Hâi lơ 1/10, Đảng ủi Khu mô đô̆i kong pơlê Dak Lak tơkŭm po Hneăng hôp mơgêi pơkâ hnê mơhno pêi pro hnoăng cheăng hneăng má IV hơnăm 2026. Tung pơla hdrối kố nah, Đảng ủi Khu pơkuâ mô đô̆i kong pơlê Dak Lak hiăng pơkuâ khu lêng pêi klêi mâu hnoăng cheăng châ pơcháu; tí tăng 'nâi plĕng ăm Đảng ủi kong pơlê, Vi ƀan kong pơlê pơkuâ, hnê mơhno tâi tâng hnoăng cheăng gâk kring tơnêi têa, gâk kring pơlê pơla ƀă gâk kring tơkăng kong; tơkŭm po ƀlêi chiâng pơtâp kơpong gâk kring kong pơlê ƀă hnê mơhno mâu cheăm, bêng tơkŭm po pơtâp tiô pơkâ.

Tung "Tơdroăng pêi cheăng 500 hâi măng", Đô̆i K51, Khu xiâm pơkuâ mô đô̆i kong pơlê Dak Lak hiăng tơrŭm ƀă mâu khu cheăng tung tơnêi têa ƀă kong têa Kul, tơkŭm ti tăng, chiâ rôu xo, tơkŭm châ 36 kơxêng kiâ mố đô̆i. Tung mê, ai 23 kơxêng kiâ mố đô̆i ti tăng, chiâ rôu xo, tơkŭm tung kong pơlê; 13 kơxêng kiâ mố đô̆i ti tăng, chiâ rôu tơkŭm xo a kong têa Kul. Xông tơpui a hneăng hôp, pôa Lương Nguyễn Minh Triết, Ngế cheăng tung tíu xiâm Đảng, Kăn pơkuâ hnê ngăn Đảng, Kăn pơkuâ hnê ngăn Đảng ủi Mô đô̆i kong pơlê Dak Lak tối nhên pơkâ thế pơtối pêi pro kơtăng Tơdroăng pêi cheăng 500 hâi măng 'na mơdêk ti tăng, tơkŭm ƀă mơnhên inâi kơxêng kiâ mố đô̆i.