Tơdroăng ki ai khât nôkố sap ing Peăng hdroh Tây Nguyên ăm hlo, troăng pơkâ pêi, troăng hơlâ mơhé hiăng ai hên pơhlêh laga xuân ối mâu tíu ki kreăng kal rĕng tah lôi. Teăng mâ Vi ƀan kong pơlê Lâm Đồng pâ thế Tơnêi têa pơtối kêi đeăng luât tiô troăng tơdâng tơ’mô, môi tuăn; kơdroh iâ hâi khế pro mơ-éa tơnêi têa; tơ’lêi hlâu pơkâ pêi xo tơvêh ƀă xo tơvêh tơnêi ai hâi khế.

Tơdrêng amê, kong pơlê pói vâ rĕng tơpui ƀă pêi pro mâu tơvâ tơvân ‘na pơkâ pêi pro on tơhrik, troăng kơxái mơ’no on tơhrik, yă tơnêi, há yă hnoăng xúa tơnêi ƀă troăng pơkâ pêi xúa tơnêi, tơmeăm tơnêi têa vâ mơ’no liăn cheăng, mơhnhôk mơ’no liăn cheăng. Pakĭng mê, Khu hnê mơhno Vi ƀan Măt trâ̆n Tơnêi têa Việt Nam kong pơlê pơkâ thế kêi đeăng mâu pơkâ ‘na séa ngăn, tiâ tối pơlê pơla, mơnhên inhên hnoăng cheăng mâu kơ koan tung tơdroăng tơmâng xo, tiâ tối ƀă pêi pro tơdroăng pâ thế klêi kơ’nâi séa ngăn.

Teăng mâ  mâu khu pơkuâ, kơvâ cheăng xuân hiăng veăng tơpui tâi ihiâm mơno a 15 tơdroăng tơkêa bro luât ƀă 4 tơdroăng tơkêa bro tơdroăng pơkâ, ki rơhêng vâ tối tơkŭm a Luât Tơnêi tơníu (‘mâi rơnêu), Luât Hngêi ối (‘mâi rơnêu), Luât tê mơdró tơnêi (‘mâi rơnêu), Khu luât Xôi kân (‘mâi rơnêu) lơ mâu luât ối tung kơvâ cheăng lêng, gâk kring tơnêi têa...

Vêh tối ‘na ki kơnâ dêi mâu tơdroăng pâ thế kố, pôa Y Thanh Hà Niê Kdăm, Kăn cheăng tung Tíu xiâm Đảng, Kăn pơkuâ hnê ngăn cheăng Đảng, Kăn pơkuâ Kăn teăng mâ Kuô̆k hô̆i kong pơlê Lâm Đồng tối rơdêi:

‘’Mâu rơkong tơpui dêi kong pơlê ƀă Khu râ kăn pêi cheăng hiăng gum ăm khu râ kăn ai mâu ‘noăng chư chêh ki kal, nhên khât, ai xiâm kối tơdroăng nôkố vâ khu xông tơpui a hneăng hôp má môi cho tung veăng tơpui kêi đeăng mâu troăng hơlâ ing mâu troăng hơlâ dêi Tíu xiâm tơnêi têa. Ƀă mâu rơkong tơpui, pâ thế châ tối a rôh pêi cheăng hâi kố Khu râ kăn teăng mâ Kuô̆k hô̆i kong pơlê kô hriăn plĕng, xing xoăng râ ƀă rah mâu tơdroăng ki xiâm, tơtro vâ veăng a rôh hôp tơno a tôh, tơpui a hngêi hôp kân, klêi mê pơtroh ăm mâu kơ koan Kuô̆k hô̆i, Chin phuh, Ngế pro xiâm hnê ngăn Chin phuh ƀă mâu khu xiâm, kơvâ cheăng Tơnêi têa séa ngăn tơpui ƀă pêi pro tiô hnoăng’’.

Ƀă tơdroăng Kuô̆k hô̆i hbrâ tơkŭm po Hneăng hôp ôh tá tiah hmâ vâ teăm tơdrêng pơkâ mâu tơdroăng ki thâ mơhno ihiâm mơno rơtế, tiâ tối troăng hơlâ ƀeăn ƀĕng xua tơdroăng mơnhông tơdjuôm. Mâu rơkong tơpui tơdrăng, hên tơdroăng ki ai khât nôkố ing Lâm Đồng cho loăng rĕk tơdroăng ki ai khât tiah hlo ƀă mâ má môi ăm tơdroăng ihiâm tuăn mơno ‘’kuăn pơlê ‘nâi, kuăn pơlê tơpui, kuăn pơlê pêi, kuăn pơlê séa ngăn’’.

Pro hlâu mâu tơmeăm ‘na tơnêi, on tơhrik ƀă hngêi trăng troăng klông ôh tá xê to rơkong tiâ tối ăm tơdroăng mơnhông dêi Lâm Đồng mê ối veăng gum păng ‘nâng tung tơdroăng ki pơhlêh dêi tơná ó rơdêi dêi kơpong Tây Nguyên tung hneăng mơnhông mơdêk nếo.