Kơxê lơ 7/10, Khu hnê mơhno tăng, tơkŭm ƀă mơnhên inâi kơxêng kiâ mố đô̆i kong pơlê Quảng Ngãi tơkŭm pơto djâ, pơcháu lối 2.200 túa mơheăm kơxêng kiâ mố đô̆i roh má 4 ăm Viện Pháp y Quân đội vâ séa ngăn ADN, kum mơnhên inâi mố đô̆i hlâ tung rôh tơplâ xâ. Hdrối leh pơcháu, mâu kăn pleăng reăng, chôu nhâng, pleăng rơvĭu reăng, mơhno hiâm mơno pâ mơnê mâu ngế hiăng pleăng hnoăng tơná xua tơniăn krê, tơniăn lĕm dêi Tơnêi têa.

Mâu túa kơxêng, xak châ séa ngăn, tơbleăng hồ sơ, hdró ƀă rak ngăn tiô pơkâ. Tung lối 2 khế hdrối kô nah, mâu khu ki xo túa xâk, kơxêng hơnĕng dêi kong pơlê Quảng Ngãi hiăng chiâ lối 13.500 tơnâp a lối hrĭng ilâng kiâ mâu ngế hlâ ai hnoăng, xo lối 9.000 túa tŭm tiô pơkâ séa ngăn. Troh nôkố, kong pơlê hiăng pơcháu lối 6.800 túa ăm Viện Pháp y Quân đội vâ mơnhên ADN, veăng kum mơnhên inâi mâu mố đô̆i ki hâi 'nâi inâi, tíu ối.