Mâu hâi ki kố, o Vũ Trần Tiến Đat, hok tro lâm 5 Hngêi trung râ má môi Nguyễn Thị Định, cheăm Ia Rvê rơtế ƀă dêi pó kơtú ƀa long a tơnêi plông pá ngiâ bo cheăng  hngêi trung. Peăng pá tá, Hngêi trung ai tíu kâ koi ối pơtê hên râ mơhriâm cheăm Ia Rvê dế chôa ‘lâng vâ pêi pro kêi mâu tơmeăm khoăng ki má mơ’nui dêi kơpong ki ăm hok tro ối pơtê, hngêi tơ’noăng ivá hên tơdroăng mơhriâm, hngêi chôu ‘măn hlá mơ-éa vâ pơchuât ƀă hên hĕng mâu kế tơmeăm ki ê. Đạt hâk ro ‘nâng xua hơnăm mơhriâm 2026-2027 la ngiâ kố ah, o rơtế ƀă dêi mâu vâi pú mơhriâm, châ xah hêi tung hngêi trung nếo:

“Thái cô ƀă mâu nôu pâ o tối, pơxiâm ing hơnăm hriâm la ngiâ kố ah, o kô châ mot hriâm tung Hngêi trung ai tíu kâ koi ối pơtê péa râ mơhriâm dêi cheăm Ia R’vê. Á o tâ hơniâp ro xua tâng châ mơhriâm tung hngêi trung ki mê. Amê ah, mâu thái cô kô rak ngăn ngin, ing tơdroăng kâ, koi, pơtê ƀă ai tá tíu ki vâ mơhriâm ivá, peăng ƀa long. Mơ’nui măng tĭng, á nếo prếo a hngêi. Á kơdo mơ-eăm mơhriâm kơhnâ. Ki ơhêng vâ dêi á o mê chiâng mơngế ki kơtú ƀa long rơkê”.

Ƀă o Nông Thị Thùy, hok tro lâm 7 Hngêi trung râ má péa Trần Hưng Đạo, cheăm Ia Lốp tối ăm ngin ‘nâi, Hngêi trung péa râ mơhriâm a cheăm Ia Lốp kố châ mơjiâng ing mâu hngêi trung râ má môi Nguyễn Trãi ƀă Hngêi trung râ má péa Trần Hưng Đạo. Xua ti mê, hơnăm hriâm la ngiâ á kô pơtối mơhriâm tâp, rêh kâ ối tung hngêi dêi hngêi trung ki mê. Ahdrối vâ châ mơhriâm tung hngêi trung ki nếo châ mĕn mơjiâng krá kâk, tŭm têk kế tơmeăm, tung hngêi trung ki krúa lĕm mê, o ai tối tiah kố:

“Á o hơniâp ro khât xua châ mot mơhriâm tung hngêi trung, xua hngêi á o kơtăn ing hngêi trung châ 15km. Tung hngêi trung ai pú hmâ, thái cô, ai kơbong ki ăm vâi hok tro kơdrâi koi ối pơtê lĕm tơniăn. Á o kô mơ-eăm mơnhông xêh tơdroăng rêh kâ ối, kô mơ-eăm kơhnâ mơhriâm dêi xêh. Hiâm mơno á o pói rơhêng vâ kô chiâng cô hnê. Á kơdo mơ-eăm mơhriâm tâp ki rơkê khât vâ khoh châ pêi pro tiô hiâm mơno á hiăng púi rơhêng vâ, kơ’nâi ah kô pơtối vêh dêi a tíu tơkăng kong vâ hnê mơhno ăm mâu vâi o ki tơxĭn a tíu ki mê”.

Kong pơlê Dak Lak ai 4 to cheăm ối drô tíu tơkăng kong, mê cho Ea Bung, Ia R’vê, Ia Lốp ƀă Buôn Đôn. Mâu cheăm pơrá ai tơnêi tíu kân rơdâ, kuăn pơlê ối prăng prêh, pơlê kơtăn ing dế cheăm châ dâng chât km. Nâ Vi Thị Thiều, ối a thôn làng Thanh niên lập nghiệp, cheăm Ia lốp tối ăm ngin ‘nâi: Rơpŏng á ai 2 ngế kŭn dế hriâm lâm 8 ƀă lâm 6. Hngêi ối kơtăn ing hngêi trung vâ chê 20km, xua mê, tơdroăng ki lăm chiân, lăm xo dêi mâu kuăn mơhriâm pá puât khât. Tơdroăng ki mâu kuăn châ mot hriâm hnối châ ối, ai tíu kâ koi ối pơtê dêi hngêi trung hiăng gum rơpŏng á hmiân tơniăn tâ.

