Tơpui a rôh trâm mâ,  Phŏ kăn xiâm hnê ngăn tơnêi têa tối rơdêi, hriâm kơhnâ ƀă nhuô̆m mơngế ki rơkê cho khôi túa lĕm tro dêi hdroâng mơngế, châ Pôa Hồ Chí Minh, Kăn xiâm hnê ngăn tơnêi têa hneăng apoăng ƀă mâu rơxông ôh tá la lâi pơtê tơbêng mơnhông. Tung pơla khoa hok kŏng ngê̆, pơhlêh xúa kŏng ngê̆ ƀă tuăn ngôa rơkê kuăn mơngế mơnhông mơdêk ó rơdêi, kuăn mơngế ƀă ki dâi lĕm mơngế pêi cheăng cho ki xiâm pơkâ ăm tơdroăng châ tơƀrê.

Phŏ Kăn xiâm hnê ngăn tơnêi têa pơkâ thế tơdroăng mơhnhôk hriâm, mơhnhôk mâu ngế rơkê ƀă mơjiâng pơlê pơla hriâm pơtối châ mơdêk, xo "Kuăn pơlê hriâm" pro xiâm, mơhnhôk hiâm mơno hriâm tung tâi tâng kuăn pơlê. Rêm râ Khu mơhnhôk hriâm kal pơhlêh nếo tơdroăng cheăng, mơdêk pơhlêh xúa kŏng ngê̆, tơdjêp hriâm tâp plâ rơxông ƀă mơnhông mơngế pêi cheăng, tơdrêng amê tơmâng mơngế pá puât, kơpong hơngế, hơngo, veăng mơhnhôk túa lĕm tro hriâm tung kuăn pơlê.