Tiô pơkâ pêi hneăng hơnăm 2026 – 2030, tơmiât pêi troh hơnăm 2050, Dak Lak mơnhên troăng prôk la ngiâ mơjiâng 3 kơpong cheăng kâ mê cho Kơpong cheăng kâ Peăng hdroh Phú Yên, Kơpong cheăng kâ ki phá tơ-ê peăng mâ hâi Luô ƀă Kơpong cheăng kâ tíu tê mơdró ngi kong têa ê Dak Ruê. Tơdrêng amê, kong pơlê pơkâ pêi 31 kơpong hngêi kơmăi kơmok ƀă tâi tâng ƀăng deăng lối 8.900 ha. Laga, nôkố nếo ai 7 kơpong hngêi kơmăi kơmok ƀă 21 kơpong hngêi kơmăi châ pơkâ pêi inhên, mơ’no liăn mơjiâng pro tơmeăm khoăng; tung mê, bu ai iâ tê châ kơlo tơbêng châ 100%.

Tiô pôa Đỗ Bá Phú, Kăn pơkuâ Kơ koan xiâm Mơhnhôk mơ’no liăn teăng tê mơdró (Khu xiâm pơkuâ Kơmăi kơmok Tê mơdró), vâ mơdêk châ tơƀrê mơ’no liăn cheăng ƀă mơdêk ivá ki pro vâi hâk vâ dêi mâu kơpong, tíu hngêi kơmăi kơmok, Dak Lak kal mơjiâng hngêi trăng troăng klông tiô troăng tơdâng tơ’mô, tơdjêp krá ƀă tơdroăng cheăng logistics tơdjêp kơpong ƀă tơdroăng mơjiâng on tơhrik krúa lĕm. Tơdroăng kố ôh tá xê to gum kơdroh kơxô̆ liăn mơ’no cheăng mê ối mơdêk châ tơƀrê pêi cheăng tung ton khế.

“Mâu kơpong hngêi kơmăi kố thế pro tung pơkâ pêi logistics tơdjêp kơpong, tơdjêp châ Peăng mâ hâi Lo – Peăng mâ hâi Luô, pơla Tây Nguyên ƀă mâu Kơno têa kơxĭ. Vâ kơdĭng on tơhrik, mê mâu kơpong, tíu hngêi kơmăi kơmok châ pơlâ pêi nếo thế châ rơnêu nếo tơkŭm, pro tơ’lêi hlâu vâ mơnhông mơdêk mâu tơdroăng tơkêa bro on tơhrik krúa lĕm kong prâi tung kơpong, tíu hngêi kơmăi kơmok. Tâng ôh tá châ mơjiâng, tơdjêp tơkŭm mê kơxô̆ liăn mơno liăn cheăng kô tơpôu hên, tâi hên liăn ngân ƀă pro pá ăm kơvâ on tơhrik’’.

Tơdroăng ki nhên khât ăm hlo, tíu ki kreăng kân má môi nôkố dêi Dak Lak ôh tá xê ối a hngêi trăng, troăng klông kơpong hngêi kơmăi kơmok mê  ối a ivá tơdjêp logistics ƀă kơno têa kơxĭ, tơraih tơƀai ƀă ƀă mâu troăng pêi pơto ki ê. Drêng kơxô̆ liăn logistics ối hên, hâi khế pơto ối ton xŏn, pơxúa ‘na kơpong tơmeăm ki bro pá vâ pơhlêh chiâng tơ’lêi hlâu tơxup tơbriêt dêi kơvâ uâ bro tơmeăm trâu hơngế.

Đăi tă Nguyễn Thành Sơn, Kăn hnê ngăn Hô̆i đong pơkuâ Kŏng ti tơlo liăn Kơno tuk Cát Lái (Pơlê kong kân Hồ Chí Minh) tối ăm ‘nâi, logistics cho ‘’troăng mơheăm’’ dêi tơdroăng cheăng kâ. Tơdrêng amê, Dak Lak nôkố xuân kơnôm hên a pơto tơmeăm troăng kân; pơto troăng têa kơxĭ ƀă troăng tơƀai tá hâi châ pêi pro châ tơƀrê. Xua mê, kong pơlê kal rĕng mơjiâng mâu tíu xiâm logistics tiô rơxông nếo vâ kơdroh kơxô̆ liăn ƀă mơdêk tơdroăng pơto kế tơmeăm khoăng.

