Đi đo séa ngăn vâ ‘nâi mâu tơdroăng tơdjâk troh tơdroăng tơ’mot ƀă rah iâ mơngế pêi cheăng, pro rế lĕm mơngế pêi cheăng, đảng viên Nguyễn Văn Lập, ối a cheăm Hòa Thắng, pơlê kong kơdrâm Buôn Ma Thuột tối kô cho tơdroăng pơ’lêh dêi kăch măng. Pôa  ƀă hên  kuăn pơlê loi tiah kố, tơdroăng pơ’lêh kố kô po troăng tung la ngiâ mơnhông tơnêi têa.

“Tơdroăng pơkâ ki vâ mơnhông cheăng kâ kô po rơdâ tâ, pro tơ’lêi hlâu vâ mơdêk mâu ngế ai tuăn tơmiât ki nếo, kuăn pơlê ‘nâi hên tâ, trâm tơpui hên tâ nếo, ƀă mơni tơdroăng rêh ối  túa lĕm tro xuân hên tâ há’’.

Ƀă jâ Ngô Thị Minh Trinh, phŏ kăn hnê ngăn Đảng tơring Krông Pač, kong pơlê Dak Lak, tơdroăng mơgêi pêi cheăng dêi khu kăn pêi cheăng râ tơring, ƀă mâu kăn ƀô̆, mâu ngế pơkuâ mâu tíu pêi cheăng  rơtế ƀă rêm râ chiu tơdjâk hên má môi. La tơdroăng pro rế lĕm mâu ngế pêi cheăng ăm tơnêi têa cho môi tơdroăng pơkâ ki kal, ai pơxúa ăm tơdroăng cheăng tơdjuôm mê rêm kăn ƀô̆, đảng viên a tơring  xuân hlê plĕng nhên tơdroăng cheăng pêi dêi tơná.

 “Rôh apoăng mơni ai tơdroăng ôh tá tơniăn, tô tuăn cho tơdroăng ki ôh tá chiâng ví. La ing tơdroăng hnê tối, tơpui tơno, hnê nhên, mê kăn ƀô̆, đảng viên ƀă mâu ngế pơkuâ, ing mê môi tuăn pêi pro xua tơdroăng mơnhông tơdjuôm dêi tơnêi têa”.

Tiô troăng hơlâ tơ’mot râ cheăm hiăng tơbleăng a hneăng hôp rôh má 11 khu kăn xiâm Đảng hneăng 13, kơxô̆ mâu cheăm kô kơdroh dâng 70% tơkéa vâ tối ai 3 to cheăm tơ’mot tơdjuôm chiâng 1 to cheăm. Mâu kăn ƀô̆ đảng viên  a Dak Lak xuân tối, tung pơla pêi cheăng kô ôh tá kâi ví xuân trâm mâu tơdroăng xơpá apoăng tơ’mot tơdjuôm, ing tơdroăng hmâ tung rêh ối, ki kơtăn tơnêi tíu ta troh hyôh kong prâi pêi cheăng nếo.

Laga, ing tơdroăng djâ troăng ahdrối tung pêi pro ƀă hnoăng cheăng dêi kăn ƀô̆, đảng viên tíu kô hiăng pro tuăn loi ƀă tơbleăng troăng hơlâ krá tơniăn. Jâ Cao Thị Thúy Nga, Kăn hnê ngăn Đảng ủy cheăm Tân Lập, tơring Krông Ƀuk, kong pơlê Dak Lak, ăm ‘nâi: 

“Ngin pơtroh hên kăn ƀô̆ lăm pêi cheăng a cheăm, vâ pêi tro tâ nếo mâu tơdroăng ki pêi cheăng kum kuăn pơlê, tro ƀă tơdroăng Kăn ƀô̆ cho hnoăng ki mơhno dêi kuăn pơlê’’. Mơhé tơdrêng môi hdroh thế xo pêi hên tơdroăng cheăng, la ƀă tuăn mơ-eăm khât, ngin đi đo ‘nâi nhên: ối môi hâi pêi cheăng pro kăn ƀô̆ mê ối  pêi cheăng tâi hiâm mơno ki tơná hlê xua tơdroăng cheăng ƀă xua kuăn pơlê”.

Nôkố, lâp tung kong pơlê Dak Lak ai 180 tíu pêi cheăng râ cheăm (mê cho cheăm, bêng, pơlê kân), klêi kơ’nâi tơ’mot  tiô tối hdrối ối 45 tíu pêi cheăng, kơdroh 75%. Tiô pôa Nguyễn Hoài Dương, Ngế pơkuâ ngăn tơdroăng kal kí ƀă Hnê mơhnhôk cheăng Đảng kong pơlê Dak Lak, tơdroăng xing xoăng pro rế lĕm mê ôh tá xê to veăng ‘no hnoăng pro kơdroh tơkŭm pêi cheăng dêi khu kăn, pro rế lĕm kăn ƀô̆ mê ối cho rôh vâ xoăng râ, xoăng hnoăng cheăng pêi rơdêi tâ ăm râ cheăm. Ing mê, mâu kăn achê kuăn pơlê tâ, pơxúa ăm kuăn pơlê tơ’lêi hlâu ƀă tơƀrê tâ.

“Tung pơla hdrối kô hía nah, mâu kong pơlê ƀă mâu kơvâ  cheăng hiăng chôa xing xoăng pro rế lĕm khu pêi cheăng ăm tơnêi têa ƀă troh nôkố tŭm tơdroăng xuân dế prôk tro troăng. La ngiâ kô ah, ngin kô pơtối mơnhông rơdêi tơdroăng xing xoăng pro rế lĕm tơ’mot kong pơlê, tah lôi tơring, tơ’mot râ cheăm. Kố cho troăng hơlâ pêi pro tro tơdroăng, tiô tơdroăng ki hlo khât, kum tơleăng mơnhên klêi mâu tơdroăng  ki xơpá nôkố ƀă pơtối rak ki tơƀrê tơmeăm khoăng dêi tơrêm cheăm tơring, kong pơlê, veăng mơnhông cheăng kâ-rêh ối rơtế ƀă pro tơniăn cheăng lêng, kring tơniăn krá kak ton”.

Tơdroăng tơ’mot mâu tíu pêi cheăng a Dak Lak ôh tá xê to pơkâ thế pro ki kal tung tơdroăng pơ’lêh nếo, mê ối vâ mơhno ki mơ-eăm pêi pro tơdroăng kal kí rơdêi tung tơdroăng mơjiâng khu kăn pêi cheăng iâ mơngế, pêi  cheăng rĕng tơƀrê, pêi cheăng pơxúa ăm kuăn pơlê lĕm tro tâ. Mơhé la ngiâ ối hên pơloăng mơnúa, la ƀă tơdroăng môi tuăn trâu rơdâ, tơdroăng cheăng pêi dêi mâu kăn ƀô̆, đảng viên ƀă mơngế ki môi tuăn dêi kuăn pơlê, kong pơlê Dak Lak dế chôa ‘lâng pơ’lêh pêi troăng hơlâ ki kân dêi Đảng, Kuăn pơlê ăm tơtro khâp, pêi kơtăng ƀă tơdroăng ai tuăn loi.

Mâu tơdroăng ki mơ-eăm nôkố cho xiâm ki vâ pro ăm krá kak vâ Dak Lak  drêng pơxiâm mot pêi cheăng tung mâu hơnăm mơnhông tơƀrê-ƀĕng ƀeăn rơkê plĕng, nôkố ƀă krá tơniăn ton ta troh tung la ngiâ anh.