Kơxê lơ 11/7, pôa Võ Văn Thưởng, Kăn xiâm hnê ngăn tơnêi têa hiăng troh pôu, rơkâu Khu xiâm Gâk kring tơdroăng kal kí, ối tung Khu xiâm ngăn Kŏng an. Tơpui akố, Kăn xiâm hnê ngăn tơnêi têa mơnhên tối khât mâu hơnăm hdrối nah, khu Kŏng an kuăn pơlê tối tơdjuôm, khu lêng Gâk kring tơdroăng kal kí tối krê hiăng pơkâ kơtăng, tơbleăng pêi pro tơƀrê tơdroăng ki hnê mơhno, pơkâ troăng tơmiât dêi kăn pơkuâ ngăn Đảng, Tơnêi têa ƀă hnoăng cheăng rak vế gâk kring tơdroăng kal kí.

Tung tâi tâng khu lêng hiăng ‘mâi mơnhông mâu tơdroăng ki xơpá, tơrŭm, môi tuăn, tí tăng ‘nâi plĕng tuăn ngoâ rơkê, pêi klêi hnoăng cheăng kal kí ki châ pơcháu; veăng kum rak vế krá tơniăn tơdroăng gâk kring, hơniâp lĕm, pro tơ’lêi hlâu ăm mơnhông mơdêk cheăng kâ rêh ối pơlê pơla dêi tơnêi têa, mơdêk hnoăng cheăng, um méa dêi Việt Nam a kong têa ê. Pơkâ troăng tơmiât ‘na mâu hnoăng cheăng ki kal dêi khu lêng Gak kring tơdroăng kal kí tung la ngiâ.

Kăn xiâm hnê ngăn tơnêi têa pơkâ thế Đảng ủy Kŏng an Tơnêi têa, Đảng ủy Khu xiâm Gâk kring tơdroăng kal kí pêi pro tro hnoăng cheăng tí tăng ‘nâi plĕng tơdroăng cheăng tung rak vế ivá hiâm mơno dêi Đảng, rak vế tơdroăng ki pơkuâ dêi Đảng, rak vế troăng hơlâ, rak vế kuăn pơlê; tơkŭm ‘nâi krá, mơnhên tối, tơbleăng tro, mâu tơdroăng sap ing hngế, mâu tơdroăng tơmiât vâ plâ ƀâ tung mâu tíu pêi cheăng vâ teăm tí tăng ‘nâi plĕng ăm rêm râ ai troăng hơlâ pơkâ tơƀrê.