“Hriâm mâu ƀai hriâm lâp plâi tơnêi, pin thế djâ tơmeăm troh kơno ki trĕng mê tơdroăng prôk lăm kô rĕng tâ. Tung logistics, kơno trĕng cho tíu pơto péa pâ troăng, rế cho tíu xiâm rak ‘măn, tâ tung kơthung, tíu pơto kế tơmeăm, rế cho tíu mơdêk ki kơnâ tơtêk. Kơno trĕng cho tíu pơtroh tơmeăm tê rôe ngi kong têa ê. Á hlo a kong pơlê Dak Lak, tíu ki tro má môi cho kơpong cheăm Ea Ô, kố cho tíu kơtăn kong pơlê Khánh Hòa dâng 60km, tơtro ƀă kơvâ logistics’’.

Klêi kơ’nâi tơmot chiâng môi, Dak Lak ai ƀăng deăng lối 18.000km karê, ối má pái lâp tơnêi têa, tơkŭm tá ki tơ’lêi kơpong pêi lo tơmeăm pêi lo ing chiâk deăng hên má môi a peăng mâ hâi Luô ƀă mâu kơno tuk têa kơxĭ, kơpong hngêi kơmăi kơmok, cheăng kâ têa kơxĭ a peăng mâ hâi Lo. Tơdroăng ki tơdjêp kố po rôh tơ’lêi hlâu mơjiâng chiâng mâu tơdroăng ki kơnâ đi đo ing mơjiâng pro, uâ bro troh tê ngi kong têa ê. Laga, vâ uâ bro tơmeăm ki ai hlâu chiâng tơdroăng ki vâ tơtêk, ƀai toăn hngêi trăng troăng klông hngêi kơmăi kơmok ƀă logistics kal châ tơpui ƀă pêi pro tơdâng tơ’mô.

Tiô pôa Đào Mỹ, Phŏ Kăn hnê ngăn Vi ƀan kong pơlê Dak Lak, kong pơlê dế tơkŭm rơnêu nếo pro mơ-éa rêh ối cheăng kâ ƀă tơnêi têa, kêi đeăng pơkâ pêi, kơpong hngêi kơmăi kơmok, mơ’no liăn mơjiâng hngêi trăng troăng klông kơno tuk têa kơxĭ ƀă logistics vâ mơjiâng tơdroăng châ tơƀrê ăm kơmăi kơmok uâ bro trâu hơngế ƀă mơdêk ki kơnâ tê tơmeăm ngi kong têa ê.

“Khu pơkuâ Kơmăi kơmok Tê mơdró, Khu pơkuâ Kơpong cheăng kâ Phú Yên ƀă mâu kơ koan ki tơdjâk tơkŭm tŭm tâi tâng tham luâ̆n, rơkong tơpui a hôp tơno vâ tơbleăng Vi ƀan kong pơlê ai hnê mơhno inhên. Tơbleăng inâi mâu tơdroăng tơkêa bro ki xiâm, hngêi trăng troăng klông kơpong, tíu hngêi kơmăi kơmok uâ bro trâu hơngế ƀă logistics hneăng hơnăm 2026 - 2030 vâ hbrâ mơhnhôk mâu tơdroăng hnê thế mơ’no liăn cheăng. Pơkâ mâu troăng hơlâ ki phá tơ-ê '‘na tơnêi tơníu, tơdroăng ăm mung liăn, mơhnhôk mơ'no liăn tơnêi têa, tŏng gum pơhlêh xúa kŏng ngê̆, pêi cheăng tơbleăng mâu kăn ai hnoăng xuân môi tiah Tíu xiâm tơnêi têa séa ngăn, tơbleăng troăng pêi pro tơtro tŏng gum ăm khu tê mơdró'’.

Ki tơ’lêi hlâu ‘na ki kân, kơpong mơjiâng tơmeăm ƀă tíu lo a têa kơxĭ bu păng ‘nâng mơnhông drêng châ tơdjêp ƀă troăng logistics tiô rơxông nếo ƀă hngêi trăng troăng klông hngêi kơmăi kơmok tơdâng tơ’mô. Ƀă mơnhên troăng prôk la ngiâ kêi đeăng pơkâ pêi, mơnhông mâu tíu xiâm logistics, mơdêk uâ bro trâu hơngế ƀă mơhnhôk mâu khu mơ’no liăn cheăng ton xŏn, Dak Lak dế chôa ‘lâng pêi pro mâu pơkâ chiâng tơdroăng ki tơtêk nếo ‘na kơmăi kơmok uâ bro tơmeăm ƀă logistics dêi kơpong Tây Nguyên - kong tơbăng pá hdroh peăng Tơdế Tơnêi têa.