng kum 17.800 ngế hdrêng ki ai tơdroăng rêh ối malối xơpá, xơpá ƀă tâi tâng kơxô̆ liăn lối 20 rơtal liăn.

Kố cho tơdroăng ki châ Khu xiâm ngăn cheăng pêi mố đô̆i rong ƀă pơlê pơla ăm ‘nâi a Rôh hôp mơgêi Khế tŏng kum vâi hdrêng hơnăm 2023. Tơdroăng kố châ tơkŭm po a kơxo lơ 10/7, a tíu xiâm ‘mâi mơnhông tŏng kum mâu ngế ki chó chêng tơvê kŏng Thụy An, cheăm Thụy An, tơring Ba Vì, Hà Nội. Khế tŏng kum vâi hdrêng hơnăm kố châ tơbleăng ƀă inâi “Tơdjuôm kŏng kơdroh tơdroăng ki tơdjâk ‘mêi a vâi hdrêng”.

A rôh leh mơgêi, jâ Nguyễn Thị Hà, ngế xiâm phŏ ngăn cheăng pêi mố đô̆i tro rong ƀă rêh ối pơlê pơla hiăng hbru 100 kơxuô tơmeăm ƀă pôu ngăn kơpong ‘mâi mơnhông tŏng kum, kơpong hriâm cheăng, kơpong kâ, kơpong ối dêi vâi hdrêng a tíu ‘mâi mơnhông tŏng kum mâu ngế ki chó chêng tơvê kŏng Thụy An, a cheăm Thụy An, tơring Ba Vì, Hà Nội.