Tơdroăng cheăng kâ rêh ối pơlê pơla dêi tơnêi têa tung 6 khế hdrối nah hlo tơƀrê, cheăng kâ kân tơniăn, mâu tơdroăng châ bro tơdâng tơ’mô châ rak vế tơniăn, bro mơhrê châ hbrâ mơdât a kơlo ki tơtro. Kố cho tơdroăng ki tối tơbleăng a Rôh hôp tối tơbleăng khế 7/2023, xua Khu pơtối cheăng Tơnêi têa tơkŭm po a kơxo lơ 12/7, a Hà Nội.

Pôa Đỗ Thành Trung, ngế xiâm phŏ ngăn khu xiâm pơkâ ƀă ‘no liăn cheăng ăm ‘nâi, GDP 6 khế apoăng hơnăm tâk 3,72%, kơlo má 2 tung mâu pơla hơnăm 2011- 2023. Laga, hlo tơdroăng ki lâp plâi tơnêi ối trâm hên xơpá, cheăng kâ tơnêi têa pin ăm hlo mâu tơdroăng ki tơƀrê, bro mơhrê châ hbrâ mơdât a kơlo ki tơtro. ‘No liăn pêi cheăng sap ing liăn tơnêi têa pơtối châ tơkŭm hên, bro ivá ăm mơdêk cheăng kâ ƀă hên ki ê. Laga, tơdroăng ki roê xo, ƀă tê tơmeăm ngi kong têa ê xuân ối trâm hên xơpá xua hên kong têa pêi pro troăng hơlâ kơtăng ‘na liăn ngân bro kơdroh mâu tơdroăng ki roê xúa ƀă hên ki ê.

‘Na túa pơkâ ăm 6 khế mơ’nui hơnăm, cho kal tơbleăng rĕng tơƀrê tâ nếo mâu troăng hơlâ, vâ ‘mâi mơnhông ƀă mơdêk cheăng kâ. Xuân a rôh hôp, mâu kăn tơmâng Khu tơpui kâ Tơnêi têa tối tơbleăng “Tơdroăng kong têa ê tung kơpong, tơrŭm cheăng tơpui kâ dêi Việt Nam tung 6 khế hdrối nah ƀă tiô tối hdrối tơdroăng cheăng tung 6 khế mơ’nui hơnăm”.