Hngêi trung râ má môi Cư̆ Mlan, tơring tơkăng kong Ea Sup ai lối 600 ngế hok tro sap lâm 1 troh lâm 5. Tung kơxô̆ mê ai lối 140 ngế vâi o dế hriâm kâ ối a hngêi trung ƀă vâ chê 40 ngế hok tro ki ê dêi hngêi trung rơtế tung môi cheăm. Jâ Trần Thị Thủy - Ngế pơkuâ hngêi trung tối ăm ‘nâi, tâi tâng mâu hok tro kâ koi ối a hngêi trung xuân châ tŏng kum liăn kâ kơhâi dế ƀă kâ kơmăng. Kơlo tŏng kum 8.500 liăn/hok tro/môi hnoăng kâ.

Tơdroăng tŏng kum liăn kâ péa xoh hiăng kum nôu pâ hok tro kơdroh ki hngăm hngo ‘na liăn ngân, kum hngêi trung pơtối rak hơpêap pơchên hmê kâ ton hơnăm, pơchên ăm hok tro ai kơchâi kâ tŭm trếo kơhiâm mơdêk ivá mo lěm ăm hok tro vâ hriâm. Jâ Trần Thị Thủy tối tiah kố:

“3 hơnăm kố khu pleăng hnoăng tơná hiăng pơtối tŏng kum ăm mâu mâu vâi o hok tro ki hriâm kâ koi ối pơtê ai hmê kơchâi kâ tŭm trếo kơhiâm, rơtế ƀă hngêi trung veăng kum vâ ai tơdroăng rêh ối lěm tro a hngêi trung hnê ai tíu kâ koi ối pơtê ton hơnăm. Tâng ôh tá ai vâi kum, hngêi trung hriăn tăng xêh kô pá vâ ai. Hngêi trung púi vâ mâu khu ai tuăn hơ-ui pơtối rơtế veăng kum liăn kâ hmê ăm mâu vâi o hok tro’’.

Nôkố tung hngêi trung môi tiah kơbbăng tăng, mâu lâm hriâm a tơring tơkăng kong Ea Sup, kong pơlê Dak Lak hiăng châ ‘no liăn mơjiâng pro lěm, ai tŭm tơmeăm vâ hnê ƀă hriâm. La xua tơring kân rơdâ, tơdroăng chơ chiân kuăn ‘něng lăm hriâm trâm hên xơpá, nôu pâ hmâ tăng ăm dêi kuăn mung ối hngêi kuăn pơlê ki a chê hngêi trung.

O Phùng Trung Hiếu, hok tro lâm 2 hngêi trung râ má mmôi Cư Mlan tối, hngêi o kơtăn ing hngêi trung 20km, nôu pâ thế tăng veăng mung ối hlối ối tơdjuôm ƀă hên pú ki ê. Tơdroăng ôu kâ, rêh ối trâm hên xơpá. Sap ing châ mot ối a hngêi trung ai tíu kâ koi ối pơtê hlối châ kơjo kum liăn kâ, tơdroăng rêh ối ƀă hriâm tâp tơ’lêi hlâu hên tâ.

 “Hdrối nah, á ối a veăng mung pơtân ki a chê hngêi trung, thế kâ tơdjuôm ƀă hên ngế, vâi pú kâ ƀěng mê á ôh tá châ kâ phâi. La nôkố kâ tơdjuôm pú hên a tíu ối pơtê, á châ kâ hên, ai hên  kơchâi há’’.

Tiô ngoh Đặng Quốc Vương - Kăn hnê ngăn Đoân Droh rơtăm tơring Ea Sup tối, tơdroăng rêh ối dêi kuăn pơlê mâu hdroâng kuăn ngo tung tơring Ea Sup ối trâm hên xơpá, malối vâi o hok tro. Sap tơdế hơnăm 2018, Khu ngăn Đoân Droh rơtăm tơring tơrŭm ƀă Tíu xiâm pleăng hnoăng tŏng kum dêi Tơnêi têa ƀă mâu khu ai tuăn hơ-ui tung kong pơlê ƀă pá kong dêi kong pơlê Dak Lak hiăng tŏng kum liăn kâ kơhâi dế, liăn kâ kơhâi ƀă kơxêi ăm hên hok tro kơtiê xơpá ối a kơpong tíu tơkăng kong; mơjiâng hngêi ăm kâ ối pơtê ƀă kơxô̆ liăn vâ chê 800 rơtuh liăn vâ mâu vâi o ai tíu kâ ối pơtê, hlối mơ-eăm hriâm kơhnâ khât.

Khu ngăn Đoân Droh rơtăm tơring xuân dế pơtối tăng mâu ngế ai tuăn hơ-ui tung lâp tơnêi têa pơtối pêi pro tơdroăng tŏng kum vâ rế ai hên mâu hok tro kơtiê a kơpong tíu tơkăng kong châ xúa:

“Tơdroăng ‘’Roăng rak vâi o’’ hiăng tơbleăng troh hơnăm má 3. Ing tơdroăng mê, mâu vâi o châ hriâm hlối ai tíu kâ ối, ai tŭm kế kâ a hngêi trung. Drêng tơdroăng rêh ối tơniăn, mâu vâi o châ hriâm, veăng pêi mâu tơdroăng a hngêi trung châ tơ’lêi hlâu tâ. Ngin púi vâ mâu khu tơrŭm cheăng, mâu ngế ai tuăn hơ-ui pơtối rơtế ƀă vâ tơdroăng kô châ pơtối châ pêi ton, rế ai hên hok tro kơtiê a kơpong tíu tơkăng kong châ xúa, pơtối châ hriâm a hngêi trung’’.