Tung tơdế apoăng hơnăm kố, lâp tơnêi têa hiăng ai 23 rôh xía vâ ‘na on tơhrik tung kuăn pơlê pro 11 ngế hlâ ƀă 23 ngế tro rong. Ki xiâm cho xua kuăn pơlê hmôu pơ bro, krâ xêh kế tơmeăm, kơƀeăng tơbleăng mơđah, kế tơmeăm ki ai on tơhrik, bro xôi tơdroăng ki kơtăn tơniăn on tơhrik ki rơdêi, thăm nếo xúa pêi pro tơdroăng ki tong kế tơmeăm dêi kơvâ on tơhrik.

A kong pơlê Dak Lak, vâ hbrâ mơdât xía vâ ‘na on tơhrik tung kuăn pơlê, Kơvâ on tơhrik Dak Lak hiăng mơdêk hnoăng cheăng séa ngăn rêm khế troăng kơxái, tơrŭm ƀă tơdroăng ki tơbleăng, xoăng kơtâ hlá mơ-éa hnê tối ‘na tơdroăng ki rak vế tơniăn ‘na on tơhrik ai ivá rơdêi, hnê xúa on tơhrik tơniăn. Malối cho hdrối vâ mot tung rơnó mê khía mơhot kân hơnăm kố, mâu tíu pêi cheăng hiăng tơrŭm ƀă khu kăn pơkuâ cheăm, tơring đi đo hnê tối vâ mơdêk hiâm mơno ki hlê plĕng ăm ngế ki xúa on tơhrik.

Tung mê, kơvâ on tơhrik pơchân pôi tá krâ ăng ten hrik mơ’noh hyôh, kơtúa kơxái, tơdrá, pêt loăng ôh tá tro tơdroăng pơkâ kơtăn ăm tơniăn; pôi tá pĕng chêm ki hrâp a kơxái on tơhrik, hngêi ‘măn kơmăi on tơhrik; pôi tá kơ’nêi kleăng hlá mơ-éa, chhá, kế ki kơneăng a chê troăng kơxái on tơhrik; pôi tá xúa trăng on tơhrik, hngêi on tơhrik vâ kât kơpôu, ro ƀă hên ki ê.

Tơdrêng mê, rêm hâi, tung pơla trâ văng kĭng troăng, rơnêu on tơhrik ăm kuăn pơlê, séa ngăn on tơhrik a mâu trạm biến áp, kŏng nhân cheăng ‘na on tơhrik hiăng tơrŭm séa ngăn ƀă troăng kơxái ‘na rŏng kŏng-tơ, hnê tối troh rêm ngế kuăn pơlê rak vế tơniăn tung xúa on tơhrik.