Pôa Trần Lưu Quang teăng mâ kăn pơkuâ, kuăn pơlê Pơlê kong kân Hồ Chí Minh pơtroh rơkong sĭng khéa ó khât tro Kăn pơkuâ tíu cheăng teăng mâ Lếo a Pơlê kong kân Hồ Chí Minh, tâi tâng kăn ƀô̆, mâu ngế cheăng dêi Tíu cheăng kăn teăng mâ, Tơnêi têa ƀă kuăn pơlê Lếo xua tơdroăng ki hlâ lêk dêi pôa Xaysomphone Phomvihane, Kăn xiâm hnê ngăn Kuô̆k hô̆i Lếo.

Tung sôh mơ-éa, pôa Trần Lưu Quang, Kăn pơkuâ ngăn Đảng Pơlê kong kân Hồ Chí Minh chêh: “Khéa hơ’nêng khât kơ pôa Xaysomphone Phomvihane, Ngế cheăng tung Khu xiâm kal kí, Kăn xiâm hnê ngăn Kuô̆k hô̆i tơnêi têa Kŏng hòa Yân chuh Nhân yân Lếo, ngế pú ki achê khât dêi Đảng, Tơnêi têa ƀă kuăn pơlê Việt Nam.

Tơdroăng ki hlâ lêk dêi pôa Xaysomphone Phomvihane cho tơdroăng ki khéa hơ’nêng khât dêi Đảng, Tơnêi têa ƀă Kuăn pơlê Lếo nhŏng o, cho tơdroăng ki khéa hơ’nêng ôh tá kâi tơbêng dêi rơpŏng pôa; Đảng ƀô̆, Kăn pơkuâ ƀă Kuăn pơlê Pơlê kong kân Hồ Chí Minh hía lôi ngế kăn achê, đi đo mơdoh tơrŭm cheăng tơmâng ngăn troh tơdroăng rak vế ƀă mơnhông tơrŭm cheăng tung la ngiâ Việt Nam – Lếo, tung mê, ai tơrŭm tơroâ, tơrŭm cheăng pơla Pơlê kong kân Hồ Chí Minh ƀă mâu kong pơlê dêi Lếo.