Sap apoăng hơnăm troh nôkố, kơpong cheăng kâ ƀă mâu kơpong pêi cheăng ƀă kơmăi tung kong pơlê hiăng tơ’mot hên tơdroăng tơkêa bro ki nếo tung kơvâ cheăng ƀă kơmăi uâ pơliê ƀă  pro on tơhrik Kơxô̆ ki chêl boăng a mâu kơpong hngêi kơmăi dế pêi cheăng châ dâng 92%.

Kơpong cheăng kâ Nam Phú Yên ƀă mâu kơpong hngêi kơmăi hiăng tơ’mot châ 133 tơdroăng tơkêa bro ƀă tâi tâng kơxô̆ liăn ‘no pêi cheăng vâ chê 35.000 rơtal liăn. A rôh hôp tơpui tơno, hên tơdroăng tơdjâk troh ‘na tơmeăm khoăng kơpong hngêi kơmăi mung tơnêi ƀă pro hlá mơ-éa ‘no liăn cheăng hiăng châ khu mơdró tối, pâ thế tah vâ hlâu tung pêi cheăng tê mơdró. Kăn pơkuâ Rak Ngăn kơpong cheăng kâ Nam Phú Yên ăm ‘nâi, tíu pêi cheăng dế mơdêk ‘mâi hơ’lêh túa pro hlá mơ éa - mơdêk hnê vâ khu mơdró pro hồ sơ tơ’lêi hlâu tâ.

Ƀă tơdroăng pâ thế po troăng tơdjêp Kơpong hngêi kơmăi An Phú troh a troăng kân kơxô̆ 14, tiô tối hdrối tơmeăm khoăng mê kô pro klêi hdrối hâi lơ 15/7.

‘Na pơkâ ăm liăn mung tơnêi môi hdroh, Khu rak ngăn kô tơrŭm ƀă hlối hnê mâu khu mơdró pro hlá mơ-éa ‘mâi hơ’lêh tiô pơkâ. Rôh kố, Khu rak ngăn kơpong cheăng kâ Nam Phú Yên xuân diâp hlá mơ-éa pơkâ tiô troăng ‘no liăn cheăng ƀă hlá mơ-éa mơnhên ‘no liăn pêi cheăng ăm 5 tơdroăng tơkêa bro ki nếo ƀă tâi tâng kơ xô̆ liăn ‘no pêi cheăng vâ chê 1.200 rơtal liăn.