Sap apoăng hơnăm troh nôkố, mơhé Tơraih tơƀai Liên Khương thế pơtê ăm tơƀai kơneăng vâ rơnêu bro ăm i lĕm, ôm hyô Lâm Đồng xuân tơdah vâ chê 12 rơtuh rôh tơmối, pêi lo liăn tiô tối hdrối châ lối 33 rơpâu rơtal liăn. Mâu kơxô̆ ki mê ăm hlo ivá mơhnhôk dêi kơpong tơnêi nếo xuân ối kân. Laga, kơ’nâi mâu kơxô̆ tơtêk cho môi tơdroăng kơ-êng tá hâi ai rơkong tiâ kơ-êng. Mê cho pro ti lâi vâ mơnhông châ ki pơxúa dêi kơpong kân rơdâ Đà Lạt, kơpong kân rơdâ Dak Nông ƀă têa kơxĭ drêh  lĕm Bình Thuận vâ toi râng chêng tơmối hên hâi tâ mê.

Hlo rôh tơ’lêi hlâu klêi tơmot chiâng môi, hên kŏng ti pêi ôm hyô hiăng rĕng pro mâu tour tơdjêp kơpong. Peăng kơxo má ngăn mâ hâi to a pêng têa kơxĭ Mũi Né - Kơxê lăm prôk xah hêi kơteăng pơla kơphô̆ ngo Đà Lạt – Hâi kơ’nâi vo plong kayak a long têa Tà Đùng. Môi troăng prôk tơngah xêh pro vâi hâk vâ, laga drêng rup kŏng pêi pro, hên khu tê mơdró thế trâm ‘’tíu ki kât krá’’ hmâ má môi: troăng klông. Pôa Hoàng Công Định, Kăn pơkuâ Kŏng ti pêi cheăng tiô rơnó Tê mơdró ƀă Ôm hyô Dima Tour, tối:

“Ki kal má môi cho rĕng mơnhông châ hngêi trăng troăng klông, tâng ôh kô pá vâ tơdjêp châ mâu tour pơla 3 kơpong Mũi Né – Đà Lạt – Dak Nông. Troăng kân ối trâm hên pá puât. Xuân pói vâ ai môi troăng klông ing Dak Nông troh Đà Lạt, Mũi Né kô chiâng mơnhông mơdêk rĕng tâ vâ mơjiâng hên tour troăng prôk mê kô chiâng prôk dâng 3 troh 5 hâi ăm tơmối ôm hyô mê tơtro tâ’’.

Ôh tá xê to khu tê mơdró, cho tơmối xuân tâ hlo nhên mâu tíu ki kơtê mê. Mâu tíu tơhnah tơhnâp, mâu ‘noăng kĭng troăng kơlêa, tơnêi hmố ối tơprâ tơprĕng klêi kong mêi tơdroăng prôk lăm cho pói tơngah khât cho troăng tơdjêp lĕm pơla têa kơxĭ ƀă kơpong kân rơdâ pơtối chiâng tơdroăng ki tô tuăn ƀă hên ngế. Apoăng khế 7 pơla kố nah, tung rôh lăm ing Phan Thiết to a Đà Lạt ƀă tơrôu tiô troăng kân Tơnêi têa 28, 55, 28B, nâ Triệu Thị Hồng Phúc hên xôh thế kơdroh to rơxế kơtâu têi a mâu tíu tơhnah tơhnâp kĭng troăng kân.

“Ai 4, 5 tíu, kong mêi khía prôk cho tơhnâp hlối. Hlo xâu ‘nâng. Ƀă troăng kân păng kố cho vâ tơhnâp tâi hlối. Tơnêi, hmốu, prêi mêi tơhnâp chu. To lâi troăng kân kơpong kong ngo troăng kơ’vĕng kơ’vong ai to lâi tíu tơhnâp mê á thế pro tât to lâi tíu ngo ăm gá tơniăn, tâng ôh ngăn xâu ‘nâng. Ki mê chiâng prôk tâng mêi ôh tá chiâng prôk, ôh tá khên prôk ôh’’.