“Drêng á muăn châ mơhriâm rêh kâ ối tung môi tơnêi tíu ki kân rơdâ krá lĕm, ai tŭm mâu tăng kơƀăng, kế tơmeăm, ai kơbong kâ hmê, ai tíu kâ koi ối pơtê mê á hmiân tuăn. Kố cho tíu ki vâ veăng gum á muăn châ xông kân hdrah, tuăn ngôa thăm rế hlê plĕng hên tâ. Cho môi ngế nôu pâ mê á phiu ro ó khât, xua ôh tá athế lăm chiân, tơdah xo dêi kuăn ‘nĕng rêm hâi trối mâu hơnăm hdrối mê hía nah, ƀă xuân ôh tá tô tuăn ki klâi tơdroăng ki prôk lăm chiân ăm dêi kuăn trối hdrối nah. Troh a mơ’nui măng tĭng kuăn á kô prếo vêh xêh a hngêi, xah ôm hêi”.

Hneăng hơnăm 2025-2027, kong pơlê Dak Lak mơjiâng 4 toăng hngêi trung péa râ mơhriâm a mâu cheăm tíu tơkăng kong ƀă mâu kơpong ki trâm hên xahpá. Tung mê, mâu hngêi trung a cheăm Ia R’vê, Ia Lốp ƀă Buôn Đôn kô pơxiâm mot mơhriâm tung hơnăm mơhriâm nếo 2026-2027, tơdah dâng 3.100 ngế hok tro ing lâm 1 troh lâm 9, ai dâng 2/3 ngế hok tro ki mơhriâm tâp, kâ koi ối pơtê tung hngêi trung.

Pôa Hồ Sĩ Cát, Kăn ngăn Hngêi trung ai tíu kâ koi ối pơtê péa râ mơhriâm dêi cheăm Ia R’vê tối ăm ngin ‘nâi, hngêi trung hiăng rah ‘mot 910 ngế hok tro ing 3 toăng hngêi trung, Râ má môi, Râ má péa Chu Văn An, hngêi trung râ má Péa Nguyễn Thị Định ƀă hngêi trung râ má môi Nguyễn Đình Chiểu. Tơdrêng amê, hngêi trung dế tăng rah mâu thái cô, mâu ngế ki cheăng tung ƀơrô, mâu ki rak ngăn hok tro, hơniâp on, hbrâ vâ tơdah mâu hok tro mot tung hơnăm hriâm nếo 2026-2027.

“Drêng mâu vâi o hiăng mot mơhriâm tung hngêi trung, tơdroăng ki pơkuâ ngăn hok tro ing kơxo troh a kơmăng ôh tá xâu préa xếo, hmiân tuăn vâ lo lăm a chiâk a deăng. Ngế nôu, ngế pâ ôh tá tôu tuăn, tơvâ tơvân hên tơdroăng ƀă dêi kuăn ‘nĕng a mâu roh kâ hmê a kơhâi dế, a kơxêi lăm tơdah xo dêi kuăn ‘nĕng, ăm dêi kuăn ‘nĕng kâ hmê. Tâi tâng hok tro mơhriâm a hngêi trung ai tíu kâ koi ối pơtê pơrá châ xúa ing mâu troăng hơlâ kơjo gum ing liăn kâ hmê, hmân ếo, hlá mơ-eá mơhriâm, ƀaoh hiêm khăm pơlât xua Tơnêi têa tŏng gum”.

Mâu hngêi trung a kơpong tíu tơkăng kong a kong ngo Tây Ngyên ôh tá xê to po roh ki tơ’lêi hlâu ăm tơdroăng mơhriâm lĕm tơniăn tâ mê ối mơdêk hiâm mơno púi vâ, gum vâi hdrêng a kơpong tíu tơkăng kong châ mơnhông tung tŭm têk tơdroăng, vâ la ngiâ kố ah, kô vêh veăng gum mơjiâng pơlê cheăm ki ó rơdêi a kơpong tíu tơkăng kong dêi Tơnêi têa.