Kơxo lơ 12/7, Hô̆i đong hnê ngăn kong pơlê Dak Lak po hneăng hôp má 6. Kố cho hneăng hôp tiah hmâ tơdế hơnăm vâ séa ngăn, mơnhên tối tơdroăng pêi pro pơkâ dêi Hô̆i đong hnê ngăn kong pơlê ‘na hnoăng cheăng mơnhông mơdêk cheăng kâ rêh ối pơlê pơla 6 khế apoăng hơnăm ƀă pơkâ mơ’no hnoăng cheăng, troăng hơlâ pêi pro 6 khế mơ’nui hơnăm.

Tối tơbleăng a hneăng hôp, tung 6 khế apoăng hơnăm kố, cheăng kâ, rêh ối pơlê pơla kong pơlê Dak Lak hlo tơniăn. Ki kơnía tung tâi tâng kế tơmeăm tung kong pơlê tiô riân châ va chê 24.500 rơtal liăn, tâk 4% tâng pơchông ƀă khế kố hơnăm 2022.

Tâi tâng kơxô̆ liăn châ ing tê tơmeăm ngi kong têa ê tiô riân châ 810 rơtuh dollars, tâk 2% tâng pơchông ƀă khế kố hơnăm nah. Laga, tâi tâng kơxô̆ liăn nâp ăm tơnêi têa kơdroh 16,6% tâng pơchông ƀă khế kố hơnăm nah, mâu tơdroăng cheăng tơ’mot ‘no liăn pêi cheăng, ‘mâi mơnhông pêi cheăng kâ tê mơdró, tăng cheăng pêi, kơdroh kơtiê krá ton trâm hên xơpá, mâu tơdroăng pơkâ dêi tơnêi têa tơbleăng ối hrá ƀă hên tơdroăng ki ê.

Hneăng hôp rôh kố, pakĭng tơpui tơno, pơkâ mơ’no mâu troăng hơlâ mơnhông mơdêk cheăng kâ rêh ối pơlê pơla 6 khế mơ’nui hơnăm, Hô̆i đong hnê ngăn kong pơlê Dak Lak kô tơpui tơno, ăm rơkong veăng tơpui tối hên tơdroăng, tơdroăng tơkêa ki kal dêi kong pơlê; tơpui tối leăng mâu tơdroăng ki xơpá, tơvâ, kal châ tŏng kum, pêi pro nhên mâu xiâm kối vâ pêi pro hnoăng cheăng 6 khế mơ’nui hơnăm.