A tíu xiâm Đà Lạt, tíu châ ngăn cho “plâi nuih” dêi ôm hyô Lâm Đồng, xuân ối hên tíu ki lôi chúa pro hên ngế mơjo. Plâ lối môi hơnăm hiăng hluâ, on tơhrik bâ eăng a văng Prenn - tíu ki xiâm djâ mot a Đà Lạt môi kơpong xŏn ôh tá pêi cheăng a kơmăng ối tung rơmăng rơmuât. Pakĭng long têa Xuân Hương, môi tơdroăng tơkêa bro kân hên hơnăm lôi chúa mơjiâng chiâng um méa ki tơrôu ƀă pói vâ ‘na môi tíu pơlê kân ôm hyô tiô rơxông nếo.

Mê bu cho môi um méa ki tơ’lêi hlo, tơdroăng ki tơxâng tơmiât hên tâ ối a tơmeăm ôm hyô. Đà Lạt kơdrâm tơmối. Laga tơmối mơhrê liăn tá hâi hên. Pôa Nguyễn Văn Lộc, cho Kăn pơkuâ Khu pơkuâ khôi túa lĕm tro, Tơ’noăng ivá ƀă Ôm hyô kong pơlê Lâm Đồng, nôkố cho Kăn pơkuâ Đảng ủi bêng Xuân Hương – Đà Lạt, tơdrăng mơnhên tối:

“Troh Đà Lạt kơmăng troh 9 chôu cho vêh koi, tâng lơ ton tâ mê prôk lăm hêi tâ tá ôu têa tôu prá nanh mê tâi. Xua mê tơdroăng ki mơ’no hrê liăn dêi tơmối ôm hyô Lâm Đồng ngin cho iâ. Pin thế pơhlêh tuăn tơmiêt nôkố pêi ôm hyô ôh tá xê riân rêm ko mơngế môi khế to lâi ngế tơmối troh ƀă Lâm Đồng. Pin thế tơkŭm vâ tối tơbleăng ăm lĕm, laga tiô á tơmiât kal pơhlêh tung troăng ki pin ngăn, mơnhên tơdroăng nôkố dêi ôm hyô’’.

Troh nôkố troăng prôk la ngiâ mơnhông tơmeăm ôm hyô tơdjêp kơpong klêi kơ’nâi tơmot chiâng môi kong pơlê ki hên ối a mơ-éa; mâu tơmeăm ôm hyô tơdjêp kơpong tơnêi kân -  tíu kân rơdâ – pơlê kân têa kơxĭ tâi tâng xuân tá hâi xúa tâi tâng; tá hâi chiâng inhên mâu troăng vâ prôk ôm hêi, mâu tơmeăm ki má môi ai ivá tơbriât pơla mâu kơpong. Pôa Hồ Văn Mười, Kăn cheăng tung Tíu xiâm Đảng, Phŏ Kăn pơkuâ hnê ngăn Tĭnh ủi, Kăn hnê ngăn Vi ƀan kong pơlê Lâm Đồng, tơdrăng tối:

“Pin mơnhên kơvâ ôm hyô cho môi tung pái trăng ki xiâm dêi tơdroăng cheăng kâ kơ’nâi tơmeăm khoăng tung kơdâm tơnêi, on tơhrik ƀă pêi chiâk deăng xúa kŏng ngê̆ rơxông nếo. Laga á hlo cho tá hâi môi troăng ki môi tuăn sap apoăng troh tá tui lui ƀă tá hâi tơkŭm po krá tơniăn, tơdjêp ƀă khu râ kăn pơkuâ, Khu pơkuâ Khôi túa lĕm tro, Tơ’noăng ivá ƀă Ôm hyô, mâu cheăm bêng vâ mơjiâng tơdroăng ki châ tơƀrê hluâ pơkâ ăm kơvâ ôm hyô’’.

Tơmot chiâng môi hiăng po môi tíu mơnhông mơdêk nếo, laga kơvâ ôm hyô Lâm Đồng kal hên tâ mâu troăng tơmiât ki hôm lơ mâu kơxô̆ ki tơtêk. Bu drêng hngêi trăng troăng klông châ tơdjêp, tơmeăm châ pro nếo, ƀă mâu cheăm bêng tơdjuôm môi troăng pêi cheăng ton xŏn, troăng prôk ti tăng kơpong tơnêi nếo kô ôh tá xê to xŏn tâ mê, mê ối tŭm ivá râng chêng tơmối.