Xông tơpui a hâi tơkŭm xah hêi ro, Đăi tươ̆ng Trịnh Văn Quyết mơnhên, gâk kring Tơnêi têa cho tơdroăng cheăng dêi tâi tâng kuăn pơlê ing pơkuâ dêi Đảng, tung mê, khu Kŏng an kuăn pơlê rak hnoăng ki xiâm. Pói vâ rak tơniăn ing rĕng, ing hơngế thế rak ing xiâm, mê “xiâm cho tuăn ihiâm kuăn pơlê”.

Kăn pơkuâ Pơtâng tối tơdroăng kal Tíu xiâm tơnêi têa pơkâ thế Gia Lai pơtối hlê plĕng ƀă pêi pro châ tơƀrê mâu tơdroăng xiâm tơbleăng a rôh hôp dêi Tíu xiâm Tơnêi têa ‘na mơjiâng rêh ối pơlê pơla, tơniăn, rơkê ƀă Troăng pêi cheăng ton xŏn Gâk kring tơnêi têa; pơhlêh nếo tơdroăng pơtâng tối, mơdêk ivá kâi trâng hdrối tơdroăng ki ‘mêi tung măng internet; thăm tơrŭm pơla Kŏng an, Khu lêng, Măt trâ̆n Tơnêi têa ƀă mâu khu râ tơkŭm hnê ngăn; mơjiâng khu kŏng an păng ‘nâng achê kuăn pơlê, pơ-ô pơ-eăng kuăn pơlê, hlê plĕng kuăn pơlê, xua kuăn pơlê mê gum.