A Tíu xiâm Veăng gum Pơlê pơla tung tŭm tơdroăng kong pơlê Gia Lai, rơnó pơtê hriâm hơnăm kố hơniâp ro ai pơxúa tŭm 37 ngế xuân châ hriâm nâl Ănglê tê kơtê xua mâu ngoh nâ ki lăm pleăng hnoăng tơná troh lăm hnê. Rêm rôh troh hâi mơ’nui măng tĭng, a hngêi kuăn pơlê tơkŭm hôp tâng rơkong hâk to xah hêi ƀă mâu rơkong mâu vâi hdrêng tơpui pơchuât ƀă nâl Ăng-glê.

O Nguyễn Trọng Phú, môi tung mâu ngế vâi o ki dế châ păn roăng a Tíu xiâm păn roăng rak, tối tơdroăng ki tơná sôk ro drêng châ hriâm nâl Ăng-glê ƀă mâu vâi ngoh nâ ki lăm pleăng hnoăng tơná tung rơnó pơtê hriâm kố.

“A châ mâu ngoh nâ hnê mâu từ vựng tung nâl Ănglê hnê tơrêm tơdroăng ki kal, a tâ hơniâp hâk vâ hriâm nâl Ăng-glê ƀă a kô mơ-eăm hriâm vâ rơkê’’.

Rơnó pơtê hriâm hơnăm 2025 a Gia Lai, mâu khu râ kơvâ cheăng xuân tơmâng khât troh tơdroăng mơhnhôk ƀă tá tơmeăm khoăng ƀă tuăn ngôa ƀă mâu hok tro kơtiê, hok tro kuăn ngo. O Rơ Châm Uyên, hok tro lâm 7, hngêi trung râ má péa cheăm Ia Phí, tơring Chư Pah ăm ‘nâi:

“Rơpŏng á xơpá, cho rơpŏng kơtiê. A châ mâu xăng, miê  tăm mâu ngê pơkuâ ngăn diâp hnoăng liăn hriâm ăm á, á tâ hơniâp ro. Hơnăm hriâm kố nah á châ pơxá hok tro hriâm rơkê, á kô mơ-eăm  hriâm kơhnâ khât hlối nguăn tâ nếo”.

Kong pơlê Gia Lai nôkố ai vâ chê 5.000 ngế hdrêng kơtiê xơpá  ó ƀă lối 95.000 vâi o mơni kô trâm tơdroăng pá tiah mê. Ƀă tơdroăng veăng kum, môi tuăn dêi mâu kăn ƀă pơlê pơla, vâi hdrêng tung kong pơlê dế pro tơ’lêi hlâu vâ mơnhông tâi tâng. Jâ Ksor Hiền - Phŏ pơkuâ ngăn pơkeăng pơlât, Ngế pơkuâ rak Liăn kum vâi hdrêng kong pơlê Gia Lai ăm ‘nâi:

“Tung khế pêi pro xua vâi hdrêng, Khu xiâm ngăn pơkeăng pơtối mơhnhôk tăng liăn vâ tơbleăng pêi mâu tơdroăng kơjo kum vâi hdrêng ki pá puât tung kong pơlê, mê cho hbru tơmeăm, kum hnoăng liăn hriâm, ăm rơxế mái, ăm tơmeăm xúa tung hriâm, tơmâng tŏng gum vâi o ki kơtiê xơpá a kơpong hơngế hơngo. Pêi pro tơniăn teăm tơdrêng luât pơkâ kơjo kum ăm vâi hdrêng ki kơtiê xơpá. Tơrŭm krá ƀă mâu tíu pêi cheăng, kơvâ cheăng, đông lêng, kong pơlê mơdêk tơbleăng mâu troăng hơlâ hbrâ mơdât xía vâ, rong râ ƀă pro pơlăm pơlối vâi hdrêng tơniăn ăm vâi hdrêng châ ai môi rơnó pơtê hriâm ro tơniăn ai pơxúa’’.

