Kong pơlê Dak Lak tơkŭm po rôh hôp mơnhên tối klêi kơ’nâi pêi pro hnoăng cheăng 6 khế apoăng hơnăm, tơbleăng hnoăng cheăng 6 khế mơ’nui hơnăm a hâi lơ 10/7. Tiô tối tơbleăng a rôh hôp, tung 6 khế apoăng hơnăm, cheăng kâ rêh ối pơlê pơla kong pơlê Dak Lak hlo tơniăn. Yă tê kế tơmeăm pêi lo ing chiâk deăng a kong pơlê tiô riân châ vâ chê 24.500 rơtal liăn, tâk 4% tâng pơchông ƀă khế kố hơnăm 2022.

Tâi tâng kơxô̆ liăn châ xo ing tê tơmeăm ngi kong têa ê tiô riân châ 810 rơtuh dollars, tâk 2% tâng pơchông ƀă khế hơnăm nah. Laga, tâi tâng kơxô̆ liăn nâp ăm liăn tơnêi têa kơdroh 16,6% tâng pơchông ƀă khế kố hơnăm nah. Kơxô̆ liăn ‘no ăm tơdroăng cheăng tơdjuôm bu châ 18,1% túa pơcháu dêi kong pơlê. Pôa Phạm Ngọc Nghị, Kăn hnê ngăn Vi ƀan kong pơlê Dak Lak pơkâ thế kăn pơkuâ mâu kơvâ cheăng kal hbrâ rơnáu, pôu râng dêi hnoăng cheăng tâ nếo tung tơpui tối leăng, tăng xiâm kối vâ pơkâ mơ’no troăng hơlâ vâ pơkâ tơleăng mâu tơdroăng ki xơpá tung tơ’mot ‘no liăn cheăng, mơdêk ôm hyô ƀă hên ki ê vâ pêi châ mâu tơdroăng pơkâ mơnhông mơdêk cheăng kâ rêh ối pơlê pơla 6 khế mơ’nui hơnăm.

Malối, mâu khu râ, kơvâ cheăng, kong pơlê kal ‘mâi rơnêu, pơkâ tơleăng tơdrêng hlối tơdroăng ki tơpôu ăm dêi rơpó hnoăng cheăng vâ mơdêk rĕng tơdroăng ki tŏng kum tơdroăng cheăng.