Pêi pro tiô hlá mơ-éa Pơkâ 57, hơnăm kố kong pơlê Dak Lak kô xoăng ăm lối 1.000 rơtal liăn ăm khoa hok kong ngê̆ ƀă hơ‘lêh nếo hriĕn plĕng ki nếo, kô hlối pơtối tâk tung mâu hơnăm la ngiâ. Laga, troh nôkố kong pơlê bú nếo xoăng ăm dâng 30 rơtal liăn ƀă kơxô̆ liăn ki mê xuân hâi châ xúa tâi.

Pôa Cao Đình Huy, Rak ngăn Liăn ngân, ăm ‘nâi Dak Lak tá xê ôh tá ai tŭm liăn ăm pêi cheăng ‘na khoa hok, kong ngê̆ ƀă hơ’lêh hriăn plĕng ki nếo. Ƀă mâu luât pơkâ kơjo kum dế châ xúa, khu mơdró kŭn ƀă krâ kơvâ  kô châ kơjo kum troh 100 rơtuh liăn rêm hơnăm. Mâu tơdroăng cheăng tăng ‘nâi plĕng khoa hok mê châ liăn ngân tŏng gum sap 50% troh 100% kơxô̆ liăn mơhá mơngế pêi cheăng, rôe tơmeăm ki kô ki mê ƀă mâu tơmeăm hbrâ vâ pêi. Laga, kal mơjiâng mâu tơdroăng tơkêa bro, pâ thế tŭm nhên vâ hleăng vâ tơbleăng pêi.

Peăng khu mơdró, pôa Phạm Ngọc Duy Liêm ai tối tiah kố, kơchơ mơdró nôkố ôh tá tá ai tŭm phần mềm lơ mâu tơdroăng vâ pêi cheăng ƀă kong ngê̆. Laga, khu mơdró thế ‘nâi nhên tơná kal ki klâi, ƀă tơdroăng pá ki lâi kal mơnhên ƀă kong ngê̆, ing mê tối tơdroăng pâ thế nhên ƀă khu mơdró kong ngê̆.

“Mâu khu mơdró kong ngê̆ ngin dế ôh tá ai tŭm cho tơdroăng pâ thế ing khu mơdró, tơkéa vâ tối pin thế tơpui tơno ăm dêi rơpó ‘nâi pơla péa pâ, ôh ti xê to khu mơdró kong ngê̆ troh mơđah tơbleăng dêi kong ngê̆ mê cho mâu khu mơdró kô thế tối tơbleăng mâu tơdroăng ki pá, ki hâi hlê, tối tơbleăng tơdroăng ki xối pá mê vâ khu mơdró kong ngê̆ tăng troăng pro ăm”. 

Mâu kăn pâ thế, ƀă ki ai hlâu ‘na tơmeăm khoăng pêi lo ing chiâk deăng, uâ pơliê pro tơmeăm ki pê lo ing chiâk deăng ƀă ôm hyô, Dak Lak kô pêi ahdrối mâu tơdroăng ki pá môi tiah ‘na chiâk deăng rơkê plĕng, tăng xiâm rêi tơmeăm pê lo, rak ngăn pêi chiâk deăng, uâ pơliê pro tơmeăm pê lo ing chiâk deăng ƀă ôm hyô rơkê plĕng: mơjiâng tíu vâ ngăn vâ ‘nâi ‘na kŏng ngê̆, tíu mơdró kâ mơhno ăm hlo tơdroăng ki pá vâ mâu tíu pêi cheăng kong ngê̆ mơnúa pêi ngăn troăng hơlâ pêi pro tung pơla 3-6 khế; tâng ăm hlo pêi pro chiâk tơƀrê mê kô pơtối po rơdâ troh hên tíu.

Pôa Đỗ Hữu Huy, Kăn hnê ngăn Vi ƀan kong pơlê Dak Lak hlo, ki hên khu mơdró tung kong pơlê cho khu mơdró kŭn ƀă lối kŭn. Tung pơla xúa ứng dụng kong ngê̆, pái tíu ki pá tơvâ tơvân kân cho liăn vâ ’no pêi cheăng, tăng mơngế pêi cheăng ƀă tuăn tơmiât ôh tá vâ pơ’lêh. Xua mê, vâ tah ki xơpá, kong pơlê mơhnhôk khu mơdró hbrâ ‘no liăn a kong ngê̆ ki xiâm chiâng ăm phêp, hlối mơdêk tơrŭm pơla khu mơdró ƀă mâu kăn, hngêi trung đăi hok, tíu ki tăng ‘nâi plĕng ƀă mâu ngế rơkê ‘na kong ngê̆.

“Mâu khu mơdró thế pơ’lêh tuăn tơmiât, ‘na túa rak ngăn, kal thế mơjiâng ki lĕm tro hơ’lêh hriăn plĕng ki nếo tung khu tíu pêi cheăng. Má péa, pâ thế tơmâng khât a tơdroăng ki lâi rơdêi dế kong pơlê, cheăm, tơmâng khât troh túa tơrŭm cheăng “pái khu, khu mơdró chêh inâi tơmeăm vâ rôe ƀă mâu khu mơdró thế chêh inâi mâu hngêi trung tung kong pơlê, mâu tíu xiâm tăng ‘nâi plĕng ƀă mâu ngế rơkê ‘na kong ngê̆ tung kong pơlê ƀă kong pơlê ki ê, khu mơdró kal ki klâi, chêh inâi tơmeăm ki mê vâ Tíu xiâm, tíu pêi cheăng, lơ mâu hngêi trung kô tơleăng mơnhên ăm tơdroăng ki pá tơvâ tơvân mê”.