Ki nhên, sap ing khế 10, Kăn pơkuâ hnê ngăn Chi ƀô̆, Kăn pơkuâ thôn, Tôh trương tôh kơphô̆ ƀă Kăn pơkuâ hnê ngăn Măt trâ̆n a kong pơlê Gia Lai châ kâ kơxô̆ liăn nếo, ngăn tiô kơ kơpong. A mâu thôn, tôh kơphô̆ kơdrâm kuăn pơlê ƀă mâu kơpong ki ê, kơxô̆ liăn kâ sap ing 5 rơtuh 850 rơpâu troh lối 6 rơtuh 550 rơpâu liăn/môi ngế/môi khế; a mâu kơpong ki ê, sap ing 4 rơtuh 680 rơpâu troh vâ chê 5 rơtuh 400 rơpâu liăn. Mâu hnoăng cheăng veăng pêi ki ê a thôn, tôh kơphô̆ châ tŏng kum 1 rơtuh 900 rơpâu liăn/môi ngế/môi khế; tơdroăng ki tơ'nôm ƀă kơdroh châ môi ngế mê châ kâ tơ'nôm 50% kơlo dêi hnoăng cheăng tơ'nôm.

Pôa Vi Văn Trượt - Kăn pơkuâ hnê ngăn chi ƀô̆ hlối pro kăn thôn Thôn Thanh Sơn, cheăm Chư A Thai tối ăm 'nâi, tơdroăng ki 'mâi hơ'lêh kơxô̆ liăn mơhá sap ing khế 10 cho tơdroăng ki mơhnhôk ƀă mâu ngế ki pêi hnoăng cheăng a kơpong kuăn pơlê rêh ối. Tơná pôa hlối pêi péa hnoăng cheăng mê châ xo tŭm kơxô̆ liăn mơhá dâng 8 rơtuh 500 rơpâu liăn/khế. Laga, ƀă ngế ki bu pêi môi hnoăng cheăng ƀă ối athế pêi cheăng ăm rơpŏng hngêi, kơxô̆ liăn pêi lo ing hnoăng cheăng a thôn ối pá ai tiô tơdroăng ki rơhêng vâ tung rêh ối.

Ing tơdroăng ki ai khât kố, pôa Vượt pâ thế kong pơlê kal ai tơ'nôm troăng hơlâ vâ tŏng kum kăn ƀô̆ cheăm hmiân tuăn, pêi klêi hnoăng cheăng:

“Ƀă kơlo liăn khế nôkố, á tơmiât cho tơniăn, á pêi châ. Ƀă mâu vâi pú ki ê ôh tá pêi tơ'nôm mê ối xơpá. Tiô á kong pơlê kal ai troăng hơlâ tŏng kum kơmăi kơmok ƀă ai mâu rôh hnê hriâm 'na chêh bro hlá mơ-éa”.

Rơtế ƀă troăng hơlâ ăm mơngế pơtối pêi cheăng, Gia Lai mơ'no lối 50 rơtal liăn tŏng kum dâng 1.820 ngế thế pơtê klêi kơ'nâi xing xoăng la ôh tá ối tung khu ki châ xúa troăng hơlâ tiô pơkâ 154 dêi Chin phuh. Rêm hơnăm pêi cheăng, ngế pơtê châ tŏng kum ƀă 0,7 xôh kơlo kâ liăn dêi khế pơtối hdrối vâ pơtê. Mâu ngế ki 'nâ hiăng tro hơnăm pơtê cheăng lơ dế châ xúa liăn khế pơtê cheăng, ôh tá ai ivá pêi cheăng châ tŏng kum môi hdroh 10 rơtuh liăn/ngế.

Jâ Phạm Thị Tố Hải, Ngế cheăng tung Khu pơkuâ ngăn Đảng ủy kong pơlê, Kăn pơkuâ Khu pơkuâ kăn ƀô̆ kong pơlê Gia Lai, ăm 'nâi:

“Tâng vâ pơchông ƀă lâp tơnêi têa, Gia Lai xuân ối tung kơlo mơhá liăn cho kơlo ki hên. Liăn ngân dêi kong pơlê xuân bu tơniăn mơhá châ a kơlo ki kố. Pơkâ a kơlo ki kố mê kô tơniăn tung xing xoăng liăn ngân, liăn ngân tung pơla ƀă ăm mâu hơnăm pơtối. Tâng ai tơdroăng ki hơ'lêh mê kong pơlê kô 'mâi rơnêu ăm tơniăn tâ nếo”.

Tơdroăng ki 'mâi hơ'lêh kơxô̆ liăn ƀă tŏng kum mơngế pơtê cheăng châ Gia Lai pêi pro tung pơla tơkŭm po nếo mâu ngế cheăng a thôn, tôh kơphô̆ klêi kơ'nâi rah xo. Ƀă tơdroăng pơkâ rak tơniăn hnoăng pơxúa ăm mâu ngế ki pơtối pêi cheăng, tơdrêng amê ai tơ'nôm troăng hơlâ tŏng kum mâu ngế ki pơtê cheăng la ôh tá ối tung khu ki châ xúa troăng hơlâ dêi Tơnêi têa.