A Rôh hôp tơpui ƀă mâu droh rơtăm hơnăm 2026 kố nah, pôa Phạm Anh Tuấn, Kăn xiâm hnê ngăn Vi ƀan Kuăn pơlê kong pơlê Gia Lai tơmâng khât troh mâu tơdroăng pâ thế ki nhên ‘na pơxiâm pêi cheăng, pơ‘lêh nếo hriăn plĕng ki nếo tăng cheăng pêi. Droh rơtăm  pâ thế tơ’mot hên mơngế rơkê cheăng ‘na kong ngê̆ thông tin, ăm vâi ai cheăng pêi amê, kơjo kum khu mơdró, mơnhông ôm hyô ƀă pơ’lêh cheăng tung măng internet tung pêi chiâk deăng.

Ki tơxâng vâ tối, nâ Trần Thị Bé, Ngế pơkuâ Kong ti pêi cheăng tiô rơnó Môi tung khu Trần Lâm Gia Phát, pâ thế xúa mâu tíu pêi cheăng ki ối rơlối klêi xing xoăng pro rế lĕm vâ mơjiâng pro kơdrum mơdâ pơxiâm pêi cheăng hriĕn plĕng ki nếo.

“Pâ Thế kong pơlê mơjiâng túa pro kơdrum mơdâ pơxiâm pêi cheăng hơ’lêh nếo hriăn plĕng ki nếo. Nôkố, a mâu tíu pêi cheăng pro hlá mơ-éa a mâu tíu xiâm dế rơlối hên hĭn, tung pơla mê ai mâu tíu vâ  po mơdâ thế lăm mung tíu pêi cheăng. A púi vâ châ  pêi cheăng a mâu tíu ki tiah mê á vâ ai rôh châ po troăng pro mâu kơdrum mơdâ, ƀă ki kal tâ ai kơ xô̆ liăn ‘măn kơdĭng kơjo kum klêi kơ’nâi pơxiâm pêi cheăng vâ kum mâu vâi pú hơnăm ối nếo tơkâ luâ pơla ki xơpá mê”.

Ing tơdroăng pơkâ kố, pôa Phạm Anh Tuấn, Kăn hnê ngăn Vi ƀan kong pơlê tối khu kăn pơkuâ kô pro tơ'lêi hlâu vâ droh rơtăm tơpui tơno ƀă tơbleăng tơdroăng tơná tơmiât.

‘’Á ối akố hbrâ ai tíu vâ mâu vâi pú tơpui tơno tơdroăng tơmiât. Ngin kô krếo tro mâu khu mơdró ki vâi kal vâ. Vâi hlo tơ-ƀrê, vâi kum mâu vâi pú hlối. Ngin xuân kô ai troăng hơlâ tŏng kum ăm tơná khu mơdró ki mê vâ kum mâu vâi pú. Nôkố khu mơdró ki lâi xuân mơ'no liăn ăm tơdroăng hơ'lêh nếo tơmiât pêi rơkê hlối. Vâi pú thế khên tơnôu pêi ƀă hiâm mơno pleăng hnoăng cheăng, pôu râng hnoăng cheăng tơná".

Hiâm mơno khu râ kăn pơkuâ rơtế prôk xuân châ mơhno ing tơdroăng "Kuăn pơlê, khu mơdró kâ kơ-êng - Khu râ kăn pơkuâ kong pơlê Gia Lai tiâ", pơxiâm sap ing khế 8/2026, xua Ƀơrô cheăng Vi ƀan kong pơlê tơrŭm ƀă Rơ'jíu ƀă Um tơvi kong pơlê Gia Lai pêi pro. Ing mê, kuăn pơlê, khu mơdró kâ kô chiâng pơtroh kơ-êng 'na troăng hơlâ, luât pơkâ, tơdroăng mơ'no liăn cheăng ƀă tơdroăng tơvâ tơvân 'na pro hlá mơ-éa ing mâu troăng tơdah xo dêi kong pơlê.

Khế 8, tơdroăng tơmâng hên cho ‘na tơnêi tơníu, chêl thiê̆n, xĕn tíu ối ƀă mơnhông mơdêk cheăng kâ krê dêi kuăn pơlê. Mâu khế pơtối kô po rơdâ troh 'mâi hơ'lêh tơdroăng pro mơ-éa,  pơ’lêh pêi cheăng tung măng, pêi chiâk deăng xúa kơmăi kơmok chal nếo, AI, tơdroăng rêh ối pơlê pơla, khăm pơlât ƀă hnê hriâm. Pôa Lê Dũng Linh, Ngế  pơkuâ Tíu xiâm pro mơ-éa kong pơlê Gia Lai ăm 'nâi:

“Mâu tơdroăng kơ-êng tŭm vâ tơmâng xo, tơkéa vâ tối ôh tá xê tơdroăng ki tơdjâk troh săm phoăng, săm tơkêng, tâi tâng ki xơpá, tơvâ tơvâ vân dêi kuăn pơlê, khu mơdró xuân châ tơmâng. Kuăn pơlê, khu mơdró  pơtroh ăm, ngin kô tơdah xo, pơtroh ăm khu râ pơkuâ cheăng tiâ. Kơ koan mê thế tơleăng mơnhên tơdrêng há”.

A Gia Lai, tơmâng kuăn pơlê ôh tá xê to tơpui tơno, mê athế châ mơhno ƀă mâu tơdroăng pêi pro ki nhên. Ing tah lôi môi tơdroăng pro mơ-éa, tơleăng môi tơdroăng tơvâ tơvân troh tơmâng môi rơkong pâ thế troh tá tui lui, mê cho troăng khu kăn pơkuâ achê kuăn pơlê, rơtế prôk ƀă kuăn pơlê ƀă khu mơdró. Drêng rơkong tơpui ing tơdroăng ki ai khât châ tiâ ƀă tơdroăng pêi pro, ki kơtăn pơla khu kăn pơkuâ ƀă kuăn pơlê Gia Lai kô rế hía rế châ kơdroh, pro tơ'nôm tơdroăng loi tơngah ƀă ivá ăm mơnhông tơbrê.