A Dak Lak, Khu kăn Kuô̆k hô̆i kong pơlê tơrŭm ƀă Kŏng an kong pơlê tơkŭm po rôh hôp xo rơkong veăng tơpui tối ƀă tơdroăng tơkêa bro kơxop hlá mơ-éa Luât Hinh sư̆ (‘mâi pơhlêh), Luât Tơrŭm kơ koan séa ngăn tơdroăng xôi (‘mâi pơhlêh) ƀă tơdroăng tơkêa kơxop hlá mơéa Pơkâ ‘na troăng hơlâ pơkâ, tŏng gum tung pơxâu phâk mâu ngế pro xôi luât ai tơdjâk troh cheăng kâ tơnêi têa, cheăng kâ ngế krê, ứng dụng khoa hok – kong ngê̆, pơhlêh nếo, tơmiât pêi rơkê ƀă pơhlêh xúa internet.

Mâu kăn hiăng môi tuăn tơdroăng ki kal pơkâ mâu tơdroăng tơkêa bro luât, tơdroăng pơkâ vâ pêi châ tiô tơdroăng púi vâ ki ai khât. Hên rơkong tơpui tối ‘na tơdroăng ki klâ xoăng hnoăng séa ngăn mâu tơdroăng pơkâ ‘na tơdroăng phâk, ôh tá phâk lơ pơtê pơtân pơsăm tối hnoăng cheăng ƀă ki pro xôi, tơdrêng amê hlối mơ’no tơ’nôm mâu tơdroăng ki pro xôi, inâi ki pro xôi nếo.

Veăng tơpui tối ƀă tơdroăng tơkêa kơxop hlá mơéa Ƀô̆ luât Hinh sư̆ (‘mâi pơhlêh), teăng mâ Khu mơjiâng luât kong pơlê Dak Lak tối tiah kố cheăng xúa mâu rơkong tơpui “xôi inâi bô bối ƀă dêi rơpó”, “tơdroăng xôi hngăm tâ”, “tơdroăng xôi iâ tâ” a khoản 6, Troăng 4 tá hâi tơtro ƀă kih thuât luât pơkâ.

“Tơdroăng xôi cho inâi khê̆n luât dêi ngế ki pro xôi, ôh tá xê tơdroăng tối tơbleăng kơlo ki râ dêi ngế ki pro xôi lơ kơlo phâk. Xua mê, pơkâ thế hriăn ngăn pôi tá xúa mâu rơkong tơpui kố vâ rak vế ki tơdrăng dêi kơxop hlá mơ-éa”.

Ƀă kơxop hlá mơ-éa Luât Tơrŭm kơ koan séa ngăn tơdroăng xôi (‘mai pơhlêh), hên rơkong tơpui tối mâu tơdroăng ki tơvâ tơvân tung cheăng séa ngăn, malối cho drêng tơbleăng pêi túa pơkâ kơ koan séa ngăn péa râ. Thươ̆ng tă Đặng Quang Hưng, Ngế pơkuâ Kŏng an bêng Ea Kao, môi tuăn ƀă cheăng pơhlêh tŭm tơdroăng cheăng, hnoăng pơkuâ dêi ngế cheăng Séa ngăn cho Trưởng lơ Phŏ trưởng Kŏng an râ cheăm, tơdrêng amê hlối pơkâ thế pơtối chêh pro klêi pơkâ vâ rak tơniăn tơdroăng ki tơdrăng.

“Kal pơkâ nhên ‘na xing xoăng, pơkâ thế, tơdroăng pôu râng dêi rêm ngế pơkuâ ƀă troăng hơlâ pơkâ tơleăng drêng ai tơdroăng ki pơhlêh ‘na mâu ngế cheăng; tơdrêng amê hlối hlối mơnhên nhên pro xôi hnoăng pơkuâ dêi ngế ki châ xoăng pêi cheăng xuân môi tiah rêm pâ tung tơrŭm cheăng pơkâ thế. Cheăng ki ôh tá pêi tiô pơkâ mơnhên nhên ngế ki pơkuâ, tơdroăng ki pôu râng ƀă troăng hơlâ pơhlêh teăng kô tơdjâk troh ki ôh tá tơdrăng, tơvâ tung pơla pêi pro tơdroăng pơkâ thế hnê mơhno mâu tơdroăng ki pơsăm tối, pơsăm tơkêng”.

Khu kăn Kuô̆k hô̆i kong pơlê Dak Lak tơmâng xo hên rơkong tơpui tối, pâ thế tiô tơdroăng ki ai khât. Mâu rơkong veăng tơpui tối kô châ tơkŭm, pơtroh ăm Kuô̆k hô̆i séa ngăn tung pơla chêh pro klêi mâu tơdroăng tơkêa bro luât, tơdroăng pơkâ pơtroh a hneăng hôp.

Rơtế a Dak Lak, Kŏng an kong pơlê Lâm Đồng hiăng tơrŭm ƀă Khu kăn Kuô̆k hô̆i kong pơlê tơkŭm po rôh hôp hnê tối, tơbleăng tơdroăng kal ƀă xo rơkong veăng tơpui tối ƀă mâu tơdroăng tơkêa bro luât, tơdroăng pơkâ xua Khu xiâm ngăn Kŏng an cho ngế ki chêh pro. Rôh hôp châ tơkŭm ‘no tơdrêng hlối ‘no tơdrêng ing troăng hyôh internet troh Kŏng an mâu cheăm, bêng, mâu tíu pêi cheăng tung kong pơlê.

Mâu kăn tơkŭm veăng tơpui tối ƀă kơxop hlá mơ-éa Luât hình sư̆ (‘mâi pơhlêh), Luât Tơrŭm kơ koan séa ngăn tơdroăng xôi (‘mâi pơhlêh) ƀă kơxop hlá mơ-éa Pơkâ ‘na troăng hơlâ tŏng gum, pơxâu phâk mâu ngế pro xôi luât ki ai tơdjâk troh cheăng kâ tơnêi têa, cheăng kâ krê, ứng dụng khoa hok, kong ngê̆, pơhlêh nếo tơmiât pêi rơkê ƀă pơhlêh xúa internet. Hên mâu rơkong tơpui tối tiah kố cheăng ‘mâi pơhlêh, ‘mot tơ’nôm mâu tơdroăng pơkâ luât cho tơdroăng pơkâ thế pêi pro tơdrêng tung pơla pơhlêh xúa internet, klâ xoăng ‘mot tơkŭm kơ koan cheăng tơnêi têa ƀă pêi pro kăn pơkuâ kong pơlê péa râ, ing mê pro chiâng troăng hơlâ luât tơdâng tơ’mô, pêi châ tơdroăng púi vâ rak vế kring tơniăn ƀă mơnhông cheăng kâ rêh ối pơlê pơla.

Mâu rơkong tơpui tối ki khât, tro ƀă tơdroăng ki ai khât hiăng châ Khu kăn Kuô̆k hô̆i mâu kong pơlê chêh xo tơkŭm, pơtroh ăm Kuô̆k hô̆i ƀă mâu kơ koan chêh pro kơxop hlá mơ-éa vâ pơtối hriăn ngăn, chêh pro klêi mâu tơdroăng tơkêa bro luât hdrối vâ pơtroh ăm Kuô̆k hô̆i ngăn. Ing mê, pơtối tối rơdêi hnoăng cheăng dêi Khu kăn Kuô̆k hô̆i tung tơdroăng ki tơmâng, chêh xo mâu rơkong kuăn pơlê tơpui tối ƀă djâ tơdroăng ki ai khât mê a Tây Nguyên troh a tíu hôp kân.