Vi ƀan hnê ngăn kong pơlê Dak Lak hiăng ai Pơkâ kơxô̆ 25/2026 pơkâ thế kơvâ Ngăn Hnê hriâm ƀă Hnê mơjiâng tuăn ngôa rơkê rơtế ƀă mâu cheăm kong pơlê mơdêk séa ngăn, tăng ngăn tơdroăng xo mâu kơxô̆ liăn nâp a hngêi trung; pơxâu phâk kơtăng mâu ngế ki lâi xo liăn nâp ôh tá tro pơkâ. Mâu kơxô̆ liăn nâp thế tro mơngế, tro tơdroăng, tro pơkâ ƀă châ tơbleăng tơdrăng vâ nôu pâ, hok tro 'nâi, veăng séa ngăn.

Tung pơla kong pơlê Dak Lak nếo xing xoăng, tơkŭm po nếo mâu hngêi trung hriâm. Lâp kong pơlê nôkố ối 625 tíu hnê hriâm dêi tơnêi têa klêi kơ'nâi kơdroh lối 600 tíu xiâm hnê. Tơdroăng tơniăn tơkŭm po, rak tơniăn tơdroăng hnê hriâm athế rơtế ƀă pơkuâ rak ngăn krá ‘na liăn ngân hngêi trung, ví pro mâu kơxô̆ liăn ki nâp lơ pro pá ăm kơ mâu nôu pâ.

Khu pơkuâ Hnê hriâm ƀă Hnê mơjiâng tuăn ngôa rơkê Dak Lak xuân pơkâ thế mâu hngêi trung pêi pro tŭm troăng hơlâ tŏng kum hok tro, malối cho hok tro ai tơdroăng rêh ối pá puât, hok tro a kơpong hdroâng kuăn ngo; ôh tá ăm tơdroăng veăng tơlo liăn apoăng hơnăm chiâng tơdroăng ki pá puât ăm mâu rơpŏng hngêi. Tơdrêng amê, Khu tơbleăng kơxô̆ phôn krếo tơdrêng vâ tơdah xo rơkong tơpui tiâ tối dêi kuăn pơlê. Kố châ ngăn cho môi tung mâu troăng vâ teăm châ hlo, 'mâi rơnêu mâu tơdroăng ki ôh tá tro tung xo veăng tơlo kơxô̆ liăn a hngêi trung.

Jâ Lê Thị Thanh Xuân, Ngế pơkuâ Khu ngăn Hnê hriâm ƀă Hnê mơjiâng tuăn ngôa rơkê kong pơlê Dak Lak, ăm 'nâi kơvâ kố hiăng teăm tơbleăng mâu hlá mơ-éa hnê mơhno pơkuâ rak liăn ngân, kế tơmeăm, pơcháu klêi kơ'nâi xing xoăng ƀă mâu kơxô̆ liăn xo apoăng hơnăm hriâm. Khu pơkuâ hnê hriâm ƀă hnê mơjiâng tuăn ngôa rơkê Dak Lak pơkâ thế mâu tíu hnê hriâm pêi pro tro pơkâ sap ing apoăng hơnăm hriâm; tơdroăng pro xôi kô châ séa ngăn, 'mâi rơnêu ƀă pơxâu phâk tro tiô pơkâ.

“Mâu tơdroăng ki tơdjâk troh kơxô̆ liăn xo apoăng hơnăm hriâm mê ngin xuân hiăng hnê mơhno mâu hngêi trung tơkŭm pêi pro tro kơtăng. Mâu kơxô̆ liăn xo apoăng hơnăm hriâm xuân teăm ai hlá mơ-éa vâ 'mâi rơnêu, rak tơniăn ôh tá pro chiâng ai mâu tơdroăng ki tơdjâk troh tơdroăng ki pro pơxúa ăm dêi tơná, mâu tơdroăng ki pro pá 'na liăn ngân, pá puât ăm hok tro".