A rôh hôp, teăng mâ hên tíu pêi cheăng tung Rơ’jiu  hiăng veăng tơpui mơnhên tâ ‘na mâu tơdroăng hiăng châ pêi pro, hlối mơhno nhên ki u ối, ki hâi pêi, pêi hâi tro ƀă pâ thế pơkâ mâu troăng hơlâ tơkâ luâ, tơniăn tung hơnăm 2026 pê klêi tro tơdroăng pơcháu. Tơmâng xo, khê̆n kơdeăn mâu tơdroăng kơdôu mơ-eăm dêi mâu tíu pêi cheăng,  pôa Đỗ Tiến Sỹ, Kăn hnê ngăn Đảng, Ngế pơkuâ Rơ’jiu xiâm Việt Nam tối nhên:  Tung la ngiâ, mâu tíu pêi cheăng pơtối rak vế ki tơrŭm, môi tuăn, pơtối hơ’lêh nếo tơdroăng kal pêi, pêi hê tơdroăng hnê tối, mơhno hnoăng ki kal dêi kơ koan chêh hlá tơbeăng rơtế ƀă tơnêi têa.

Ngế pơkuâ Rơ’jiu xiâm Việt Nam tối nhên: Hơnăm 2026 tơbleăng pêi hên tơdroăng kal mê cho: Hneăng hôp Đảng tung lâp tơnêi têa rôh má 14, tơbleăng Pơkâ hôp Kân má 14, tâ phĭu rah xo kăn Kuô̆k hô̆i ƀă Hô̆i đong kuăn pơlê rêm râ, tơdrêng ƀă tơdroăng mơhnhôk pêi pro   tơdroăng ki pơ’lêh nếo châ tơbleăng trâu rơdâ, tâi tâng sap râ ủy, mâu kăn troh Pơkâ Hô̆i đong kuăn pơlê rêm râ.