Nôkố tung kơmăi tơdroăng nếo ai a cheăm bêng tung kong pơlê Lâm Đồng chôa lâng ‘no liăn pro tơmeăm khoăng, mơdêk pêi tiô troăng nếo nôkố. Lâp tung kong pơlê ai 94 tíu mơ’no rơ‘jiu - um tơvi râ cheăm. Hên cheăm bêng hiăng tơbleăng mơ’no mâu tơdroăng tung rơ’jíu rơkê plĕng, xúa ứng dụng kŏng ngê̆ pơ’lêh hlá mơ-éa chêh chiâng rơkong tơpui, hlối ai tơpui ƀă nâl kuăn ngo. Laga, hneăng hôp xuân mơhno hên tơdroăng ki pá môi tiah tơmeăm khoăng ‘na kŏng ngê̆ thông tin - troăng hyôh phôn hâi troh lâp mâu cheăm bêng;  internet xuân hâi troh a kơpong hơngế hơngo…

Vi ƀan kuăn pơlê dêi kong pơlê Lâm Đồng pâ thế mâu tíu pêi cheăng, kơvâ cheăng, kong pơlê pơtối mơdêk pơ’lêh kơxô̆ tung tơdroăng nếo ai a cheăm bêng; pêi ahdrối ‘no liăn mơdêk pro tơmeăm khoăng kih thuât triô troăng hơlâ tơdâng tơ’mô; krá lĕm tiô túa nếo, po rơdâ troăng mơ’no hyôh tung rơ’jíu xua ứng dụng kŏng ngê̆ thông tin - troăng hyôh phôn; hlối tơmâng ‘mâi mơnhông tâi tâng, hnê mâu kăn ƀô̆ pơkuâ cheăng kŏng ngê̆ thông tin ƀă pơ’lêh kơxô̆ a cheăm bêng.