A Hà Nội nếo tơkŭm po Hôp tơno tơdroăng kal tơpui kâ ƀă kong têa ê rôh má 33 ƀă dó inâi ‘’Mơnhông hnoăng djâ troăng ahdrối ƀă pêi pro hnoăng cheăng ki xiâm, đi đo ƀă tơpui kâ ƀă kong têa ê Việt Nam tung chal nếo’’.

Xông tơpui a hôp tơno tơdroăng kal, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối rơdêi pơkâ tơpui kâ ƀă kong têa ê thế păng ‘nâng mơnhông hnoăng djâ troăng ahdrối tung tơdroăng rak hơniâp lĕm, tơniăn ƀă hbrâ tâi tâng kơxô̆ liăn pakong ăm mơnhông tơnêi têa.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ kơvâ tơpui kâ ƀă kong têa ê kal hbrâ, ƀeăn ƀĕng ‘nâi rôh ki tơ’lêi hlâu, tối hdrối tơtro mâu troăng pêi la ngiâ vâ teăm tơdrêng tơbleăng ăm Đảng ƀă Tơnêi têa. Tơdroăng tơpui kâ ƀă kong têa thế tơdjêp krá tơniăn ƀă gâk kring tơnêi têa, kring tơniăn ƀă cheăng kâ, mơjiâng chêng krá khât păng ‘nâng gum pơkâ gâk kring Tơnêi têa ing rĕng, ing hơngế.

Pakĭng mê, pôa pơkâ pơtối mơdêk châ tơƀrê tơpui kâ ƀă kong têa ê hên pâ, hbrâ veăng gum tung mâu troăng pơkâ pêi kơpong ƀă lâp plâi tơnêi. Tơdroăng mơdêk ivá khu kăn ƀô̆ tơpui kâ ƀă kong têa ê ‘’thế ai hiâm mơno lĕm rế rơkê’’ xuân cho hnoăng cheăng ki xiâm vâ tơxâng pơkâ mơdêk tíu cheăng, ki loi tơngah dêi Việt Nam tung lâp plâi tơnêi tung hneăng nếo.