A Tíu mơhno túa lĕm tro hơdruê xuăng Vâi o kong pơlê Dak Lak, mâu tơdroăng pêi pro tung pơla rơnó  pơtê hriâm hơnăm 2025 hiăng po. Veăng tơdroăng mê, mâu vâi o châ xah hêi tiô tơdroăng xah chal krâ nah, xah hriĕn plĕng, tơmeăm vâi hdrêng ƀă xo tơmeăm hbru ăm. Tơdrêng amê, tơdroăng: Pôa Hồ ƀă vâi hdrêng, vâi hdrêng ƀă Pôa Hồ’’, hriâm tơdroăng vâ hlê tung mơdât klâk têa ăm vâi hdrêng... Xuân châ Khu ngăn túa lĕm tro hơdruê xuăng vâi o  tơkŭm po, tơ’mot hrĭng ngế vâi o veăng.

Nâ Nguyễn Thị Thúy Hiền, Phŏ pơkuâ ngăn Túa lĕm tro vâi o kong pơlê Dak Lak ăm ‘nâi, tung rôh kố kô ai dâng 30 to lâm hriâm pro pơro, pro ki kố ki ê sap kơxo má troh 9 chôu kơmăng.

“Hơnăm kố pakĭng tơdroăng pơtối rak mâu môn ki hmâ hriâm môi tiah hdrối nah ‘na túa lĕm tro, ‘na hơdruê xuăng, kơchuâ chêh um, pơtâp ivá, hriâm rơdroăng vâ rơkê tung rêh ối, mê ngin ối tơmâng hnê tê kơtê tơdroăng xah hêi ro, ăm vâi o hrĕn plĕng ki nếo, mơnúa ‘na tuăn ngôa rơkê. Malối hơnăm kố ngin tơmâng khât troh tơdroăng hbrâ mơdât tro klâk têa ƀă mơdât trâm xía vâ rong râ, pêi mâu tơdroăng cheăng ƀă ăm vâi o tăng ngăn vâ hlê túa lĕm tro Tây Nguyên”.

A rap Tíu xiâm mơđah phim Dak Lak, Rôh mơđah phim rơnó pơtê hriâm ăm vâi o ngăn pơxiâm. Sap nôkố troh hâi lơ 24/8, a kơxo hâi tơdrối ƀă hâi tĭng rêm măng tĭng, mâu vâi o kô lăm troh a rap kô châ ngăn tê kơtê mâu phim hnê hriâm tơdroăng ki ‘lo tro, tơtro ƀă hơnăm vâi hdrêng. Jâ Nguyễn Thị Hồng Thanh, phŏ pơkuẫiâm ăm ‘nâi: ƀă 3 rôh mơđah rêm hâi, mơđah ăm dâng 400 ngế vâi o vâi muăn ngăn, kô ai vâ chê 20 phim pim pum Việt Nam ki ro,  ai pơxúa, tối ‘na tơdroăng ton nah, hiâm mơno ‘nâi pâ dêi rơpó tung rơpŏng hngêi, hriâm ‘na tơniăn prôk drô troăng, mơdât tơhôu tôu pâm dêi rơpó a hngêi trung, hbrâ mơdât klâk têa a vâi hdrêng.

“Rôh mơđah phin a rơnó pơtê hriâm cho môi tung mâu tơdroăng pêi pro tiô hmâ dêi Tíu xiâm mơđah phim Dak Lak vâ pro tíu xah hêi ki lĕm tro, ai pơxúa ăm vâi o vâi muăn klêi môi hơnăm hriâm tơbrêi. Klêi ngăn phim ƀă mâu vâi o kô rah xêh tơdroăng phim ki vâ tơtro ƀă hơnăm, pakĭng xah hêi, ngin loi khât mâu vâi o kô ai tơ’nôm rôh châ hriâm mâu tơdroăng ki ‘ló tro , rêh ốh lĕm tâ nếo hlối ‘nâi pâ nhoăm tơdroăng ki kơnía lĕm tung rêh ối rêm hâi”.

Pakĭng kơpong xiâm pơlê kong kơdrâm, rôh mơđah phim a rơnó pơtê hriâm châ tơkŭm lăm mơđah ukố umê troh a mâu kơpong hơngế hơngo dêi kong pơlê Dak Lak, tơdrêng amê, cho mâu tơdroăng hnê klê têa tê kơtê, mơđah ukố umê ăm pơchuât ngăn hlá mơ-éa, plông xah hêi ăm vâi o... vâ tơ’lêi ăm vâi o cha xah hêi ro tung rơnó pơtê hriâm.